Balakanda Sarga 32 – பா³லகாண்ட³ த்³வாத்ரிம்ஶ꞉ ஸர்க³꞉ (32)

॥ குஶநாப⁴கந்யோபாக்²யாநம் ॥

ப்³ரஹ்மயோநிர்மஹாநாஸீத்குஶோ நாம மஹாதபா꞉ ।
அக்லிஷ்டவ்ரதத⁴ர்மஜ்ஞ꞉ ஸஜ்ஜநப்ரதிபூஜக꞉ ॥ 1 ॥

ஸ மஹாத்மா குலீநாயாம் யுக்தாயாம் ஸுகு³ணோல்ப³ணாந் ।
வைத³ர்ப்⁴யாம் ஜநயாமாஸ சதுர꞉ ஸத்³ருஶாந்ஸுதாந் ॥ 2 ॥

குஶாம்ப³ம் குஶநாப⁴ம் ச அதூ⁴ர்தரஜஸம் வஸும் ।
தீ³ப்தியுக்தாந்மஹோத்ஸாஹாந் க்ஷத்ரத⁴ர்மசிகீர்ஷயா ॥ 3 ॥

தாநுவாச குஶ꞉ புத்ராந்த⁴ர்மிஷ்டா²ந்ஸத்யவாதி³ந꞉ ।
க்ரியதாம் பாலநம் புத்ரா த⁴ர்மம் ப்ராப்ஸ்யத² புஷ்களம் ॥ 4 ॥

குஶஸ்ய வசநம் ஶ்ருத்வா சத்வாரோ லோகஸம்மதா꞉ ।
நிவேஶம் சக்ரிரே ஸர்வே புராணாம் ந்ருவராஸ்ததா³ ॥ 5 ॥

குஶாம்ப³ஸ்து மஹாதேஜா꞉ கௌஶாம்பீ³மகரோத்புரீம் ।
குஶநாப⁴ஸ்து த⁴ர்மாத்மா புரம் சக்ரே மஹோத³யம் ॥ 6 ॥

அதூ⁴ர்தரஜஸோ ராம த⁴ர்மாரண்யம் மஹீபதி꞉ ।
சக்ரே புரவரம் ராஜா வஸுஶ்சக்ரே கி³ரிவ்ரஜம் ॥ 7 ॥

ஏஷா வஸுமதீ ராம வஸோஸ்தஸ்ய மஹாத்மந꞉ ।
ஏதே ஶைலவரா꞉ பஞ்ச ப்ரகாஶந்தே ஸமந்தத꞉ ॥ 8 ॥

ஸுமாக³தீ⁴ நதீ³ புண்யா மக³தா⁴ந்விஶ்ருதா யயௌ ।
பஞ்சாநாம் ஶைலமுக்²யாநாம் மத்⁴யே மாலேவ ஶோப⁴தே ॥ 9 ॥

ஸைஷா ஹி மாக³தீ⁴ ராம வஸோஸ்தஸ்ய மஹாத்மந꞉ ।
பூர்வாபி⁴சரிதா ராம ஸுக்ஷேத்ரா ஸஸ்யமாலிநீ ॥ 10 ॥

குஶநாப⁴ஸ்து ராஜர்ஷி꞉ கந்யாஶதமநுத்தமம் ।
ஜநயாமாஸ த⁴ர்மாத்மா க்⁴ருதாச்யாம் ரகு⁴நந்த³ந ॥ 11 ॥

தாஸ்து யௌவநஶாலிந்யோ ரூபவத்ய꞉ ஸ்வலங்க்ருதா꞉ ।
உத்³யாநபூ⁴மிமாக³ம்ய ப்ராவ்ருஷீவ ஶதஹ்ரதா³꞉ ॥ 12 ॥

கா³யந்த்யோ ந்ருத்யமாநாஶ்ச வாத³யந்த்யஶ்ச ஸர்வஶ꞉ ।
ஆமோத³ம் பரமம் ஜக்³முர்வராப⁴ரணபூ⁴ஷிதா꞉ ॥ 13 ॥

அத² தாஶ்சாருஸர்வாங்க்³யோ ரூபேணாப்ரதிமா பு⁴வி ।
உத்³யாநபூ⁴மிமாக³ம்ய தாரா இவ க⁴நாந்தரே ॥ 14 ॥

தா꞉ ஸர்வகு³ணஸம்பந்நா ரூபயௌவநஸம்யுதா꞉ ।
த்³ருஷ்ட்வா ஸர்வாத்மகோ வாயுரித³ம் வசநமப்³ரவீத் ॥ 15 ॥

அஹம் வ꞉ காமயே ஸர்வா பா⁴ர்யா மம ப⁴விஷ்யத² ।
மாநுஷஸ்த்யஜ்யதாம் பா⁴வோ தீ³ர்க⁴மாயுரவாப்ஸ்யத² ॥ 16 ॥

சலம் ஹி யௌவநம் நித்யம் மாநுஷேஷு விஶேஷத꞉ ।
அக்ஷயம் யௌவநம் ப்ராப்தா அமர்யஶ்ச ப⁴விஷ்யத² ॥ 17 ॥

தஸ்ய தத்³வசநம் ஶ்ருத்வா வாயோரக்லிஷ்டகர்மண꞉ ।
அபஹாஸ்ய ததோ வாக்யம் கந்யாஶதமதா²ப்³ரவீத் ॥ 18 ॥

அந்தஶ்சரஸி பூ⁴தாநாம் ஸர்வேஷாம் த்வம் ஸுரோத்தம ।
ப்ரபா⁴வஜ்ஞாஶ்ச தே ஸர்வா꞉ கிமஸ்மாநவமந்யஸே ॥ 19 ॥

குஶநாப⁴ஸுதா꞉ ஸர்வா꞉ ஸமர்தா²ஸ்த்வாம் ஸுரோத்தம ।
ஸ்தா²நாச்ச்யாவயிதும் தே³வம் ரக்ஷாமஸ்து தபோ வயம் ॥ 20 ॥

மா பூ⁴த்ஸ காலோ து³ர்மேத⁴꞉ பிதரம் ஸத்யவாதி³நம் ।
நாவமந்யஸ்வ த⁴ர்மேண ஸ்வயம்வரமுபாஸ்மஹே ॥ 21 ॥

பிதா ஹி ப்ரபு⁴ரஸ்மாகம் தை³வதம் பரமம் ஹி ந꞉ ।
யஸ்ய நோ தா³ஸ்யதி பிதா ஸ நோ ப⁴ர்தா ப⁴விஷ்யதி ॥ 22 ॥

தாஸாம் தத்³வசநம் ஶ்ருத்வா வாயு꞉ பரமகோபந꞉ ।
ப்ரவிஶ்ய ஸர்வகா³த்ராணி ப³ப⁴ஞ்ஜ ப⁴க³வாந்ப்ரபு⁴꞉ ॥ 23 ॥

தா꞉ கந்யா வாயுநா ப⁴க்³நா விவிஶுர்ந்ருபதேர்க்³ருஹம் ।
ப்ராபதந்பு⁴வி ஸம்ப்⁴ராந்தா꞉ ஸலஜ்ஜா꞉ ஸாஶ்ருலோசநா꞉ ॥ 24 ॥

ஸ ச தா த³யிதா தீ³நா꞉ கந்யா꞉ பரமஶோப⁴நா꞉ ।
த்³ருஷ்ட்வா ப⁴க்³நாஸ்ததா³ ராஜா ஸம்ப்⁴ராந்த இத³மப்³ரவீத் ॥ 25 ॥

கிமித³ம் கத்²யதாம் புத்ர்ய꞉ கோ த⁴ர்மமவமந்யதே ।
குப்³ஜா꞉ கேந க்ருதா꞉ ஸர்வா வேஷ்டந்த்யோ நாபி⁴பா⁴ஷத² ।
ஏவம் ராஜா விநிஶ்வஸ்ய ஸமாதி⁴ம் ஸந்த³தே⁴ தத꞉ ॥ 26 ॥

இத்யார்ஷே ஶ்ரீமத்³ராமாயணே வால்மீகீயே ஆதி³காவ்யே பா³லகாண்டே³ த்³வாத்ரிம்ஶ꞉ ஸர்க³꞉ ॥ 32 ॥

பா³லகாண்ட³ த்ரயஸ்த்ரிம்ஶ꞉ ஸர்க³꞉ (33) >>

---

ஸம்பூர்ண வால்மீகி ராமாயணே பா³லகாண்ட³ பார்க்க.

Did you see any mistake/variation in the content above? Click here to report mistakes and corrections in Stotranidhi content.