Read in తెలుగు / ಕನ್ನಡ / தமிழ் / देवनागरी / English (IAST)
|| kuśanābhakanyōpākhyānam ||
brahmayōnirmahānāsītkuśō nāma mahātapāḥ |
akliṣṭavratadharmajñaḥ sajjanapratipūjakaḥ || 1 ||
sa mahātmā kulīnāyāṁ yuktāyāṁ suguṇōlbaṇān |
vaidarbhyāṁ janayāmāsa caturaḥ sadr̥śānsutān || 2 ||
kuśāmbaṁ kuśanābhaṁ ca adhūrtarajasaṁ vasum |
dīptiyuktānmahōtsāhān kṣatradharmacikīrṣayā || 3 ||
tānuvāca kuśaḥ putrāndharmiṣṭhānsatyavādinaḥ |
kriyatāṁ pālanaṁ putrā dharmaṁ prāpsyatha puṣkalam || 4 ||
kuśasya vacanaṁ śrutvā catvārō lōkasaṁmatāḥ |
nivēśaṁ cakrirē sarvē purāṇāṁ nr̥varāstadā || 5 ||
kuśāmbastu mahātējāḥ kauśāmbīmakarōtpurīm |
kuśanābhastu dharmātmā puraṁ cakrē mahōdayam || 6 ||
adhūrtarajasō rāma dharmāraṇyaṁ mahīpatiḥ |
cakrē puravaraṁ rājā vasuścakrē girivrajam || 7 ||
ēṣā vasumatī rāma vasōstasya mahātmanaḥ |
ētē śailavarāḥ pañca prakāśantē samantataḥ || 8 ||
sumāgadhī nadī puṇyā magadhānviśrutā yayau |
pañcānāṁ śailamukhyānāṁ madhyē mālēva śōbhatē || 9 ||
saiṣā hi māgadhī rāma vasōstasya mahātmanaḥ |
pūrvābhicaritā rāma sukṣētrā sasyamālinī || 10 ||
kuśanābhastu rājarṣiḥ kanyāśatamanuttamam |
janayāmāsa dharmātmā ghr̥tācyāṁ raghunandana || 11 ||
tāstu yauvanaśālinyō rūpavatyaḥ svalaṅkr̥tāḥ |
udyānabhūmimāgamya prāvr̥ṣīva śatahradāḥ || 12 ||
gāyantyō nr̥tyamānāśca vādayantyaśca sarvaśaḥ |
āmōdaṁ paramaṁ jagmurvarābharaṇabhūṣitāḥ || 13 ||
atha tāścārusarvāṅgyō rūpēṇāpratimā bhuvi |
udyānabhūmimāgamya tārā iva ghanāntarē || 14 ||
tāḥ sarvaguṇasampannā rūpayauvanasamyutāḥ |
dr̥ṣṭvā sarvātmakō vāyuridaṁ vacanamabravīt || 15 ||
ahaṁ vaḥ kāmayē sarvā bhāryā mama bhaviṣyatha |
mānuṣastyajyatāṁ bhāvō dīrghamāyuravāpsyatha || 16 ||
calaṁ hi yauvanaṁ nityaṁ mānuṣēṣu viśēṣataḥ |
akṣayaṁ yauvanaṁ prāptā amaryaśca bhaviṣyatha || 17 ||
tasya tadvacanaṁ śrutvā vāyōrakliṣṭakarmaṇaḥ |
apahāsya tatō vākyaṁ kanyāśatamathābravīt || 18 ||
antaścarasi bhūtānāṁ sarvēṣāṁ tvaṁ surōttama |
prabhāvajñāśca tē sarvāḥ kimasmānavamanyasē || 19 ||
kuśanābhasutāḥ sarvāḥ samarthāstvāṁ surōttama |
sthānāccyāvayituṁ dēvaṁ rakṣāmastu tapō vayam || 20 ||
mā bhūtsa kālō durmēdhaḥ pitaraṁ satyavādinam |
nāvamanyasva dharmēṇa svayaṁ-varamupāsmahē || 21 ||
pitā hi prabhurasmākaṁ daivataṁ paramaṁ hi naḥ |
yasya nō dāsyati pitā sa nō bhartā bhaviṣyati || 22 ||
tāsāṁ tadvacanaṁ śrutvā vāyuḥ paramakōpanaḥ |
praviśya sarvagātrāṇi babhañja bhagavānprabhuḥ || 23 ||
tāḥ kanyā vāyunā bhagnā viviśurnr̥patērgr̥ham |
prāpatanbhuvi sambhrāntāḥ salajjāḥ sāśrulōcanāḥ || 24 ||
sa ca tā dayitā dīnāḥ kanyāḥ paramaśōbhanāḥ |
dr̥ṣṭvā bhagnāstadā rājā sambhrānta idamabravīt || 25 ||
kimidaṁ kathyatāṁ putryaḥ kō dharmamavamanyatē |
kubjāḥ kēna kr̥tāḥ sarvā vēṣṭantyō nābhibhāṣatha |
ēvaṁ rājā viniśvasya samādhiṁ sandadhē tataḥ || 26 ||
ityārṣē śrīmadrāmāyaṇē vālmīkīyē ādikāvyē bālakāṇḍē dvātriṁśaḥ sargaḥ || 32 ||
bālakāṇḍa trayastriṁśaḥ sargaḥ (33) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.