Read in తెలుగు / ಕನ್ನಡ / தமிழ் / देवनागरी / English (IAST)
|| సేనానివేశః ||
ఇతి బ్రువాణం సుగ్రీవం రామో ధర్మభృతాం వరః |
బాహుభ్యాం సంపరిష్వజ్య ప్రత్యువాచ కృతాంజలిమ్ || ౧ ||
యదింద్రో వర్షతే వర్షం న తచ్చిత్రం భవేత్క్వచిత్ |
ఆదిత్యో వా సహస్రాంశుః కుర్యాద్వితిమిరం నభః || ౨ ||
చంద్రమా రశ్మిభిః కుర్యాత్పృథివీం సౌమ్య నిర్మలామ్ |
త్వద్విధో వాఽపి మిత్రాణాం ప్రతికుర్యాత్పరంతప || ౩ ||
ఏవం త్వయి న తచ్చిత్రం భవేద్యత్సౌమ్య శోభనమ్ |
జానామ్యహం త్వాం సుగ్రీవ సతతం ప్రియవాదినమ్ || ౪ ||
త్వత్సనాథః సఖే సంఖ్యే జేతాస్మి సకలానరీన్ |
త్వమేవ మే సుహృన్మిత్రం సాహాయ్యం కర్తుమర్హసి || ౫ ||
జహారాత్మవినాశాయ వైదేహీం రాక్షసాధమః |
వంచయిత్వా తు పౌలోమీమనుహ్రాదో యథా శచీమ్ || ౬ ||
న చిరాత్తం హనిష్యామి రావణం నిశితైః శరైః |
పౌలోమ్యాః పితరం దృప్తం శతక్రతురివాహవే || ౭ ||
ఏతస్మిన్నంతరే చైవ రజః సమభివర్తత |
ఉష్ణాం తీవ్రాం సహస్రాంశోశ్ఛాదయద్గగనే ప్రభామ్ || ౮ ||
దిశః పర్యాకులాశ్చాసన్ రజసా తేన మూర్ఛతా |
చచాల చ మహీ సర్వా సశైలవనకాననా || ౯ ||
తతో నగేంద్రసంకాశైస్తీక్ష్ణదంష్ట్రైర్మహాబలైః |
కృత్స్నా సంఛాదితా భూమిరసంఖ్యేయైః ప్లవంగమైః || ౧౦ ||
నిమేషాంతరమాత్రేణ తతస్తైర్హరియూథపైః |
కోటీశతపరీవారైః కామరూపిభిరావృతా || ౧౧ ||
నాదేయైః పార్వతీయైశ్చ సాముద్రైశ్చ మహాబలైః |
హరిభిర్మేఘనిర్హ్రాదైరన్యైశ్చ వనచారిభిః || ౧౨ ||
తరుణాదిత్యవర్ణైశ్చ శశిగౌరైశ్చ వానరైః |
పద్మకేసరవర్ణైశ్చ శ్వేతైర్మేరుకృతాలయైః || ౧౩ ||
కోటీసహస్రైర్దశభిః శ్రీమాన్ పరివృతస్తదా |
వీరః శతవలిర్నామ వానరః ప్రత్యదృశ్యత || ౧౪ ||
తతః కాంచనశైలాభస్తారాయా వీర్యవాన్ పితా |
అనేకైర్దశసాహస్రైః కోటిభిః ప్రత్యదృశ్యత || ౧౫ ||
తథాఽపరేణ కోటీనాం సహస్రేణ సమన్వితః |
పితా రుమాయాః సంప్రాప్తః సుగ్రీవశ్వశురో విభుః || ౧౬ ||
పద్మకేసరసంకాశస్తరుణార్కనిభాననః |
బుద్ధిమాన్ వానరశ్రేష్ఠః సర్వవానరసత్తమః || ౧౭ ||
అనీకైర్బహుసాహస్రైర్వానరాణాం సమన్వితః |
పితా హనుమతః శ్రీమాన్ కేసరీ ప్రత్యదృశ్యత || ౧౮ ||
గోలాంగూలమహారాజో గవాక్షో భీమవిక్రమః |
వృతః కోటిసహస్రేణ వానరాణామదృశ్యత || ౧౯ ||
ఋక్షాణాం భీమవేగానాం ధూమ్రః శత్రునిబర్హణః |
వృతః కోటిసహస్రాభ్యాం ద్వాభ్యాం సమభివర్తత || ౨౦ ||
మహాచలనిభైర్ఘోరైః పనసో నామ యూథపః |
ఆజగామ మహావీర్యస్తిసృభిః కోటిభిర్వృతః || ౨౧ ||
నీలాంజనచయాకారో నీలో నామాథ యూథపః |
అదృశ్యత మహాకాయః కోటిభిర్దశభిర్వృతః || ౨౨ ||
తతః కాంచనశైలాభో గవయో నామ యూథపః |
ఆజగామ మహావీర్యః కోటిభిః పంచభిర్వృతః || ౨౩ ||
దరీముఖశ్చ బలవాన్ యూథపోఽభ్యాయయౌ తదా |
వృతః కోటిసహస్రేణ సుగ్రీవం సముపస్థితః || ౨౪ ||
మైందశ్చ ద్వివిదశ్చోభావశ్విపుత్రౌ మహాబలౌ |
కోటికోటిసహస్రేణ వానరాణామదృశ్యతామ్ || ౨౫ ||
గజశ్చ బలవాన్ వీరః కోటిభిస్తిసృభిర్వృతః |
ఆజగామ మహాతేజాః సుగ్రీవస్య సమీపతః || ౨౬ ||
ఋక్షరాజో మహాతేజా జాంబవాన్నామ నామతః |
కోటిభిర్దశభిః ప్రాప్తః సుగ్రీవస్య వశే స్థితః || ౨౭ ||
రుమణ్వాన్నామ విక్రాంతో వానరో వానరేశ్వరమ్ |
ఆయయౌ బలవాంస్తూర్ణం కోటీశతసమావృతః || ౨౮ ||
తతః కోటిసహస్రాణాం సహస్రేణ శతేన చ |
పృష్ఠతోఽనుగతః ప్రాప్తో హరిభిర్గంధమాదనః || ౨౯ ||
తతః పద్మసహస్రేణ వృతః శంకుశతేన చ |
యువరాజోఽంగదః ప్రాప్తః పితృతుల్యపరాక్రమః || ౩౦ ||
తతస్తారాద్యుతిస్తారో హరిర్భీమపరాక్రమః |
పంచభిర్హరికోటిభిర్దూరతః ప్రత్యదృశ్యత || ౩౧ ||
ఇంద్రజానుః కపిర్వీరో యూథపః ప్రత్యదృశ్యత |
ఏకాదశానాం కోటీనామీశ్వరస్తైశ్చ సంవృతః || ౩౨ ||
తతో రంభస్త్వనుప్రాప్తస్తరుణాదిత్యసన్నిభః |
అయుతేనావృతశ్చైవ సహస్రేణ శతేన చ || ౩౩ ||
తతో యూథపతిర్వీరో దుర్ముఖో నామ వానరః |
ప్రత్యదృశ్యత కోటిభ్యాం ద్వాభ్యాం పరివృతో బలీ || ౩౪ ||
కైలాసశిఖరాకారైర్వానరైర్భీమవిక్రమైః |
వృతః కోటిసహస్రేణ హనుమాన్ ప్రత్యదృశ్యత || ౩౫ ||
నలశ్చాపి మహావీర్యః సంవృతో ద్రుమవాసిభిః |
కోటీశతేన సంప్రాప్తః సహస్రేణ శతేన చ || ౩౬ ||
తతో దధిముఖః శ్రీమాన్ కోటిభిర్దశభిర్వృతః |
సంప్రాప్తోఽభిమతస్తస్య సుగ్రీవస్య మహాత్మనః || ౩౭ ||
శరభః కుముదో వహ్నిర్వానరో రంహ ఏవ చ |
ఏతే చాన్యే చ బహవో వానరాః కామరూపిణః || ౩౮ ||
ఆవృత్య పృథివీం సర్వాం పర్వాతాంశ్చ వనాని చ |
యూథపాః సమనుప్రాప్తాస్తేషాం సంఖ్యా న విద్యతే || ౩౯ ||
ఆగతాశ్చ విశిష్టాశ్చ పృథివ్యాం సర్వవానరాః |
ఆప్లవంతః ప్లవంతశ్చ గర్జంతశ్చ ప్లవంగమాః || ౪౦ ||
అభ్యవర్తంత సుగ్రీవం సూర్యమభ్రగణా ఇవ |
కుర్వాణా బహుశబ్దాంశ్చ ప్రహృష్టా బాహుశాలినః || ౪౧ ||
శిరోభిర్వానరేంద్రాయ సుగ్రీవస్య న్యవేదయన్ |
అపరే వానరశ్రేష్ఠాః సంయమ్య చ యథోచితమ్ || ౪౨ ||
సుగ్రీవేణ సమాగమ్య స్థితాః ప్రాంజలయస్తదా |
సుగ్రీవస్త్వరితో రామే సర్వాంస్తాన్ వానరర్షభాన్ |
నివేదయిత్వా ధర్మజ్ఞః స్థితః ప్రాంజలిరబ్రవీత్ || ౪౩ ||
యథాసుఖం పర్వతనిర్ఝరేషు
వనేషు సర్వేషు చ వానరేంద్రాః |
నివేశయిత్వా విధివద్బలాని
బలం బలజ్ఞః ప్రతిపత్తుమీష్టే || ౪౪ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ఏకోనచత్వారింశః సర్గః || ౩౯ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
