Read in తెలుగు / ಕನ್ನಡ / தமிழ் / देवनागरी / English (IAST)
|| sumitrāśvāsanam ||
vilapantīṁ tathā tāṁ tu kausalyāṁ pramadōttamām |
idaṁ dharmē sthitā dharmyaṁ sumitrā vākyamabravīt || 1 ||
tavāryē sadguṇairyuktaḥ sa putraḥ puruṣōttamaḥ |
kiṁ tē vilapitēnaivaṁ kr̥paṇaṁ ruditēna vā || 2 ||
yastavāryē gataḥ putrastyaktvā rājyaṁ mahābalaḥ |
sādhu kurvanmahātmānaṁ pitaraṁ satyavādinām || 3 ||
śiṣṭairācaritē samyakchaśvatprētya phalōdayē |
rāmō dharmē sthitaḥ śrēṣṭhō na sa śōcyaḥ kadācana || 4 ||
vartatē cōttamāṁ vr̥ttiṁ lakṣmaṇō:’sminsadā:’naghaḥ |
dayāvānsarvabhūtēṣu lābhastasya mahātmanaḥ || 5 ||
araṇyavāsē yadduḥkhaṁ jānatī vai sukhōcitā |
anugacchati vaidēhī dharmātmānaṁ tavātmajam || 6 ||
kīrtibhūtāṁ patākāṁ yō lōkē bhrāmayati prabhuḥ |
darmasatyavratadhanaḥ kiṁ na prāptastavātmajaḥ || 7 ||
vyaktaṁ rāmasya vijñāya śaucaṁ māhātmyamuttamam |
na gātramaṁśubhiḥ sūryaḥ santāpayitumarhati || 8 ||
śivaḥ sarvēṣu kālēṣu kānanēbhyō vinissr̥taḥ |
rāghavaṁ yuktaśītōṣṇaḥ sēviṣyati sukhō:’nilaḥ || 9 ||
śayānamanaghaṁ rātrau pitēvābhipariṣvajan |
raśmibhiḥ saṁspr̥śanśītaiḥ candramāhlādayiṣyati || 10 ||
dadau cāstrāṇi divyāni yasmai brahmā mahaujasē |
dānavēndraṁ hataṁ dr̥ṣṭvā timidhvajasutaṁ raṇē || 11 ||
sa śūraḥ puruṣavyāghraḥ svabāhubalamāśritaḥ |
asantrastōpyaraṇyasthō vēśmanīva nivatsyati || 12 ||
yasyēṣupadamāsādya vināśaṁ yānti śatravaḥ |
kathaṁ na pr̥thivī tasya śāsanē sthātumarhati || 13 ||
yā śrīḥ śauryaṁ ca rāmasya yā ca kalyāṇasattvatā |
nivr̥ttāraṇyavāsaḥ sa kṣipraṁ rājyamavāpsyati || 14 ||
sūryasyāpi bhavētsūryō hyagnēragniḥ prabhōḥ prabhuḥ |
śriyaḥ śrīśca bhavēdagryā kīrtiḥ kīrtyāḥ kṣamākṣamā || 15 ||
daivataṁ daivatānāṁ ca bhūtānāṁ bhūtasattamaḥ |
tasya kē hyaguṇā dēvi rāṣṭrē vā:’pyathavā purē || 16 ||
pr̥thivyā saha vaidēhyā śriyā ca puruṣarṣabhaḥ |
kṣipraṁ tisr̥bhirētābhiḥ saha rāmō:’bhiṣēkṣyatē || 17 ||
duḥkhajaṁ visr̥jantyāsraṁ niṣkrāmantamudīkṣya yam |
ayōdhyāyāṁ janāḥ sarvē śōkavēgasamāhatāḥ || 18 ||
kuśacīradharaṁ dēvaṁ gacchantamaparājitam |
sītēvānugatā lakṣmīstasya kiṁnāma durlabham || 19 ||
dhanurgrahavarō yasya bāṇakhaḍgāstrabhr̥tsvayam |
lakṣmaṇō vrajati hyagrē tasya kiṁnāma durlabham || 20 ||
nivr̥ttavanavāsaṁ taṁ draṣṭāsi punarāgatam |
jahi śōkaṁ ca mōhaṁ ca dēvi satyaṁ bravīmi tē || 21 ||
śirasā caraṇāvētau vandamānamaninditē |
punardrakṣyasi kalyāṇi putraṁ candramivōditam || 22 ||
punaḥ praviṣṭaṁ dr̥ṣṭvā tamabhiṣiktaṁ mahāśriyam |
samutsrakṣyasi nētrābhyāṁ kṣipramānandajaṁ payaḥ || 23 ||
mā śōkō dēvi duḥkhaṁ vā na rāmē dr̥śyatē:’śivam |
kṣipraṁ drakṣyasi putraṁ tvaṁ sasītaṁ sahalakṣmaṇam || 24 ||
tvayā:’śēṣō janaścaiva samāśvāsyō yadā:’naghē |
kimidānīmimaṁ dēvi karōṣi hr̥di viklabam || 25 ||
nārhā tvaṁ śōcituṁ dēvi yasyāstē rāghavaḥ sutaḥ |
na hi rāmātparō lōkē vidyatē satpathē sthitaḥ || 26 ||
abhivādayamānaṁ taṁ dr̥ṣṭvā sasuhr̥daṁ sutam |
mudā:’śru mōkṣyasē kṣipraṁ mēghalēkhēva vārṣikī || 27 ||
putrastē varadaḥ kṣipramayōdhyāṁ punarāgataḥ |
pāṇibhyāṁ mr̥dupīnābhyāṁ caraṇau pīḍayiṣyati || 28 ||
abhivādya namasyantaṁ śūraṁ sasuhr̥daṁ sutam |
mudā:’straiḥ prōkṣyasi punarmēgharājirivācalam || 29 ||
āśvāsayantī vividhaiśca vākyaiḥ
vākyōpacārē kuśalā:’navadyā |
rāmasya tāṁ mātaramēvamuktvā
dēvī sumitrā virarāma rāmā || 30 ||
niśamya tallakṣmaṇa mātr̥vākyam
rāmasya māturnaradēvapatnyāḥ |
sadyaḥ śarīrē vinanāśa śōkaḥ
śaradgataḥ mēgha ivālpatōyaḥ || 31 ||
ityārṣē śrīmadrāmāyaṇē vālmīkīyē ādikāvyē ayōdhyākāṇḍē catuścatvāriṁśaḥ sargaḥ || 44 ||
ayōdhyākāṇḍa pañcacatvāriṁśaḥ sargaḥ (45) >>
See more śrī rāma stōtrāṇi for chanting.
See more vālmīki rāmāyaṇam for chanting.
See vālmīki rāmāyaṇē ayōdhyakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
