Read in తెలుగు / ಕನ್ನಡ / தமிழ் / देवनागरी / English (IAST)
|| vidyāpradānam ||
tathā vasiṣṭhē bruvati rājā daśarathaḥ sutam |
prahr̥ṣṭavadanō rāmamājuhāva salakṣmaṇam || 1 ||
kr̥tasvastyayanaṁ mātrā pitrā daśarathēna ca |
purōdhasā vasiṣṭhēna maṅgalairabhimantritam || 2 ||
sa putraṁ mūrdhnyupāghrāya rājā daśarathaḥ priyam |
dadau kuśikaputrāya suprītēnāntarātmanā || 3 ||
tatō vāyuḥ sukhasparśō virajaskō vavau tadā |
viśvāmitragataṁ dr̥ṣṭvā rāmaṁ rājīvalōcanam || 4 ||
puṣpavr̥ṣṭirmahatyāsīddēvadundubhiniḥsvanaiḥ |
śaṅkhadundubhinirghōṣaḥ prayātē tu mahātmani || 5 ||
viśvāmitrō yayāvagrē tatō rāmō mahāyaśāḥ |
kākapakṣadharō dhanvī taṁ ca saumitriranvagāt || 6 ||
kalāpinau dhanuṣpāṇī śōbhayānau diśō daśa |
viśvāmitraṁ mahātmānaṁ triśīrṣāviva pannagau |
anujagmaturakṣudrau pitāmahamivāśvinau || 7 ||
tadā kuśikaputraṁ tu dhanuṣpāṇī svalaṅkr̥tau |
baddhagōdhāṅgulitrāṇau khaḍgavantau mahādyutī || 8 ||
kumārau cāruvapuṣau bhrātarau rāmalakṣmaṇau |
anuyātau śriyā juṣṭau śōbhayētāmaninditau || 9 || [dīptyā]
sthāṇuṁ dēvamivācintyaṁ kumārāviva pāvakī |
adhyardhayōjanaṁ gatvā sarayvā dakṣiṇē taṭē || 10 ||
rāmēti madhurāṁ vāṇīṁ viśvāmitrō:’bhyabhāṣata |
gr̥hāṇa vatsa salilaṁ mā bhūtkālasya paryayaḥ || 11 ||
mantragrāmaṁ gr̥hāṇa tvaṁ balāmatibalāṁ tathā |
na śramō na jvarō vā tē na rūpasya viparyayaḥ || 12 ||
na ca suptaṁ pramattaṁ vā dharṣayiṣyanti nairr̥tāḥ |
na bāhvōḥ sadr̥śō vīryē pr̥thivyāmasti kaścana || 13 ||
triṣu lōkēṣu vai rāma na bhavētsadr̥śastava |
na saubhāgyē na dākṣiṇyē na jñānē buddhiniścayē || 14 ||
nōttarē prativaktavyē samō lōkē tavānagha |
ētadvidyādvayē labdhē bhavitā nāsti tē samaḥ || 15 ||
balā cātibalā caiva sarvajñānasya mātarau |
kṣutpipāsē na tē rāma bhaviṣyētē narōttama || 16 ||
balāmatibalāṁ caiva paṭhatastava rāghava |
[* gr̥hāṇa sarvalōkasya guptayē raghunandana | *]
vidyādvayamadhīyānē yaśaścāpyatulaṁ tvayi || 17 ||
pitāmahasutē hyētē vidyē tējaḥsamanvitē |
pradātuṁ tava kākutstha sadr̥śastvaṁ hi dharmika || 18 ||
kāmaṁ bahuguṇāḥ sarvē tvayyētē nātra saṁśayaḥ |
tapasā sambhr̥tē caitē bahurūpē bhaviṣyataḥ || 19 ||
tatō rāmō jalaṁ spr̥ṣṭvā prahr̥ṣṭavadanaḥ śuciḥ |
pratijagrāha tē vidyē maharṣērbhāvitātmanaḥ || 20 ||
vidyāsamuditō rāmaḥ śuśubhē bhūrivikramaḥ |
sahasraraśmirbhagavān śaradīva divākaraḥ || 21 ||
gurukāryāṇi sarvāṇi niyujya kuśikātmajē |
ūṣustāṁ rajanīṁ tīrē sarayvāḥ susukhaṁ trayaḥ || 22 ||
daśarathanr̥pasūnusattamābhyāṁ
tr̥ṇaśayanē:’nucitē sahōṣitābhyām |
kuśikasutavacō:’nulālitābhyāṁ
sukhamiva sā vibabhau vibhāvarī ca || 23 ||
ityārṣē śrīmadrāmāyaṇē vālmīkīyē ādikāvyē bālakāṇḍē dvāviṁśaḥ sargaḥ || 22 ||
bālakāṇḍa trayōviṁśaḥ sargaḥ (23) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
స్తోత్రనిధి (తెలుగు) వాట్సాప్ ఛానల్ : మా వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
