Read in తెలుగు / ಕನ್ನಡ / தமிழ் / देवनागरी / English (IAST)
|| hanūmādyāgamanam ||
sugrīvēṇaivamuktastu hr̥ṣṭō dadhimukhaḥ kapiḥ |
rāghavaṁ lakṣmaṇaṁ caiva sugrīvaṁ cābhyavādayat || 1 ||
sa praṇamya ca sugrīvaṁ rāghavau ca mahābalau |
vānaraiḥ saha taiḥ śūrairdivamēvōtpapāta ha || 2 ||
sa yathaivāgataḥ pūrvaṁ tathaiva tvaritaṁ gataḥ |
nipatya gaganādbhūmau tadvanaṁ pravivēśa ha || 3 ||
sa praviṣṭō madhuvanaṁ dadarśa hariyūthapān |
vimadānutthitānsarvānmēhamānānmadhūdakam || 4 ||
sa tānupāgamadvīrō baddhvā karapuṭāñjalim |
uvāca vacanaṁ ślakṣṇamidaṁ hr̥ṣṭavadaṅgadam || 5 ||
saumya rōṣō na kartavyō yadēbhirabhivāritaḥ |
ajñānādrakṣibhiḥ krōdhādbhavantaḥ pratiṣēdhitāḥ || 6 ||
yuvarājastvamīśaśca vanasyāsya mahābala |
maurkhyātpūrvaṁ kr̥tō dōṣastaṁ bhavān kṣantumarhati || 7 ||
ākhyātaṁ hi mayā gatvā pitr̥vyasya tavānagha |
ihōpayātaṁ sarvēṣāmētēṣāṁ vanacāriṇām || 8 ||
sa tvadāgamanaṁ śrutvā sahaibhirhariyūthapaiḥ |
prahr̥ṣṭō na tu ruṣṭō:’sau vanaṁ śrutvā pradharṣitam || 9 ||
prahr̥ṣṭō māṁ pitr̥vyastē sugrīvō vānarēśvaraḥ |
śīghraṁ prēṣaya sarvāṁstāniti hōvāca pārthivaḥ || 10 ||
śrutvā dadhimukhastaitadvacanaṁ ślakṣṇamaṅgadaḥ |
abravīttānhariśrēṣṭhō vākyaṁ vākyaviśāradaḥ || 11 ||
śaṅkē śrutō:’yaṁ vr̥ttāntō rāmēṇa hariyūthapāḥ |
tat-kṣamaṁ nēha naḥ sthātuṁ kr̥tē kāryē parantapāḥ || 12 ||
pītvā madhu yathākāmaṁ viśrāntā vanacāriṇaḥ |
kiṁ śēṣaṁ gamanaṁ tatra sugrīvō yatra mē guruḥ || 13 ||
sarvē yathā māṁ vakṣyanti samētya hariyūthapāḥ |
tathā:’smi kartā kartavyē bhavadbhiḥ paravānaham || 14 ||
nājñāpayitumīśō:’haṁ yuvarājō:’smi yadyapi |
ayuktaṁ kr̥takarmāṇō yūyaṁ dharṣayituṁ mayā || 15 ||
bruvataścāṅgadasyaivaṁ śrutvā vacanamavyayam |
prahr̥ṣṭamanasō vākyamidamūcurvanaukasaḥ || 16 ||
ēvaṁ vakṣyati kō rājanprabhuḥ sanvānararṣabha |
aiśvaryamadamattō hi sarvō:’hamiti manyatē || 17 ||
tava cēdaṁ susadr̥śaṁ vākyaṁ nānyasya kasyacit |
sannatirhi tavākhyāti bhaviṣyacchubhayōgyatām || 18 ||
sarvē vayamapi prāptāstatra gantuṁ kr̥takṣaṇāḥ |
sa yatra harivīrāṇāṁ sugrīvaḥ patiravyayaḥ || 19 ||
tvayā hyanuktairharibhirnaiva śakyaṁ padātpadam |
kvacidgantuṁ hariśrēṣṭha brūmaḥ satyamidaṁ tu tē || 20 ||
ēvaṁ tu vadatāṁ tēṣāmaṅgadaḥ pratyabhāṣata |
bāḍhaṁ gacchāma ityuktvā utpapāta mahītalāt || 21 || [khamutpēturmahābalāḥ]
utpatantamanūtpētuḥ sarvē tē hariyūthapāḥ |
kr̥tvākāśaṁ nirākāśaṁ yantrōtkṣiptā ivācalāḥ || 22 ||
[* aṅgadaṁ purataḥ kr̥tvā hanūmantaṁ ca vānaram | *]
tēmbaraṁ sahasōtpatya vēgavantaḥ plavaṅgamāḥ |
vinadantō mahānādaṁ ghanā vātēritā yathā || 23 ||
aṅgadē samanuprāptē sugrīvō vānarādhipaḥ |
uvāca śōkōpahataṁ rāmaṁ kamalalōcanam || 24 ||
samāśvasihi bhadraṁ tē dr̥ṣṭā dēvī na saṁśayaḥ |
nāgantumiha śakyaṁ tairatītē samayē hi naḥ || 25 ||
na matsakāśamāgacchētkr̥tyē hi vinipātitē |
yuvarājō mahābāhuḥ plavatāṁ pravarōṅgadaḥ || 26 ||
yadyapyakr̥takr̥tyānāmīdr̥śaḥ syādupakramaḥ |
bhavētsa dīnavadanō bhrāntaviplutamānasaḥ || 27 ||
pitr̥paitāmahaṁ caitatpūrvakairabhirakṣitam |
na mē madhuvanaṁ hanyādahr̥ṣṭaḥ plavagēśvaraḥ || 28 ||
kausalyā suprajā rāma samāśvasihi suvrata |
dr̥ṣṭā dēvī na sandēhō na cānyēna hanūmatā || 29 ||
na hyanyaḥ karmaṇō hētuḥ sādhanē:’sya hanūmataḥ |
hanūmati hi siddhiśca matiśca matisattama || 30 ||
vyavasāyaśca vīryaṁ ca sūryē tēja iva dhruvam |
jāmbavānyatra nētā syādaṅgadaśca balēśvaraḥ || 31 ||
hanumāṁścāpyadhiṣṭhātā na tasya gatiranyathā |
mā bhūścintāsamāyuktaḥ sampratyamitavikrama || 32 ||
tataḥ kilakilāśabdaṁ śuśrāvāsannamambarē |
hanumatkarmadr̥ptānāṁ nardatāṁ kānanaukasām || 33 ||
kiṣkindhāmupayātānāṁ siddhiṁ kathayatāmiva |
tataḥ śrutvā ninādaṁ taṁ kapīnāṁ kapisattamaḥ || 34 ||
āyatāñcitalāṅgūlaḥ sō:’bhavaddhr̥ṣṭamānasaḥ |
ājagmustē:’pi harayō rāmadarśanakāṅkṣiṇaḥ || 35 ||
aṅgadaṁ purataḥ kr̥tvā hanūmantaṁ ca vānaram |
tē:’ṅgadapramukhā vīrāḥ prahr̥ṣṭāśca mudānvitāḥ || 36 ||
nipēturharirājasya samīpē rāghavasya ca |
hanumāṁśca mahābahuḥ praṇamya śirasā tataḥ || 37 ||
niyatāmakṣatāṁ dēvīṁ rāghavāya nyavēdayat || 38 ||
[* adhikapāṭhaḥ –
dr̥ṣṭā dēvīti hanumadvadanādamr̥tōpamam |
ākarṇya vacanaṁ rāmō harṣamāpa salakṣmaṇaḥ ||
*]
niścitārthastatastasminsugrīvaḥ pavanātmajē |
lakṣmaṇaḥ prītimānprītaṁ bahumānādavaikṣata || 39 ||
prītyā ca ramamāṇō:’tha rāghavaḥ paravīrahā |
bahumānēna mahatā hanūmantamavaikṣata || 40 ||
ityārṣē śrīmadrāmāyaṇē vālmīkīyē ādikāvyē sundarakāṇḍē catuḥṣaṣṭitamaḥ sargaḥ || 64 ||
sundarakāṇḍa pañcaṣaṣṭitamaḥ sargaḥ (65)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
