Durga Saptasati Chapter 4 – Sakradi stuti – చతుర్థోఽధ్యాయః (శక్రాదిస్తుతి)


[గమనిక: ఈ అధ్యాయం “శ్రీ దుర్గా స్తోత్రనిధి” పారాయణ గ్రంథములో కూడా ఉన్నది. Click here to buy.]

|| ఓం ||

ఋషిరువాచ || ౧ ||

శక్రాదయః సురగణా నిహతేఽతివీర్యే
తస్మిన్ దురాత్మని సురారిబలే చ దేవ్యా |
తాం తుష్టువుః ప్రణతినమ్రశిరోధరాంసా
వాగ్భిః ప్రహర్షపులకోద్గమచారుదేహాః || ౨ ||

దేవ్యా యయా తతమిదం జగదాత్మశక్త్యా
నిశ్శేషదేవగణశక్తిసమూహమూర్త్యా |
తామంబికామఖిలదేవమహర్షిపూజ్యాం
భక్త్యా నతాః స్మ విదధాతు శుభాని సా నః || ౩ ||

యస్యాః ప్రభావమతులం భగవాననంతో
బ్రహ్మా హరశ్చ న హి వక్తుమలం బలం చ |
సా చండికాఖిలజగత్పరిపాలనాయ
నాశాయ చాశుభభయస్య మతిం కరోతు || ౪ ||

యా శ్రీః స్వయం సుకృతినాం భవనేష్వలక్ష్మీః
పాపాత్మనాం కృతధియాం హృదయేషు బుద్ధిః |
శ్రద్ధా సతాం కులజనప్రభవస్య లజ్జా
తాం త్వాం నతాః స్మ పరిపాలయ దేవి విశ్వమ్ || ౫ ||

కిం వర్ణయామ తవ రూపమచింత్యమేతత్
కిం చాతివీర్యమసురక్షయకారి భూరి |
కిం చాహవేషు చరితాని తవాతి యాని [తవాద్భుతాని]
సర్వేషు దేవ్యసురదేవగణాదికేషు || ౬ ||

హేతుః సమస్తజగతాం త్రిగుణాపి దోషై-
-ర్న జ్ఞాయసే హరిహరాదిభిరప్యపారా |
సర్వాశ్రయాఖిలమిదం జగదంశభూత-
-మవ్యాకృతా హి పరమా ప్రకృతిస్త్వమాద్యా || ౭ ||

యస్యాః సమస్తసురతా సముదీరణేన
తృప్తిం ప్రయాతి సకలేషు మఖేషు దేవి |
స్వాహాసి వై పితృగణస్య చ తృప్తిహేతు-
-రుచ్చార్యసే త్వమత ఏవ జనైః స్వధా చ || ౮ ||

యా ముక్తిహేతురవిచింత్యమహావ్రతా త్వ-
-మభ్యస్యసే సునియతేంద్రియతత్త్వసారైః |
మోక్షార్థిభిర్మునిభిరస్తసమస్తదోషై-
-ర్విద్యాసి సా భగవతీ పరమా హి దేవి || ౯ ||

శబ్దాత్మికా సువిమలర్గ్యజుషాం నిధాన-
-ముద్గీథరమ్యపదపాఠవతాం చ సామ్నామ్ |
దేవి త్రయీ భగవతీ భవభావనాయ
వార్తాసి సర్వజగతాం పరమార్తిహంత్రీ || ౧౦ ||

మేధాసి దేవి విదితాఖిలశాస్త్రసారా
దుర్గాసి దుర్గభవసాగరనౌరసంగా |
శ్రీః కైటభారిహృదయైకకృతాధివాసా
గౌరీ త్వమేవ శశిమౌలికృతప్రతిష్ఠా || ౧౧ ||

ఈషత్సహాసమమలం పరిపూర్ణచంద్ర-
-బింబానుకారి కనకోత్తమకాంతికాంతమ్ |
అత్యద్భుతం ప్రహృతమాత్తరుషా తథాపి
వక్త్రం విలోక్య సహసా మహిషాసురేణ || ౧౨ ||

దృష్ట్వా తు దేవి కుపితం భ్రుకుటీకరాల-
-ముద్యచ్ఛశాంకసదృశచ్ఛవి యన్న సద్యః |
ప్రాణాన్ ముమోచ మహిషస్తదతీవ చిత్రం
కైర్జీవ్యతే హి కుపితాంతకదర్శనేన || ౧౩ ||

దేవి ప్రసీద పరమా భవతీ భవాయ
సద్యో వినాశయసి కోపవతీ కులాని |
విజ్ఞాతమేతదధునైవ యదస్తమేత-
-న్నీతం బలం సువిపులం మహిషాసురస్య || ౧౪ ||

తే సమ్మతా జనపదేషు ధనాని తేషాం
తేషాం యశాంసి న చ సీదతి బంధువర్గః |
ధన్యాస్త ఏవ నిభృతాత్మజభృత్యదారా
యేషాం సదాభ్యుదయదా భవతీ ప్రసన్నా || ౧౫ ||

ధర్మ్యాణి దేవి సకలాని సదైవ కర్మా-
-ణ్యత్యాదృతః ప్రతిదినం సుకృతీ కరోతి |
స్వర్గం ప్రయాతి చ తతో భవతీప్రసాదా-
-ల్లోకత్రయేఽపి ఫలదా నను దేవి తేన || ౧౬ ||

దుర్గే స్మృతా హరసి భీతిమశేషజంతోః
స్వస్థైః స్మృతా మతిమతీవ శుభాం దదాసి |
దారిద్ర్యదుఃఖభయహారిణి కా త్వదన్యా
సర్వోపకారకరణాయ సదాఽఽర్ద్రచిత్తా || ౧౭ ||

ఏభిర్హతైర్జగదుపైతి సుఖం తథైతే
కుర్వంతు నామ నరకాయ చిరాయ పాపమ్ |
సంగ్రామమృత్యుమధిగమ్య దివం ప్రయాంతు
మత్వేతి నూనమహితాన్ వినిహంసి దేవి || ౧౮ ||

దృష్ట్వైవ కిం న భవతీ ప్రకరోతి భస్మ
సర్వాసురానరిషు యత్ప్రహిణోషి శస్త్రమ్ |
లోకాన్ ప్రయాంతు రిపవోఽపి హి శస్త్రపూతా
ఇత్థం మతిర్భవతి తేష్వహితేషు సాధ్వీ || ౧౯ ||

ఖడ్గప్రభానికరవిస్ఫురణైస్తథోగ్రైః
శూలాగ్రకాంతినివహేన దృశోఽసురాణామ్ |
యన్నాగతా విలయమంశుమదిందుఖండ-
-యోగ్యాననం తవ విలోకయతాం తదేతత్ || ౨౦ ||

దుర్వృత్తవృత్తశమనం తవ దేవి శీలం
రూపం తథైతదవిచింత్యమతుల్యమన్యైః |
వీర్యం చ హంతృ హృతదేవపరాక్రమాణాం
వైరిష్వపి ప్రకటితైవ దయా త్వయేత్థమ్ || ౨౧ ||

కేనోపమా భవతు తేఽస్య పరాక్రమస్య
రూపం చ శత్రుభయకార్యతిహారి కుత్ర |
చిత్తే కృపా సమరనిష్ఠురతా చ దృష్టా
త్వయ్యేవ దేవి వరదే భువనత్రయేఽపి || ౨౨ ||

త్రైలోక్యమేతదఖిలం రిపునాశనేన
త్రాతం త్వయా సమరమూర్ధని తేఽపి హత్వా |
నీతా దివం రిపుగణా భయమప్యపాస్త-
-మస్మాకమున్మదసురారిభవం నమస్తే || ౨౩ ||

శూలేన పాహి నో దేవి పాహి ఖడ్గేన చాంబికే |
ఘంటాస్వనేన నః పాహి చాపజ్యానిఃస్వనేన చ || ౨౪ ||

ప్రాచ్యాం రక్ష ప్రతీచ్యాం చ చండికే రక్ష దక్షిణే |
భ్రామణేనాత్మశూలస్య ఉత్తరస్యాం తథేశ్వరి || ౨౫ ||

సౌమ్యాని యాని రూపాణి త్రైలోక్యే విచరంతి తే |
యాని చాత్యంతఘోరాణి తై రక్షాస్మాంస్తథా భువమ్ || ౨౬ ||

ఖడ్గశూలగదాదీని యాని చాస్త్రాణి తేఽంబికే |
కరపల్లవసంగీని తైరస్మాన్ రక్ష సర్వతః || ౨౭ ||

ఋషిరువాచ || ౨౮ ||

ఏవం స్తుతా సురైర్దివ్యైః కుసుమైర్నందనోద్భవైః |
అర్చితా జగతాం ధాత్రీ తథా గంధానులేపనైః || ౨౯ ||

భక్త్యా సమస్తైస్త్రిదశైర్దివ్యైర్ధూపైః సుధూపితా |
ప్రాహ ప్రసాదసుముఖీ సమస్తాన్ ప్రణతాన్ సురాన్ || ౩౦ ||

దేవ్యువాచ || ౩౧ ||

వ్రియతాం త్రిదశాః సర్వే యదస్మత్తోఽభివాంఛితమ్ || ౩౨ ||

దేవా ఊచుః || ౩౩ ||

భగవత్యా కృతం సర్వం న కించిదవశిష్యతే |
యదయం నిహతః శత్రురస్మాకం మహిషాసురః || ౩౪ ||

యది చాపి వరో దేయస్త్వయాస్మాకం మహేశ్వరి |
సంస్మృతా సంస్మృతా త్వం నో హింసేథాః పరమాపదః || ౩౫ ||

యశ్చ మర్త్యః స్తవైరేభిస్త్వాం స్తోష్యత్యమలాననే |
తస్య విత్తర్ధివిభవైర్ధనదారాదిసంపదామ్ || ౩౬ ||

వృద్ధయేఽస్మత్ప్రసన్నా త్వం భవేథాః సర్వదాంబికే || ౩౭ ||

ఋషిరువాచ || ౩౮ ||

ఇతి ప్రసాదితా దేవైర్జగతోఽర్థే తథాఽఽత్మనః |
తథేత్యుక్త్వా భద్రకాలీ బభూవాంతర్హితా నృప || ౩౯ ||

ఇత్యేతత్కథితం భూప సంభూతా సా యథా పురా |
దేవీ దేవశరీరేభ్యో జగత్త్రయహితైషిణీ || ౪౦ ||

పునశ్చ గౌరీదేహాత్ సా సముద్భూతా యథాఽభవత్ |
వధాయ దుష్టదైత్యానాం తథా శుంభనిశుంభయోః || ౪౧ ||

రక్షణాయ చ లోకానాం దేవానాముపకారిణీ |
తచ్ఛృణుష్వ మయాఽఽఖ్యాతం యథావత్కథయామి తే || ౪౨ ||

|| హ్రీం ఓం ||

ఇతి శ్రీమార్కండేయపురాణే సావర్ణికే మన్వంతరే దేవీమాహాత్మ్యే శక్రాదిస్తుతిర్నామ చతుర్థోఽధ్యాయః || ౪ ||

(ఉవాచమంత్రాః – ౫, అర్ధమంత్రాః – ౨, శ్లోకమంత్రాః – ౩౫, ఏవం – ౪౨, ఏవమాదితః – ౨౫౯)

పంచమోఽధ్యాయః (దేవీదూతసంవాదం) >>


గమనిక: పైన ఇవ్వబడిన శ్రీచండీ సప్తశతిలోని అధ్యాయం, ఈ క్రింది పుస్తకములో కూడా ఉన్నది.

శ్రీ దుర్గా స్తోత్రనిధి

(నిత్య పారాయణ గ్రంథము)

Click here to buy


సంపూర్ణ శ్రీ దుర్గా సప్తశతీ చూడండి.


పైరసీ ప్రకటన : నాగేంద్రాస్ న్యూ గొల్లపూడి వీరాస్వామి సన్ మరియు శ్రీఆదిపూడి వెంకటశివసాయిరామ్ గారు కలిసి మా రెండు పుస్తకాలను ("శ్రీ వారాహీ స్తోత్రనిధి" మరియు "శ్రీ శ్యామలా స్తోత్రనిధి") ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.

Did you see any mistake/variation in the content above? Click here to report mistakes and corrections in Stotranidhi content.

Facebook Comments

స్పందించండి

error: Not allowed