Read in తెలుగు / ಕನ್ನಡ / தமிழ் / देवनागरी / English (IAST)
|| vratacaryāvidhānam ||
sandiśya rāmaṁ nr̥patiḥ śvōbhāvinyabhiṣēcanē |
purōhitaṁ samāhūya vasiṣṭhaṁ cēdamabravīt || 1 ||
gacchōpavāsaṁ kākutsthaṁ kārayādya tapōdhana |
śrīyaśōrājyalābhāya vadhvā saha yatavratam || 2 ||
tathēti ca sa rājānamuktvā vēdavidāṁ varaḥ |
svayaṁ vasiṣṭhō bhagavānyayau rāmanivēśanam || 3 ||
upavāsayituṁ rāmaṁ mantravanmantrakōvidaḥ |
brāhmaṁ rathavaraṁ yuktamāsthāya sudr̥ḍhavrataḥ || 4 ||
sa rāmabhavanaṁ prāpya pāṇḍurābhraghanaprabham |
tisraḥ kakṣyā rathēnaiva vivēśa munisattamaḥ || 5 ||
tamāgatamr̥ṣiṁ rāmastvaranniva sasambhramaḥ |
mānayiṣyansa mānārhaṁ niścakrāma nivēśanāt || 6 ||
abhyētya tvaramāṇaśca rathābhyāśaṁ manīṣiṇaḥ |
tatō:’vatārayāmāsa parigr̥hya rathātsvayam || 7 ||
sa cainaṁ praśritaṁ dr̥ṣṭvā sambhāṣyābhiprasādya ca |
priyārhaṁ harṣayanrāmamityuvāca purōhitaḥ || 8 ||
prasannastē pitā rāma yauvarājyamavāpsyasi |
upavāsaṁ bhavānadya karōtu saha sītayā || 9 ||
prātastvāmabhiṣēktā hi yauvarājyē narādhipaḥ |
pitā daśarathaḥ prītyā yayātiṁ nahuṣō yathā || 10 ||
ityuktvā sa tadā rāmamupavāsaṁ yatavratam |
mantravitkārayāmāsa vaidēhyā sahitaṁ muniḥ || 11 ||
tatō yathāvadrāmēṇa sa rājñō gururarcitaḥ |
abhyanujñāpya kākutsthaṁ yayau rāmanivēśanāt || 12 ||
suhr̥dbhistatra rāmō:’pi sukhāsīnaḥ priyaṁvadaiḥ |
sabhājitō vivēśā:’tha tānanujñāpya sarvaśaḥ || 13 ||
prahr̥ṣṭanaranārīkaṁ rāmavēśma tadā babhau | [hr̥ṣṭanārīnarayutaṁ]
yathā mattadvijagaṇaṁ praphullanalinaṁ saraḥ || 14 ||
sa rājabhavanaprakhyāttasmādrāmanivēśanāt |
niḥsr̥tya dadr̥śē mārgaṁ vasiṣṭhō janasaṁvr̥tam || 15 || [nirgatya]
br̥ndabr̥ndairayōdhyāyāṁ rājamārgāḥ samantataḥ |
babhūvurabhisambādhāḥ kutūhalajanairvr̥tāḥ || 16 ||
janabr̥ndōrmisaṅgharṣaharṣasvanavatastadā |
babhūva rājamārgasya sāgarasyēva nisvanaḥ || 17 ||
siktasaṁmr̥ṣṭarathyā ca tadaharvanamālinī |
āsīdayōdhyā nagarī samucchritagr̥hadhvajā || 18 ||
tadā hyayōdhyānilayaḥ sastrībālābalō janaḥ |
rāmābhiṣēkamākāṅkṣannākāṅkṣadudayaṁ ravēḥ || 19 ||
prajālaṅkārabhūtaṁ ca janasyānandavardhanam |
utsukō:’bhūjjanō draṣṭuṁ tamayōdhyāmahōtsavam || 20 ||
ēvaṁ taṁ janasambādhaṁ rājamārgaṁ purōhitaḥ |
vyūhanniva janaughaṁ taṁ śanai rājakulaṁ yayau || 21 ||
sitābhraśikharaprakhyaṁ prāsādamadhiruhya saḥ |
samīyāya narēndrēṇa śakrēṇēva br̥haspatiḥ || 22 ||
tamāgatamabhiprēkṣya hitvā rājāsanaṁ nr̥paḥ |
papraccha sa ca tasmai tatkr̥tamityabhyavēdayat || 23 ||
tēna caiva tadā tulyaṁ sahāsīnāḥ sabhāsadaḥ |
āsanēbhyaḥ samuttasthuḥ pūjayantaḥ purōhitam || 24 ||
guruṇā tvabhyanujñātō manujaughaṁ visr̥jya tam |
vivēśāntaḥpuraṁ rājā siṁhō giriguhāmiva || 25 ||
tadagryarūpaṁ pramadājanākulaṁ [gaṇākulaṁ]
mahēndravēśmapratimaṁ nivēśanam |
vidīpayaṁścāru vivēśa pārthivaḥ
śaśīva tārāgaṇasaṅkulaṁ nabhaḥ || 26 ||
ityārṣē śrīmadrāmāyaṇē vālmīkīyē ādikāvyē ayōdhyākāṇḍē pañcamaḥ sargaḥ || 5 ||
ayōdhyākāṇḍa ṣaṣṭhaḥ sargaḥ (6) >>
See more śrī rāma stōtrāṇi for chanting.
See more vālmīki rāmāyaṇam for chanting.
See vālmīki rāmāyaṇē ayōdhyakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
