Read in తెలుగు / ಕನ್ನಡ / தமிழ் / देवनागरी / English (IAST)
|| r̥kṣavānarōtpattiḥ ||
putratvaṁ tu gatē viṣṇau rājñastasya mahātmanaḥ |
uvāca dēvatāḥ sarvāḥ svayambhūrbhagavānidam || 1 ||
satyasandhasya vīrasya sarvēṣāṁ nō hitaiṣiṇaḥ |
viṣṇōḥ sahāyānbalinaḥ sr̥jadhvaṁ kāmarūpiṇaḥ || 2 ||
māyāvidaśca śūrāṁśca vāyuvēgasamāñjavē |
nayajñān buddhisampannān viṣṇutulyaparākramān || 3 ||
asaṁhāryānupāyajñān siṁhasaṁhananānvitān |
sarvāstraguṇasampannānamr̥taprāśanāniva || 4 ||
apsaraḥsu ca mukhyāsu gandharvīṇāṁ tanūṣu ca |
kiṁnarīṇāṁ ca gātrēṣu vānarīṇāṁ tanūṣu ca || 5 ||
yakṣapannagakanyāsu r̥kṣividyādharīṣu ca |
sr̥jadhvaṁ harirūpēṇa putrāṁstulyaparākramān || 6 ||
pūrvamēva mayā sr̥ṣṭō jāmbavānr̥kṣapuṅgavaḥ |
jr̥mbhamāṇasya sahasā mama vakrādajāyata || 7 ||
tē tathōktā bhagavatā tatpratiśrutya śāsanam |
janayāmāsurēvaṁ tē putrānvānararūpiṇaḥ || 8 ||
r̥ṣayaśca mahātmānaḥ siddhavidyādharōragāḥ |
cāraṇāśca sutānvīrānsasr̥jurvanacāriṇaḥ || 9 ||
vānarēndraṁ mahēndrābhamindrō vālinamūrjitam |
sugrīvaṁ janayāmāsa tapanastapatāṁ varaḥ || 10 ||
br̥haspatistvajanayattāraṁ nāma mahāharim |
sarvavānaramukhyānāṁ buddhimantamanuttamam || 11 ||
dhanadasya sutaḥ śrīmānvānarō gandhamādanaḥ |
viśvakarmā tvajanayannalaṁ nāma mahāharim || 12 ||
pāvakasya sutaḥ śrīmānnīlō:’gnisadr̥śaprabhaḥ |
tējasā yaśasā vīryādatyaricyata vānarān || 13 ||
rūpadraviṇasampannāvaśvinau rūpasaṁmatau |
maindaṁ ca dvividaṁ caiva janayāmāsatuḥ svayam || 14 ||
varuṇō janayāmāsa suṣēṇaṁ nāma vānaram |
śarabhaṁ janayāmāsa parjanyastu mahābalam || 15 ||
mārutasyātmajaḥ śrīmānhanumānnāma vānaraḥ |
vajrasaṁhananōpētō vainatēyasamō javē || 16 ||
sarvavānaramukhyēṣu buddhimānbalavānapi |
tē sr̥ṣṭā bahusāhasrā daśagrīvavadhē ratāḥ || 17 ||
apramēyabalā vīrā vikrāntāḥ kāmarūpiṇaḥ |
tē gajācalasaṅkāśā vapuṣmantō mahābalāḥ || 18 ||
r̥kṣavānaragōpucchāḥ kṣipramēvābhijajñirē |
yasya dēvasya yadrūpaṁ vēṣō yaśca parākramaḥ || 19 ||
ajāyata samastēna tasya tasya sutaḥ pr̥thak |
gōlāṅgūlīṣu cōtpannāḥ kēcitsaṁmatavikramāḥ || 20 ||
r̥kṣīṣu ca tathā jātā vānarāḥ kiṁnarīṣu ca |
dēvā maharṣigandharvāstārkṣyā yakṣā yaśasvinaḥ || 21 ||
nāgāḥ kimpuruṣāścaiva siddhavidyādharōragāḥ |
bahavō janayāmāsurhr̥ṣṭāstatra sahasraśaḥ || 22 ||
[* adhikapāṭhaḥ –
cāraṇāśca sutān vīrān sasr̥juḥ vana cāriṇaḥ |
apsarassu ca mukhyāsu tathā vidyadharīṣu ca |
nāgakanyāsu ca tathā gandharvīṇāṁ tanūṣu ca |
kāmarūpa balōpētā yathā kāmavicāriṇaḥ |
*]
vānarānsumahākāyānsarvānvai vanacāriṇaḥ |
siṁhaśārdūlasadr̥śā darpēṇa ca balēna ca || 23 ||
śilāpraharaṇāḥ sarvē sarvē pādapayōdhinaḥ |
nakhadaṁṣṭrāyudhāḥ sarvē sarvē sarvāstrakōvidāḥ || 24 ||
vicālayēyuḥ śailēndrānbhēdayēyuḥ sthirān drumān |
kṣōbhayēyuśca vēgēna samudraṁ saritāṁ patim || 25 ||
dārayēyuḥ kṣitiṁ padbhyāmāplavēyurmahārṇavam |
nabhasthalaṁ viśēyuśca gr̥hṇīyurapi tōyadān || 26 ||
gr̥hṇīyurapi mātaṅgānmattānpravrajatō vanē |
nardamānāśca nādēna pātayēyurvihaṅgamān || 27 ||
īdr̥śānāṁ prasūtāni harīṇāṁ kāmarūpiṇām |
śataṁ śatasahasrāṇi yūthapānāṁ mahātmanām || 28 ||
tē pradhānēṣu yūthēṣu harīṇāṁ hariyūthapāḥ |
babhūvuryūthapaśrēṣṭhā vīrāṁścājanayanharīn || 29 ||
anyē r̥kṣavataḥ prasthānupatasthuḥ sahasraśaḥ |
anyē nānāvidhān śailānbhējirē kānanāni ca || 30 ||
sūryaputraṁ ca sugrīvaṁ śakraputraṁ ca vālinam |
bhrātarāvupatasthustē sarvē ēva harīśvarāḥ || 31 ||
nalaṁ nīlaṁ hanūmantamanyāṁśca hariyūthapān |
tē tārkṣyabalasampannāḥ sarvē yuddhaviśāradāḥ || 32 ||
vicarantō:’rdayandarpāt siṁhavyāghramahōragān |
tāṁśca sarvānmahābāhurvālī vipulavikramaḥ || 33 ||
jugōpa bhujavīryēṇa r̥kṣagōpucchavānarān |
tairiyaṁ pr̥thivī śūraiḥ saparvatavanārṇavā |
kīrṇā vividhasaṁsthānairnānāvyañjanalakṣaṇaiḥ || 34 ||
tairmēghabr̥ndācalakūṭakalpai-
-rmahābalairvānarayūthapālaiḥ |
babhūva bhūrbhīmaśarīrarūpaiḥ
samāvr̥tā rāmasahāyahētōḥ || 35 ||
ityārṣē śrīmadrāmāyaṇē vālmīkīyē ādikāvyē bālakāṇḍē saptadaśaḥ sargaḥ || 17 ||
bālakāṇḍa aṣṭādaśaḥ sargaḥ (18) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
