Narayaneeyam Dasakam 59 – నారాయణీయం ఏకోనషష్టితమదశకమ్

ఏకోనషష్టితమదశకమ్ (౫౯) – వేణుగానవర్ణనమ్

త్వద్వపుర్నవకలాయకోమలం
ప్రేమదోహనమశేషమోహనమ్ |
బ్రహ్మతత్త్వపరచిన్ముదాత్మకం
వీక్ష్య సమ్ముముహురన్వహం స్త్రియః || ౫౯-౧ ||

మన్మథోన్మథితమానసాః క్రమా-
త్త్వద్విలోకనరతాస్తతస్తతః |
గోపికాస్తవ న సేహిరే హరే
కాననోపగతిమప్యహర్ముఖే || ౫౯-౨ ||

నిర్గతే భవతి దత్తదృష్టయ-
స్త్వద్గతేన మనసా మృగేక్షణాః |
వేణునాదముపకర్ణ్య దూరత-
స్త్వద్విలాసకథయాభిరేమిరే || ౫౯-౩ ||

కాననాన్తమితవాన్భవానపి
స్నిగ్ధపాదపతలే మనోరమే |
వ్యత్యయాకలితపాదమాస్థితః
ప్రత్యపూరయత వేణునాలికామ్ || ౫౯-౪ ||

మారబాణధుతఖేచరీకులం
నిర్వికారపశుపక్షిమణ్డలమ్ |
ద్రావణం చ దృషదామపి ప్రభో
తావకం వ్యజని వేణుకూజితమ్ || ౫౯-౫ ||

వేణురన్ధ్రతరలాఙ్గులీదలం
తాలసఞ్చలితపాదపల్లవమ్ |
తత్స్థితం తవ పరోక్షమప్యహో
సంవిచిన్త్య ముముహుర్వ్రజాఙ్గనాః || ౫౯-౬ ||

నిర్విశఙ్కభవదఙ్గదర్శినీః
ఖేచరీః ఖగమృగాన్పశూనపి |
త్వత్పదప్రణయి కాననం చ తాః
ధన్యధన్యమితి నన్వమానయన్ || ౫౯-౭ ||

ఆపిబేయమధరామృతం కదా
వేణుభుక్తరసశేషమేకదా |
దూరతో బత కృతం దురాశయే-
త్యాకులా ముహురిమాః సమాముహన్ || ౫౯-౮ ||

ప్రత్యహం చ పునరిత్థమఙ్గనా-
శ్చిత్తయోనిజనితాదనుగ్రహాత్ |
బద్ధరాగవివశాస్త్వయి ప్రభో
నిత్యమాపురిహ కృత్యమూఢతామ్ || ౫౯-౯ ||

రాగస్తావజ్జాయతే హి స్వభావా-
న్మోక్షోపాయో యత్నతః స్యాన్న వా స్యాత్ |
తాసాం త్వేకం తద్వయం లబ్ధమాసీత్
భాగ్యం భాగ్యం పాహి మాం మారుతేశ || ౫౯-౧౦ ||
[** వాతాలయేశ **]

ఇతి ఏకోనషష్టితమదశకం సమాప్తమ్ |


సంపూర్ణ శ్రీమన్నారాయణీయం (౧౦౦ దశకాలు) చూడండి.

Facebook Comments

You may also like...

స్పందించండి

మీ ఈమెయిలు చిరునామా ప్రచురించబడదు.

error: Not allowed
%d bloggers like this: