Dasavatara Stotram – daśāvatāra stōtram – 1

stōtranidhi → daśāvatāra stōtrāṇi → daśāvatāra stōtram – 1

nāmasmaraṇādanyōpāyaṁ na hi paśyāmō bhavataraṇē |
rāma harē kr̥ṣṇa harē tava nāma vadāmi sadā nr̥harē ||

vēdōddhāravicāramatē sōmakadānavasaṁharaṇē |
mīnākāraśarīra namō haribhaktaṁ tē paripālaya mām || 1 ||

manthānācaladhāraṇahētō dēvāsuraparipālana bhō |
kūrmākāraśarīra namō haribhaktaṁ tē paripālaya mām || 2 ||

bhūcōrakahara puṇyamatē krīḍōddhr̥tabhūdēśa harē |
krōḍākāraśarīra namō haribhaktaṁ tē paripālaya mām || 3 ||

hiraṇyakaśipucchēdanahētō prahlādā:’bhayadhāraṇahētō |
narasiṁhācyutarūpa namō haribhaktaṁ tē paripālaya mām || 4 ||

balimadabhañjana vitatamatē pādōdvayakr̥talōkakr̥tē |
vaṭupaṭuvēṣamanōjña namō haribhaktaṁ tē paripālaya mām || 5 ||

kṣitipativaṁśasambhavamūrtē kṣitipatirakṣākṣatamūrtē |
bhr̥gupatirāmavarēṇya namō haribhaktaṁ tē paripālaya mām || 6 ||

sītāvallabha dāśarathē daśarathanandana lōkagurō |
rāvaṇamardana rāma namō haribhaktaṁ tē paripālaya mām || 7 ||

kr̥ṣṇānanta kr̥pājaladhē kaṁsārē kamalēśa harē |
kāliyamardana kr̥ṣṇa namō haribhaktaṁ tē paripālaya mām || 8 ||

tripurasatīmānaviharaṇā tripuravijayamārgaṇarūpā |
śuddhajñānavibuddha namō haribhaktaṁ tē paripālaya mām || 9 ||

śiṣṭajanāvana duṣṭahara khagaturagōttamavāhana tē |
kalkirūpaparipāla namō haribhaktaṁ tē paripālaya mām || 10 ||

nāmasmaraṇādanyōpāyaṁ na hi paśyāmō bhavataraṇē |
rāma harē kr̥ṣṇa harē tava nāma vadāmi sadā nr̥harē ||

iti daśāvatāra stōtram |

---

See more śrī viṣṇu stōtrāṇi for chanting.
See more daśāvatāra stōtrāṇi for chanting.

Did you see any mistake/variation in the content above? Click here to report mistakes and corrections in Stotranidhi content.