Read in తెలుగు / ಕನ್ನಡ / தமிழ் / देवनागरी / English (IAST)
|| aucityaprabōdhanam ||
taṁ tathā śōkasantaptaṁ vilapantamanāthavat |
mōhēna mahatā:’:’viṣṭaṁ paridyūnamacētanam || 1 ||
tataḥ saumitrirāśvāsya muhūrtādiva lakṣmaṇaḥ |
rāmaṁ sambōdhayāmāsa caraṇau cābhipīḍayan || 2 ||
mahatā tapasā rāma mahatā cāpi karmaṇā |
rājñā daśarathēnāsi labdhō:’mr̥tamivāmaraiḥ || 3 ||
tava caiva guṇairbaddhastvadviyōgānmahīpatiḥ |
rājā dēvatvamāpannō bharatasya yathā śrutam || 4 ||
yadi duḥkhamidaṁ prāptaṁ kākutstha na sahiṣyasē |
prākr̥taścālpasattvaśca itaraḥ kaḥ sahiṣyati || 5 ||
duḥkhitō hi bhavām̐llōkāntējasā yadi dhakṣyatē |
ārtāḥ prajā naravyāghra kva nu yāsyanti nirvr̥tim || 6 ||
āśvāsihi naraśrēṣṭha prāṇinaḥ kasya nāpadaḥ |
saṁspr̥śa tvagnivadrājan kṣaṇēna vyapayānti ca || 7 ||
lōkasvabhāva ēvaiṣa yayātirnahuṣātmajaḥ |
gataḥ śakrēṇa sālōkyamanayastaṁ tamaḥ spr̥śat || 8 ||
mahārṣiryō vasiṣṭhastu yaḥ piturnaḥ purōhitaḥ |
ahnā putraśataṁ jajñē tathaivāsya punarhatam || 9 ||
yā cēyaṁ jagatāṁ mātā dēvī lōkanamaskr̥tā |
asyāśca calanaṁ bhūmērdr̥śyatē satyasaṁśrava || 10 || [kōsalēśvara]
yau dharmau jagatāṁ nētrau yatra sarvaṁ pratiṣṭhitam |
ādityacandrau grahaṇamabhyupētau mahābalau || 11 ||
sumahāntyapi bhūtāni dēvāśca puruṣarṣabha |
na daivasya pramuñcanti sarvabhūtādidēhinaḥ || 12 ||
śakrādiṣvapi dēvēṣu vartamānau nayānayī |
śrūyētē naraśārdūla na tvaṁ śōcitumarhasi || 13 ||
naṣṭāyāmapi vaidēhyāṁ hr̥tāyāmapi cānagha | [rāghava]
śōcituṁ nārhasē vīra yathānyaḥ prākr̥tastathā || 14 ||
tvadvidhā na hi śōcanti satataṁ satyadarśinaḥ |
sumahatsvapi kr̥cchrēṣu rāmānirviṇṇadarśanāḥ || 15 ||
tattvatō hi naraśrēṣṭha buddhyā samanucintaya |
buddhyā yuktā mahāprājñā vijānanti śubhāśubhē || 16 ||
adr̥ṣṭaguṇadōṣāṇāmadhruvāṇāṁ tu karmaṇām |
nāntarēṇa kriyāṁ tēṣāṁ phalamiṣṭaṁ pravartatē || 17 ||
tvamēva hi purā rāma māmēvaṁ bahuśō:’nvaśāḥ |
anuśiṣyāddhi kō nu tvāmapi sākṣādbr̥haspatiḥ || 18 ||
buddhiśca tē mahāprājña dēvairapi duranvayā |
śōkēnābhiprasuptaṁ tē jñānaṁ sambōdhayāmyaham || 19 ||
divyaṁ ca mānuṣaṁ ca tvamātmanaśca parākramam |
ikṣvākuvr̥ṣabhāvēkṣya yatasva dviṣatāṁ vadhē || 20 ||
kiṁ tē sarvavināśēna kr̥tēna puruṣarṣabha |
tamēva tvaṁ ripuṁ pāpaṁ vijñāyōddhartumarhasi || 21 ||
ityārṣē śrīmadrāmāyaṇē vālmīkīyē ādikāvyē araṇyakāṇḍē ṣaṭṣaṣṭhitamaḥ sargaḥ || 66 ||
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.