Read in తెలుగు / ಕನ್ನಡ / தமிழ் / देवनागरी / English (IAST)
|| ద్వంద్వయుద్ధమ్ ||
యుద్ధ్యతాం తు తతస్తేషాం వానరాణాం మహాత్మనామ్ |
రక్షసాం సంబభూవాథ బలకోపః సుదారుణః || ౧ ||
తే హయైః కాంచనాపీడైర్ధ్వజైశ్చాగ్నిశిఖోపమైః |
రథైశ్చాదిత్యసంకాశైః కవచైశ్చ మనోరమైః || ౨ ||
నిర్యయూ రాక్షసవ్యాఘ్రా నాదయంతో దిశో దశ |
రాక్షసా భీమకర్మాణో రావణస్య జయైషిణః || ౩ ||
వానరాణామపి చమూర్బృహతీ జయమిచ్ఛతామ్ |
అభ్యధావత తాం సేనాం రక్షసాం కామరూపిణామ్ || ౪ ||
ఏతస్మిన్నంతరే తేషామన్యోన్యమభిధావతామ్ |
రక్షసాం వానరాణాం చ ద్వంద్వయుద్ధమవర్తత || ౫ ||
అంగదేనేంద్రజిత్సార్ధం వాలిపుత్రేణ రాక్షసః |
అయుధ్యత మహాతేజాస్త్ర్యంబకేణ యథాంతకః || ౬ ||
ప్రజంఘేన చ సంపాతిర్నిత్యం దుర్మర్షణో రణే |
జంబుమాలినమారబ్ధో హనుమానపి వానరః || ౭ ||
సంగతః సుమహాక్రోధో రాక్షసో రావణానుజః |
సమరే తీక్ష్ణవేగేన మిత్రఘ్నేన విభీషణః || ౮ ||
తపనేన గజః సార్ధం రాక్షసేన మహాబలః |
నికుంభేన మహాతేజా నీలోఽపి సమయుధ్యత || ౯ ||
వానరేంద్రస్తు సుగ్రీవః ప్రఘసేన సమాగతః |
సంగతః సమరే శ్రీమాన్విరూపాక్షేణ లక్ష్మణః || ౧౦ ||
అగ్నికేతుశ్చ దుర్ధర్షో రశ్మికేతుశ్చ రాక్షసః |
సుప్తఘ్నో యజ్ఞకోపశ్చ రామేణ సహ సంగతాః || ౧౧ ||
వజ్రముష్టిస్తు మైందేన ద్వివిదేనాశనిప్రభః |
రాక్షసాభ్యాం సుఘోరాభ్యాం కపిముఖ్యౌ సమాగతౌ || ౧౨ ||
వీరః ప్రతపనో ఘోరో రాక్షసో రణదుర్ధరః |
సమరే తీక్ష్ణవేగేన నలేన సమయుధ్యత || ౧౩ ||
ధర్మస్య పుత్రో బలవాన్సుషేణ ఇతి విశ్రుతః |
స విద్యున్మాలినా సార్ధమయుధ్యత మహాకపిః || ౧౪ ||
వానరాశ్చాపరే భీమా రాక్షసైరపరైః సహ |
ద్వంద్వం సమీయుర్బహుధా యుద్ధాయ బహుభిః సహ || ౧౫ ||
తత్రాసీత్సుమహద్యుద్ధం తుములం రోమహర్షణమ్ |
రక్షసాం వానరాణాం చ వీరాణాం జయమిచ్ఛతామ్ || ౧౬ ||
హరిరాక్షసదేహేభ్యః ప్రభూతాః కేశశాద్వలాః |
శరీరసంఘాటవహాః ప్రసుస్రుః శోణితాపగాః || ౧౭ ||
ఆజఘానేంద్రజిత్క్రుద్ధో వజ్రేణేవ శతక్రతుః |
అంగదం గదయా వీరం శత్రుసైన్యవిదారణమ్ || ౧౮ ||
తస్య కాంచనచిత్రాంగం రథం సాశ్వం ససారథిమ్ |
జఘాన సమరే శ్రీమానంగదో వేగవాన్కపిః || ౧౯ ||
సంపాతిస్తు త్రిభిర్బాణైః ప్రజంఘేన సమాహతః |
నిజఘానాశ్వకర్ణేన ప్రజంఘం రణమూర్ధని || ౨౦ ||
జంబుమాలీ రథస్థస్తు రథశక్త్యా మహాబలః |
బిభేద సమరే క్రుద్ధో హనూమంతం స్తనాంతరే || ౨౧ ||
తస్య తం రథమాస్థాయ హనూమాన్మారుతాత్మజః |
ప్రమమాథ తలేనాశు సహ తేనైవ రక్షసా || ౨౨ ||
నదన్ప్రతపనో ఘోరో నలం సోఽప్యన్వధావత |
నలః ప్రతపనస్యాశు పాతయామాస చక్షుషీ || ౨౩ ||
భిన్నగాత్రః శరైస్తీక్ష్ణైః క్షిప్రహస్తేన రక్షసా |
గ్రసంతమివ సైన్యాని ప్రఘసం వానరాధిపః || ౨౪ ||
సుగ్రీవః సప్తపర్ణేన నిర్బిభేద జఘాన చ |
[* అధికపాఠః –
ప్రపీడ్య శరవర్షేణ రాక్షసం భీమదర్శనమ్ |
నిజఘాన విరూపాక్షం శరణైకేన లక్ష్మణః |
*]
అగ్నికేతుశ్చ దుర్ధర్షో రశ్మికేతుశ్చ రాక్షసః || ౨౫ ||
సుప్తఘ్నో యజ్ఞకోపశ్చ రామం నిర్బిభిదుః శరైః |
తేషాం చతుర్ణాం రామస్తు శిరాంసి నిశితైః శరై || ౨౬ ||
క్రుద్ధశ్చతుర్భిశ్చిచ్ఛేద ఘోరైరగ్నిశిఖోపమైః |
వజ్రముష్టిస్తు మైందేన ముష్టినా నిహతో రణే || ౨౭ ||
పపాత సరథః సాశ్వః సురాట్ట ఇవ భూతలే | [పురాట్ట]
[* అధికపాఠః –
మిత్రఘ్నమరిదర్పఘ్న ఆపతంతం విభీషణః |
ఆసాద్య గదయా గుర్వ్యా జఘాన రణమూర్ధని |
భిన్నగాత్రః శరైస్తీక్ష్ణైః క్షిప్రహస్తేన రక్షసా |
*]
నికుంభస్తు రణే నీలం నీలాంజనచయప్రభమ్ |
నిర్బిభేద శరైస్తీక్ష్ణైః కరైర్మేఘమివాంశుమాన్ || ౨౮ ||
పునః శరశతేనాథ క్షిప్రహస్తో నిశాచరః |
బిభేద సమరే నీలం నికుంభః ప్రజహాస చ || ౨౯ ||
తస్యైవ రథచక్రేణ నీలో విష్ణురివాహవే |
శిరశ్చిచ్ఛేద సమరే నికుంభస్య చ సారథేః || ౩౦ ||
వజ్రాశనిసమస్పర్శో ద్వివిదోఽప్యశనిప్రభమ్ |
జఘాన గిరిశృంగేణ మిషతాం సర్వరక్షసామ్ || ౩౧ ||
ద్వివిదం వానరేంద్రం తు నగయోధినమాహవే |
శరైరశనిసంకాశైః స వివ్యాధాశనిప్రభః || ౩౨ ||
స శరైరతివిద్ధాంగో ద్వివిదః క్రోధమూర్ఛితః |
సాలేన సరథం సాశ్వం నిజఘానాశనిప్రభమ్ || ౩౩ ||
[* అధికశ్లోకం –
నదన్ప్రపతనో ఘోరో నలం సోఽప్యన్వధావత |
నలః ప్రతపనస్యాశు పాతయామాస చక్షుషీ ||
*]
విద్యున్మాలీ రథస్థస్తు శరైః కాంచనభూషణైః |
సుషేణం తాడయామాస ననాద చ ముహుర్ముహుః || ౩౪ ||
తం రథస్థమథో దృష్ట్వా సుషేణో వానరోత్తమః |
గిరిశృంగేణ మహతా రథమాశు న్యపాతయత్ || ౩౫ ||
లాఘవేన తు సంయుక్తో విద్యున్మాలీ నిశాచరః |
అపక్రమ్య రథాత్తూర్ణం గదాపాణిః క్షితౌ స్థితః || ౩౬ ||
తతః క్రోధసమావిష్టః సుషేణో హరిపుంగవః |
శిలాం సుమహతీం గృహ్య నిశాచరమభిద్రవత్ || ౩౭ ||
తమాపతంతం గదయా విద్యున్మాలీ నిశాచరః |
వక్షస్యభిజఘానాశు సుషేణం హరిసత్తమమ్ || ౩౮ ||
గదాప్రహారం తం ఘోరమచింత్య ప్లవగోత్తమః |
తాం శిలాం పాతయామాస తస్యోరసి మహామృధే || ౩౯ ||
శిలాప్రహారాభిహతో విద్యున్మాలీ నిశాచరః |
నిష్పిష్టహృదయో భూమౌ గతాసుర్నిపపాత హ || ౪౦ ||
ఏవం తైర్వానరైః శూరైః శూరాస్తే రజనీచరాః |
ద్వంద్వే విమృదితాస్తత్ర దైత్యా ఇవ దివౌకసైః || ౪౧ ||
భగ్నైః ఖడ్గైర్గదాభిశ్చ శక్తితోమరపట్టిశైః |
అపవిద్ధైశ్చ భిన్నైశ్చ రథైః సాంగ్రామికైర్హయైః || ౪౨ ||
నిహతైః కుంజరైర్మత్తైస్తథా వానరరాక్షసైః |
చక్రాక్షయుగదండైశ్చ భగ్నైర్ధరణిసంశ్రితైః || ౪౩ ||
బభూవాయోధనం ఘోరం గోమాయుగణసంకులమ్ |
కబంధాని సముత్పేతుర్దిక్షు వానరరక్షసామ్ |
విమర్దే తుములే తస్మిన్దేవాసురరణోపమే || ౪౪ ||
విదార్యమాణా హరిపుంగవైస్తదా
నిశాచరాః శోణితదిగ్ధగాత్రాః |
పునః సుయుద్ధం తరసా సమాస్థితా
దివాకరస్యాస్తమయాభికాంక్షిణః || ౪౫ ||
ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాండే త్రిచత్వారింశః సర్గః || ౪౩ ||
యుద్ధకాండ చతుశ్చత్వారింశః సర్గః (౪౪) >>
సంపూర్ణ శ్రీవాల్మీకి రామాయణ యుద్ధకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
