Read in తెలుగు / ಕನ್ನಡ / தமிழ் / देवनागरी / English (IAST)
|| śubhāśubhanimittadarśanam ||
sa rathaṁ sārathirhr̥ṣṭaḥ parasainyapradharṣaṇam |
gandharvanagarākāraṁ samucchritapatākinam || 1 ||
yuktaṁ paramasampannairvājibhirhēmamālibhiḥ |
yuddhōpakaraṇaiḥ pūrṇaṁ patākādhvajamālinam || 2 ||
grasantamiva cākāśaṁ nādayantaṁ vasundharām |
praṇāśaṁ parasainyānāṁ svasainyānāṁ praharṣaṇam || 3 ||
rāvaṇasya rathaṁ kṣipraṁ cōdayāmāsa sārathiḥ |
tamāpatantaṁ sahasā svanavantaṁ mahāsvanam || 4 ||
rathaṁ rākṣasarājasya nararājō dadarśa ha |
kr̥ṣṇavājisamāyuktaṁ yuktaṁ raudrēṇa varcasā || 5 ||
taḍitpatākāgahanaṁ darśitēndrāyudhāyudham |
śaradhārā vimuñcantaṁ dhārāsāramivāmbudam || 6 ||
taṁ dr̥ṣṭvā mēghasaṅkāśamāpatantaṁ rathaṁ ripōḥ |
girairvajrābhimr̥ṣṭasya dīryataḥ sadr̥śasvanam || 7 ||
visphārayanvai vēgēna bālacandranataṁ dhanuḥ |
uvāca mātaliṁ rāmaḥ sahasrākṣasya sārathim || 8 ||
mātalē paśya saṁrabdhamāpatantaṁ rathaṁ ripōḥ |
yathāpasavyaṁ patatā vēgēna mahatā punaḥ || 9 ||
samarē hantumātmānaṁ tathā tēna kr̥tā matiḥ |
tadapramādamātiṣṭhanpratyudgaccha rathaṁ ripōḥ || 10 ||
vidhvaṁsayitumicchāmi vāyurmēghamivōtthitam |
aviklavamasambhrāntamavyagrahr̥dayēkṣaṇam || 11 ||
raśmisañcāraniyataṁ pracōdaya rathaṁ drutam |
kāmaṁ na tvaṁ samādhēyaḥ purandararathōcitaḥ || 12 ||
yuyutsurahamēkāgraḥ smārayē tvāṁ na śikṣayē |
parituṣṭaḥ sa rāmasya tēna vākyēna mātaliḥ || 13 ||
pracōdayāmāsa rathaṁ surasārathisattamaḥ |
apasavyaṁ tataḥ kurvanrāvaṇasya mahāratham || 14 ||
cakrōtkṣiptēna rajasā rāvaṇaṁ vyavadhānayat |
tataḥ kruddhō daśagrīvastāmravisphāritēkṣaṇaḥ || 15 ||
rathapratimukhaṁ rāmaṁ sāyakairavadhūnayat |
dharṣaṇāmarṣitō rāmō dhairyaṁ rōṣēṇa lambhayan || 16 ||
jagrāha sumahāvēgamaindraṁ yudhi śarāsanam |
śarāṁśca sumahātējāḥ sūryaraśmisamaprabhān || 17 ||
tadōpōḍhaṁ mahadyuddhamanyōnyavadhakāṅkṣiṇōḥ |
parasparābhimukhayōrdr̥ptayōriva siṁhayōḥ || 18 ||
tatō dēvāḥ sagandharvāḥ siddhāśca paramarṣayaḥ |
samēyurdvairathaṁ dr̥ṣṭuṁ rāvaṇakṣayakāṅkṣiṇaḥ || 19 ||
samutpēturathōtpātā dāruṇā rōmaharṣaṇāḥ |
rāvaṇasya vināśāya rāghavasya jayāya ca || 20 ||
vavarṣa rudhiraṁ dēvō rāvaṇasya rathōpari |
vātā maṇḍalinastīkṣṇā hyapasavyaṁ pracakramuḥ || 21 ||
mahadgr̥dhrakulaṁ cāsya bhramamāṇaṁ nabhaḥsthalē |
yēnayēna rathō yāti tēnatēna pradhāvati || 22 ||
sandhyayā cāvr̥tā laṅkā japāpuṣpanikāśayā |
dr̥śyatē sampradīptēva divasē:’pi vasundharā || 23 ||
sanirghātā mahōlkāśca sampracērurmahāsvanāḥ |
viṣādayaṁstē rakṣāṁsi rāvaṇasya tadā:’hitāḥ || 24 ||
rāvaṇaśca yatastatra sañcacāla vasundharā |
rakṣasāṁ ca praharatāṁ gr̥hītā iva bāhavaḥ || 25 ||
tāmrāḥ pītāḥ sitāḥ śvētāḥ patitāḥ sūryaraśmayaḥ |
dr̥śyantē rāvaṇasyāṅgē parvatasyēva dhātavaḥ || 26 ||
gr̥dhrairanugatāścāsya vamantyō jvalanaṁ mukhaiḥ |
praṇēdurmukhamīkṣantyaḥ saṁrabdhamaśivaṁ śivāḥ || 27 ||
pratikūlaṁ vavau vāyū raṇē pāṁsūnsamākiran |
tasya rākṣasarājasya kurvandr̥ṣṭivilōpanam || 28 ||
nipēturindrāśanayaḥ sainyē cāsya samantataḥ |
durviṣahyasvanā ghōrā vinā jaladharasvanam || 29 ||
diśaśca pradiśaḥ sarvā babhūvustimirāvr̥tāḥ |
pāṁsuvarṣēṇa mahatā durdarśaṁ ca nabhō:’bhavat || 30 ||
kurvantyaḥ kalahaṁ ghōraṁ śārikāstadrathaṁ prati |
nipētuḥ śataśastatra dāruṇaṁ dāruṇārutāḥ || 31 ||
jaghanēbhyaḥ sphuliṅgāṁśca nētrēbhyō:’śrūṇi santatam |
mumucustasya turagāstulyamagniṁ ca vāri ca || 32 ||
ēvaṁ-prakārā bahavaḥ samutpātā bhayāvahāḥ |
rāvaṇasya vināśāya dāruṇāḥ samprajajñirē || 33 ||
rāmasyāpi nimittāni saumyāni ca śubhāni ca |
babhūvurjayaśaṁsīni prādurbhūtāni sarvaśaḥ || 34 ||
nimittāni ca saumyāni rāghavaḥ svajayāya ca |
dr̥ṣṭvā paramasaṁhr̥ṣṭō hataṁ mēnē ca rāvaṇam || 35 ||
tatō nirīkṣyātmagatāni rāghavō
raṇē nimittāni nimittakōvidaḥ |
jagāma harṣaṁ ca parāṁ ca nirvr̥ttiṁ
cakāra yuddhē hyadhikaṁ ca vikramam || 36 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē aṣṭōttaraśatatamaḥ sargaḥ || 108 ||
yuddhakāṇḍa navōttaraśatatamaḥ sargaḥ (109) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
