Read in తెలుగు / ಕನ್ನಡ / தமிழ் / देवनागरी / English (IAST)
|| సూర్యానుగమనాఖ్యానమ్ ||
తతస్తద్దారుణం కర్మ దుష్కరం సాహసాత్కృతమ్ |
ఆచచక్షే మునేః సర్వం సూర్యానుగమనం తదా || ౧ ||
భగవన్ వ్రణయుక్తత్వాల్లజ్జయా వ్యకులోంద్రియః |
పరిశ్రాంతో న శక్నోమి వచనం ప్రతిభాషితుమ్ || ౨ ||
అహం చైవ జటాయుశ్చ సంఘర్షాద్దర్పమోహితౌ |
ఆకాశం పతితౌ వీరౌ జిజ్ఞాసంతౌ పరాక్రమమ్ || ౩ ||
కైలాసశిఖరే బద్ధ్వా మునీనామగ్రతః పణమ్ |
రవిః స్యాదనుయాతవ్యో యావదస్తం మహాగిరిమ్ || ౪ ||
అథావాం యుగపత్ప్రాప్తావపశ్యావ మహీతలే |
రథచక్రప్రమాణాని నగరాణి పృథక్ పృథక్ || ౫ ||
క్వచిద్వాదిత్రఘోషాంశ్చ బ్రహ్మఘోషాంశ్చ శుశ్రువః |
గాయంతీశ్చాంగనా బహ్వీః పశ్యావో రక్తవాససః || ౬ ||
తూర్ణముత్పత్య చాకాశమాదిత్యపథమాశ్రితౌ |
ఆవామాలోకయావస్తద్వనం శాద్వలసన్నిభమ్ || ౭ ||
ఉపలైరివ సంఛన్నా దృశ్యతే భూః శిలోచ్చయైః |
ఆపగాభిశ్చ సంవీతా సూత్రైరివ వసుంధరా || ౮ ||
హిమవాంశ్చైవ వింధ్యశ్చ మేరుశ్చ సుమహాన్నగః |
భూతలే సంప్రకాశంతే నాగా ఇవ జలాశయే || ౯ ||
తీవ్రః స్వేదశ్చ ఖేదశ్చ భయం చాసీత్తదావయోః |
సమావిశతి మోహశ్చ తమో మూర్ఛా చ దారుణా || ౧౦ ||
న దిగ్విజ్ఞాయతే యామ్యా నాగ్నేయా న చ వారుణీ |
యుగాంతే నియతో లోకో హతో దగ్ధ ఇవాగ్నినా || ౧౧ ||
మనశ్చ మే హతం భూయః సన్నివర్త్య తు సంశ్రయమ్ |
యత్నేన మహతా హ్యస్మిన్ పునః సంధాయ చక్షుషి || ౧౨ ||
యత్నేన మహతా భూయో రవిః సమవలోకితః |
తుల్యః పృథ్వీప్రమాణేన భాస్కరః ప్రతిభాతి నౌ || ౧౩ ||
జటాయుర్మామనాపృచ్ఛ్య నిపపాత మహీం తతః |
తం దృష్ట్వా తూర్ణమాకాశాదాత్మానం ముక్తవానహమ్ || ౧౪ ||
పక్షాభ్యాం చ మయా గుప్తో జటాయుర్న ప్రదహ్యతే |
ప్రమాదాత్తత్ర నిర్దగ్ధః పతన్ వాయుపథాదహమ్ || ౧౫ ||
ఆశంకే తం నిపతితం జనస్థానే జటాయుషమ్ |
అహం తు పతితో వింధ్యే దగ్ధపక్షో జడీకృతః || ౧౬ ||
రాజ్యేన హీనో భ్రాత్రా చ పక్షాభ్యాం విక్రమేణ చ |
సర్వథా మర్తుమేవేచ్ఛన్ పతిష్యే శిఖరాద్గిరేః || ౧౭ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ఏకషష్టితమః సర్గః || ౬౧ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
