Read in తెలుగు / ಕನ್ನಡ / தமிழ் / देवनागरी / English (IAST)
|| మిథిలాప్రస్థానమ్ ||
అథ తాం రజనీం తత్ర కృతార్థౌ రామలక్ష్మణౌ |
ఊషతుర్ముదితౌ వీరౌ ప్రహృష్టేనాంతరాత్మనా || ౧ ||
ప్రభాతాయాం తు శర్వర్యాం కృతపౌర్వాహ్ణికక్రియౌ |
విశ్వామిత్రమృషీంశ్చాన్యాన్ సహితావభిజగ్మతుః || ౨ ||
అభివాద్య మునిశ్రేష్ఠం జ్వలంతమివ పావకమ్ |
ఊచతుర్మధురోదారం వాక్యం మధురభాషిణౌ || ౩ ||
ఇమౌ స్మ మునిశార్దూల కింకరౌ సముపాగతౌ |
ఆజ్ఞాపయ యథేష్టం వై శాసనం కరవావ కిమ్ || ౪ ||
ఏవముక్తాస్తతస్తాభ్యాం సర్వ ఏవ మహర్షయః |
విశ్వామిత్రం పురస్కృత్య రామం వచనమబ్రువన్ || ౫ ||
మైథిలస్య నరశ్రేష్ఠ జనకస్య భవిష్యతి |
యజ్ఞః పరమధర్మిష్ఠస్తస్య యాస్యామహే వయమ్ || ౬ ||
త్వం చైవ నరశార్దూల సహాస్మాభిర్గమిష్యసి |
అద్భుతం చ ధనూరత్నం తత్రైకం ద్రష్టుమర్హసి || ౭ ||
తద్ధి పూర్వం నరశ్రేష్ఠ దత్తం సదసి దైవతైః |
అప్రమేయబలం ఘోరం మఖే పరమభాస్వరమ్ || ౮ ||
నాస్య దేవా న గంధర్వా నాసురా న చ రాక్షసాః |
కర్తుమారోపణం శక్తా న కథంచన మానుషాః || ౯ ||
ధనుషస్తస్య వీర్యం హి జిజ్ఞాసంతో మహీక్షితః |
న శేకురారోపయితుం రాజపుత్రా మహాబలాః || ౧౦ ||
తద్ధనుర్నరశార్దూల మైథిలస్య మహాత్మనః |
తత్ర ద్రక్ష్యసి కాకుత్స్థ యజ్ఞం చాద్భుతదర్శనమ్ || ౧౧ ||
తద్ధి యజ్ఞఫలం తేన మైథిలేనోత్తమం ధనుః |
యాచితం నరశార్దూల సునాభం సర్వదైవతైః || ౧౨ ||
ఆయాగభూతం నృపతేస్తస్య వేశ్మని రాఘవ |
అర్చితం వివిధైర్గంధైర్ధూపైశ్చాగరుగంధిభిః || ౧౩ ||
ఏవముక్త్వా మునివరః ప్రస్థానమకరోత్తదా |
సర్షిసంఘః సకాకుత్స్థ ఆమంత్ర్య వనదేవతాః || ౧౪ ||
స్వస్తి వోఽస్తు గమిష్యామి సిద్ధః సిద్ధాశ్రమాదహమ్ |
ఉత్తరే జాహ్నవీతీరే హిమవంతం శిలోచ్చయమ్ || ౧౫ ||
ప్రదక్షిణం తతః కృత్వా సిద్ధాశ్రమమనుత్తమమ్ |
ఉత్తరాం దిశముద్దిశ్య ప్రస్థాతుముపచక్రమే || ౧౬ ||
తం ప్రయాంతం మునివరమన్వయాదనుసారిణామ్ |
శకటీశతమాత్రం చ ప్రయాతే బ్రహ్మవాదినామ్ || ౧౭ || [ప్రయాణే]
మృగపక్షిగణాశ్చైవ సిద్ధాశ్రమనివాసినః |
అనుజగ్ముర్మహాత్మానం విశ్వామిత్రం మహామునిమ్ || ౧౮ ||
నివర్తయామాస తతః పక్షిసంఘాన్మృగానపి |
తే గత్వా దూరమధ్వానం లంబమానే దివాకరే || ౧౯ ||
వాసం చక్రుర్మునిగణాః శోణకూలే సమాగతాః |
తేఽస్తం గతే దినకరే స్నాత్వా హుతహుతాశనాః || ౨౦ ||
విశ్వామిత్రం పురస్కృత్య నిషేదురమితౌజసః |
రామో హి సహసౌమిత్రిర్మునీంస్తానభిపూజ్య చ || ౨౧ ||
అగ్రతో నిషసాదాథ విశ్వామిత్రస్య ధీమతః |
అథ రామో మహాతేజా విశ్వామిత్రం మహామునిమ్ || ౨౨ ||
పప్రచ్ఛ నరశార్దూలః కౌతూహలసమన్వితః |
భగవన్కోన్వయం దేశః సమృద్ధవనశోభితః || ౨౩ ||
శ్రోతుమిచ్ఛామి భద్రం తే వక్తుమర్హసి తత్త్వతః |
చోదితో రామవాక్యేన కథయామాస సువ్రతః |
తస్య దేశస్య నిఖిలమృషిమధ్యే మహాతపాః || ౨౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాండే ఏకత్రింశః సర్గః || ౩౧ ||
బాలకాండ ద్వాత్రింశః సర్గః (౩౨) >>
సంపూర్ణ వాల్మీకి రామాయణే బాలకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
