Read in తెలుగు / ಕನ್ನಡ / தமிழ் / देवनागरी / English (IAST)
|| హనూమాద్యాగమనమ్ ||
సుగ్రీవేణైవముక్తస్తు హృష్టో దధిముఖః కపిః |
రాఘవం లక్ష్మణం చైవ సుగ్రీవం చాభ్యవాదయత్ || ౧ ||
స ప్రణమ్య చ సుగ్రీవం రాఘవౌ చ మహాబలౌ |
వానరైః సహ తైః శూరైర్దివమేవోత్పపాత హ || ౨ ||
స యథైవాగతః పూర్వం తథైవ త్వరితం గతః |
నిపత్య గగనాద్భూమౌ తద్వనం ప్రవివేశ హ || ౩ ||
స ప్రవిష్టో మధువనం దదర్శ హరియూథపాన్ |
విమదానుత్థితాన్సర్వాన్మేహమానాన్మధూదకమ్ || ౪ ||
స తానుపాగమద్వీరో బద్ధ్వా కరపుటాంజలిమ్ |
ఉవాచ వచనం శ్లక్ష్ణమిదం హృష్టవదంగదమ్ || ౫ ||
సౌమ్య రోషో న కర్తవ్యో యదేభిరభివారితః |
అజ్ఞానాద్రక్షిభిః క్రోధాద్భవంతః ప్రతిషేధితాః || ౬ ||
యువరాజస్త్వమీశశ్చ వనస్యాస్య మహాబల |
మౌర్ఖ్యాత్పూర్వం కృతో దోషస్తం భవాన్ క్షంతుమర్హతి || ౭ ||
ఆఖ్యాతం హి మయా గత్వా పితృవ్యస్య తవానఘ |
ఇహోపయాతం సర్వేషామేతేషాం వనచారిణామ్ || ౮ ||
స త్వదాగమనం శ్రుత్వా సహైభిర్హరియూథపైః |
ప్రహృష్టో న తు రుష్టోఽసౌ వనం శ్రుత్వా ప్రధర్షితమ్ || ౯ ||
ప్రహృష్టో మాం పితృవ్యస్తే సుగ్రీవో వానరేశ్వరః |
శీఘ్రం ప్రేషయ సర్వాంస్తానితి హోవాచ పార్థివః || ౧౦ ||
శ్రుత్వా దధిముఖస్తైతద్వచనం శ్లక్ష్ణమంగదః |
అబ్రవీత్తాన్హరిశ్రేష్ఠో వాక్యం వాక్యవిశారదః || ౧౧ ||
శంకే శ్రుతోఽయం వృత్తాంతో రామేణ హరియూథపాః |
తత్‍క్షమం నేహ నః స్థాతుం కృతే కార్యే పరంతపాః || ౧౨ ||
పీత్వా మధు యథాకామం విశ్రాంతా వనచారిణః |
కిం శేషం గమనం తత్ర సుగ్రీవో యత్ర మే గురుః || ౧౩ ||
సర్వే యథా మాం వక్ష్యంతి సమేత్య హరియూథపాః |
తథాఽస్మి కర్తా కర్తవ్యే భవద్భిః పరవానహమ్ || ౧౪ ||
నాజ్ఞాపయితుమీశోఽహం యువరాజోఽస్మి యద్యపి |
అయుక్తం కృతకర్మాణో యూయం ధర్షయితుం మయా || ౧౫ ||
బ్రువతశ్చాంగదస్యైవం శ్రుత్వా వచనమవ్యయమ్ |
ప్రహృష్టమనసో వాక్యమిదమూచుర్వనౌకసః || ౧౬ ||
ఏవం వక్ష్యతి కో రాజన్ప్రభుః సన్వానరర్షభ |
ఐశ్వర్యమదమత్తో హి సర్వోఽహమితి మన్యతే || ౧౭ ||
తవ చేదం సుసదృశం వాక్యం నాన్యస్య కస్యచిత్ |
సన్నతిర్హి తవాఖ్యాతి భవిష్యచ్ఛుభయోగ్యతామ్ || ౧౮ ||
సర్వే వయమపి ప్రాప్తాస్తత్ర గంతుం కృతక్షణాః |
స యత్ర హరివీరాణాం సుగ్రీవః పతిరవ్యయః || ౧౯ ||
త్వయా హ్యనుక్తైర్హరిభిర్నైవ శక్యం పదాత్పదమ్ |
క్వచిద్గంతుం హరిశ్రేష్ఠ బ్రూమః సత్యమిదం తు తే || ౨౦ ||
ఏవం తు వదతాం తేషామంగదః ప్రత్యభాషత |
బాఢం గచ్ఛామ ఇత్యుక్త్వా ఉత్పపాత మహీతలాత్ || ౨౧ || [ఖముత్పేతుర్మహాబలాః]
ఉత్పతంతమనూత్పేతుః సర్వే తే హరియూథపాః |
కృత్వాకాశం నిరాకాశం యంత్రోత్క్షిప్తా ఇవాచలాః || ౨౨ ||
[* అంగదం పురతః కృత్వా హనూమంతం చ వానరమ్ | *]
తేంబరం సహసోత్పత్య వేగవంతః ప్లవంగమాః |
వినదంతో మహానాదం ఘనా వాతేరితా యథా || ౨౩ ||
అంగదే సమనుప్రాప్తే సుగ్రీవో వానరాధిపః |
ఉవాచ శోకోపహతం రామం కమలలోచనమ్ || ౨౪ ||
సమాశ్వసిహి భద్రం తే దృష్టా దేవీ న సంశయః |
నాగంతుమిహ శక్యం తైరతీతే సమయే హి నః || ౨౫ ||
న మత్సకాశమాగచ్ఛేత్కృత్యే హి వినిపాతితే |
యువరాజో మహాబాహుః ప్లవతాం ప్రవరోంగదః || ౨౬ ||
యద్యప్యకృతకృత్యానామీదృశః స్యాదుపక్రమః |
భవేత్స దీనవదనో భ్రాంతవిప్లుతమానసః || ౨౭ ||
పితృపైతామహం చైతత్పూర్వకైరభిరక్షితమ్ |
న మే మధువనం హన్యాదహృష్టః ప్లవగేశ్వరః || ౨౮ ||
కౌసల్యా సుప్రజా రామ సమాశ్వసిహి సువ్రత |
దృష్టా దేవీ న సందేహో న చాన్యేన హనూమతా || ౨౯ ||
న హ్యన్యః కర్మణో హేతుః సాధనేఽస్య హనూమతః |
హనూమతి హి సిద్ధిశ్చ మతిశ్చ మతిసత్తమ || ౩౦ ||
వ్యవసాయశ్చ వీర్యం చ సూర్యే తేజ ఇవ ధ్రువమ్ |
జాంబవాన్యత్ర నేతా స్యాదంగదశ్చ బలేశ్వరః || ౩౧ ||
హనుమాంశ్చాప్యధిష్ఠాతా న తస్య గతిరన్యథా |
మా భూశ్చింతాసమాయుక్తః సంప్రత్యమితవిక్రమ || ౩౨ ||
తతః కిలకిలాశబ్దం శుశ్రావాసన్నమంబరే |
హనుమత్కర్మదృప్తానాం నర్దతాం కాననౌకసామ్ || ౩౩ ||
కిష్కింధాముపయాతానాం సిద్ధిం కథయతామివ |
తతః శ్రుత్వా నినాదం తం కపీనాం కపిసత్తమః || ౩౪ ||
ఆయతాంచితలాంగూలః సోఽభవద్ధృష్టమానసః |
ఆజగ్ముస్తేఽపి హరయో రామదర్శనకాంక్షిణః || ౩౫ ||
అంగదం పురతః కృత్వా హనూమంతం చ వానరమ్ |
తేఽంగదప్రముఖా వీరాః ప్రహృష్టాశ్చ ముదాన్వితాః || ౩౬ ||
నిపేతుర్హరిరాజస్య సమీపే రాఘవస్య చ |
హనుమాంశ్చ మహాబహుః ప్రణమ్య శిరసా తతః || ౩౭ ||
నియతామక్షతాం దేవీం రాఘవాయ న్యవేదయత్ || ౩౮ ||
[* అధికపాఠః –
దృష్టా దేవీతి హనుమద్వదనాదమృతోపమమ్ |
ఆకర్ణ్య వచనం రామో హర్షమాప సలక్ష్మణః ||
*]
నిశ్చితార్థస్తతస్తస్మిన్సుగ్రీవః పవనాత్మజే |
లక్ష్మణః ప్రీతిమాన్ప్రీతం బహుమానాదవైక్షత || ౩౯ ||
ప్రీత్యా చ రమమాణోఽథ రాఘవః పరవీరహా |
బహుమానేన మహతా హనూమంతమవైక్షత || ౪౦ ||
ఇత్యార్షే శ్రీమద్రామాయణే వాల్మీకీయే ఆదికావ్యే సుందరకాండే చతుఃషష్టితమః సర్గః || ౬౪ ||
సుందరకాండ సర్గ – పంచషష్టితమః సర్గః (౬౫)>>
సంపూర్ణ వాల్మీకి సుందరకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
