Read in తెలుగు / ಕನ್ನಡ / தமிழ் / देवनागरी / English (IAST)
|| మాయాసీతావధః ||
విజ్ఞాయ తు మనస్తస్య రాఘవస్య మహాత్మనః |
సన్నివృత్యాహవాత్తస్మాత్సంవివేశ పురం తతః || ౧ ||
సోఽనుస్మృత్య వధం తేషాం రాక్షసానాం తరస్వినామ్ |
క్రోధతామ్రేక్షణః శూరో నిర్జగామ మహాద్యుతిః || ౨ ||
స పశ్చిమేన ద్వారేణ నిర్యయౌ రాక్షసైర్వృతః |
ఇంద్రజిత్తు మహావీర్యః పౌలస్త్యో దేవకంటకః || ౩ ||
ఇంద్రజిత్తు తతో దృష్ట్వా భ్రాతరౌ రామలక్ష్మణౌ |
రణాయాభ్యుద్యతౌ వీరౌ మాయాం ప్రాదుష్కరోత్తదా || ౪ ||
ఇంద్రజిత్తు రథే స్థాప్య సీతాం మాయామయీం తతః |
బలేన మహతావృత్య తస్యా వధమరోచయత్ || ౫ ||
మోహనార్థం తు సర్వేషాం బుద్ధిం కృత్వా సుదుర్మతిః |
హంతుం సీతాం వ్యవసితో వానరాభిముఖో యయౌ || ౬ ||
తం దృష్ట్వా త్వభినిర్యాంతం నగర్యాః కాననౌకసః |
ఉత్పేతురభిసంక్రుద్ధాః శిలాహస్తా యుయుత్సవః || ౭ ||
హనుమాన్పురతస్తేషాం జగామ కపికుంజరః |
ప్రగృహ్య సుమహచ్ఛృంగం పర్వతస్య దురాసదమ్ || ౮ ||
స దదర్శ హతానందాం సీతామింద్రజితో రథే |
ఏకవేణీధరాం దీనాముపవాసకృశాననామ్ || ౯ ||
పరిక్లిష్టైకవసనామమృజాం రాఘవప్రియామ్ |
రజోమలాభ్యామాలిప్తైః సర్వగాత్రైర్వరస్త్రియమ్ || ౧౦ ||
తాం నిరీక్ష్య ముహూర్తం తు మైథిలీత్యధ్యవస్య తు |
బభూవాచిరదృష్టా హి తేన సా జనకాత్మజా || ౧౧ ||
తాం దీనాం మలదిగ్ధాంగీం రథస్థాం దృశ్య మైథిలీమ్ |
బాష్పపర్యాకులముఖో హనుమాన్వ్యథితోఽభవత్ || ౧౨ ||
అబ్రవీత్తాం తు శోకార్తాం నిరానందాం తపస్వినీమ్ |
సీతాం రథస్థితాం దృష్ట్వా రాక్షసేంద్రసుతాశ్రితామ్ || ౧౩ ||
కిం సమర్థితమస్యేతి చింతయన్స మహాకపిః |
సహ తైర్వానరశ్రేష్ఠైరభ్యధావత రావణిమ్ || ౧౪ ||
తద్వానరబలం దృష్ట్వా రావణిః క్రోధమూర్ఛితః |
కృత్వా వికోశం నిస్త్రింశం మూర్ధ్ని సీతాం పరామృశత్ || ౧౫ ||
తాం స్త్రియం పశ్యతాం తేషాం తాడయామాస రావణిః |
క్రోశంతీం రామ రామేతి మాయయా యోజితాం రథే || ౧౬ ||
గృహీతమూర్ధజాం దృష్ట్వా హనుమాన్దైన్యమాగతః |
శోకజం వారి నైత్రాభ్యామసృజన్మారుతాత్మజః || ౧౭ ||
తాం దృష్ట్వా చారుసర్వాంగీం రామస్య మహిషీం ప్రియామ్ |
అబ్రవీత్పరుషం వాక్యం క్రోధాద్రక్షోధిపాత్మజమ్ || ౧౮ ||
దురాత్మన్నాత్మనాశాయ కేశపక్షే పరామృశః |
బ్రహ్మర్షీణాం కులే జాతో రాక్షసీం యోనిమాశ్రితః || ౧౯ ||
ధిక్త్వాం పాపసమాచారం యస్య తే మతిరీదృశీ |
నృశంసానార్య దుర్వృత్త క్షుద్ర పాపపరాక్రమ || ౨౦ ||
అనార్యస్యేదృశం కర్మ ఘృణా తే నాస్తి నిర్ఘృణ |
చ్యుతా గృహాచ్చ రాజ్యాచ్చ రామహస్తాచ్చ మైథిలీ || ౨౧ ||
కిం తవైషాపరాద్ధా హి యదేనాం హంతుమిచ్ఛసి |
సీతాం చ హత్వా న చిరం జీవిష్యసి కథంచన || ౨౨ ||
వధార్హకర్మణాఽనేన మమ హస్తగతో హ్యసి |
యే చ స్త్రీఘాతినాం లోకా లోకవధ్యేషు కుత్సితాః || ౨౩ ||
ఇహ జీవితముత్సృజ్య ప్రేత్య తాన్ప్రతిపత్స్యసే |
ఇతి బ్రువాణో హనుమాన్సాయుధైర్హరిభిర్వృతః || ౨౪ ||
అభ్యధావత సంక్రుద్ధో రాక్షసేంద్రసుతం ప్రతి |
ఆపతంతం మహావీర్యం తదనీకం వనౌకసామ్ || ౨౫ ||
రక్షసాం భీమవేగానామనీకం తు న్యవారయత్ |
స తాం బాణసహస్రేణ విక్షోభ్య హరివాహినీమ్ || ౨౬ ||
హరిశ్రేష్ఠం హనూమంతమింద్రజిత్ప్రత్యువాచ హ |
సుగ్రీవస్త్వం చ రామశ్చ యన్నిమిత్తమిహాగతాః || ౨౭ ||
తాం హనిష్యామి వైదేహీమద్యైవ తవ పశ్యతః |
ఇమాం హత్వా తతో రామం లక్ష్మణం త్వాం చ వానర || ౨౮ ||
సుగ్రీవం చ వధిష్యామి తం చానార్యం విభీషణమ్ |
న హంతవ్యాః స్త్రియశ్చేతి యద్బ్రవీషి ప్లవంగమ || ౨౯ ||
పీడాకరమమిత్రాణాం యత్స్యాత్కర్తవ్యమేవ తత్ |
తమేవముక్త్వా రుదతీం సీతాం మాయామయీం తదా || ౩౦ ||
శితధారేణ ఖడ్గేన నిజఘానేంద్రజిత్స్వయమ్ |
యజ్ఞోపవీతమార్గేణ భిన్నా తేన తపస్వినీ || ౩౧ ||
సా పృథివ్యాం పృథుశ్రోణీ పపాత ప్రియదర్శనా |
తామింద్రజిత్స్వయం హత్వా హనుమంతమువాచ హ || ౩౨ ||
మయా రామస్య పశ్యేమాం కోపేన చ నిషూదితామ్ |
ఏషా విశస్తా వైదేహీ విఫలో వః పరిశ్రమః || ౩౩ ||
తతః ఖడ్గేన మహతా హత్వా తామింద్రిజిత్స్వయమ్ |
హృష్టః స రథమాస్థాయ విననాద మహాస్వనమ్ || ౩౪ ||
వానరాః శుశ్రువుః శబ్దమదూరే ప్రత్యవస్థితాః |
వ్యాదితాస్యస్య నదతస్తద్దుర్గం సంశ్రితస్య చ || ౩౫ ||
తథా తు సీతాం వినిహత్య దుర్మతిః
ప్రహృష్టచేతాః స బభూవ రావణిః |
తం హృష్టరూపం సముదీక్ష్య వానరా
విషణ్ణరూపాః సహసా ప్రదుద్రువుః || ౩౬ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే ఏకాశీతితమః సర్గః || ౮౧ ||
యుద్ధకాండ ద్వ్యశీతతమః సర్గః (౮౨) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
