Read in తెలుగు / ಕನ್ನಡ / தமிழ் / देवनागरी / English (IAST)
|| దక్షిణాప్రేషణమ్ ||
తతః ప్రస్థాప్య సుగ్రీవస్తన్మహద్వానరం బలమ్ |
దక్షిణాం ప్రేషయామాస వానరానభిలక్షితాన్ || ౧ ||
నీలమగ్నిసుతం చైవ హనుమంతం చ వానరమ్ |
పితామహసుతం చైవ జాంబవంతం మహాబలమ్ || ౨ ||
సుహోత్రం చ శరారిం చ శరగుల్మం తథైవ చ |
గజం గవాక్షం గవయం సుషేణమృషభం తథా || ౩ ||
మైందం చ ద్వివిదం చైవ విజయం గంధమాదనమ్ |
ఉల్కాముఖమసంగం చ హుతాశనసుతావుభౌ || ౪ ||
అంగదప్రముఖాన్వీరాన్ వీరః కపిగణేశ్వరః |
వేగవిక్రమసంపన్నాన్ సందిదేశ విశేషవిత్ || ౫ ||
తేషామగ్రేసరం చైవ మహద్బలమథాంగదమ్ |
విధాయ హరివీరాణామాదిశద్దక్షిణాం దిశమ్ || ౬ ||
యే కేచన సముద్దేశాస్తస్యాం దిశి సుదుర్గమాః |
కపీశః కపిముఖ్యానాం స తేషాం తానుదాహరత్ || ౭ ||
సహస్రశిరసం వింధ్యం నానాద్రుమలతాయుతమ్ |
నర్మదాం చ నదీం దుర్గాం మహోరగనిషేవితామ్ || ౮ ||
తతో గోదావరీం రమ్యాం కృష్ణవేణీం మహానదీమ్ |
వరదాం చ మహాభాగాం మహోరగనిషేవితామ్ || ౯ ||
మేఖలాముత్కలాం చైవ దశార్ణనగరాణ్యపి |
అశ్వవంతీమవంతీం చ సర్వమేవానుపశ్యత || ౧౦ ||
విదర్భానృషికాంశ్చైవ రమ్యాన్మాహిషకానపి |
తథా వంగాన్ కలింగాంశ్చ కౌశికాంశ్చ సమంతతః || ౧౧ ||
అన్వీక్ష్య దండకారణ్యం సపర్వతనదీగుహమ్ |
నదీం గోదావరీం చైవ సర్వమేవానుపశ్యత || ౧౨ ||
తథైవాంధ్రాంశ్చ పుండ్రాంశ్చ చోలాన్ పాండ్యాన్ సకేరలాన్ |
అయోముఖశ్చ గంతవ్యః పర్వతో ధాతుమండితః || ౧౩ ||
విచిత్రశిఖరః శ్రీమాంశ్చిత్రపుష్పితకాననః |
సచందనవనోద్దేశో మార్గితవ్యో మహాగిరిః || ౧౪ ||
తతస్తామాపగాం దివ్యాం ప్రసన్నసలిలాం శివామ్ |
తత్ర ద్రక్ష్యథ కావేరీం విహితామప్సరోగణైః || ౧౫ ||
తస్యాసీనం నగస్యాగ్రే మలయస్య మహౌజసమ్ |
ద్రక్ష్యథాదిత్యసంకాశమగస్త్యమృషిసత్తమమ్ || ౧౬ ||
తతస్తేనాభ్యనుజ్ఞాతాః ప్రసన్నేన మహాత్మనా |
తామ్రపర్ణీం గ్రాహజుష్టాం తరిష్యథ మహానదీమ్ || ౧౭ ||
సా చందనవనైర్దివ్యైః ప్రచ్ఛన్నా ద్వీపశాలినీ |
కాంతేవ యువతిః కాంతం సముద్రమవగాహతే || ౧౮ ||
తతో హేమమయం దివ్యం ముక్తామణివిభూషితమ్ |
యుక్తం కవాటం పాండ్యానాం గతా ద్రక్ష్యథ వానరాః || ౧౯ ||
తతః సముద్రమాసాద్య సంప్రధార్యార్థనిశ్చయమ్ |
ఆగస్త్యేనాంతరే తత్ర సాగరే వినివేశితః || ౨౦ ||
చిత్రనానానగః శ్రీమాన్ మహేంద్రః పర్వతోత్తమః |
జాతరూపమయః శ్రీమానవగాఢో మహార్ణవమ్ || ౨౧ ||
నానావిధైర్నగైః సర్వైర్లతాభిశ్చోపశోభితమ్ |
దేవర్షియక్షప్రవరైరప్సరోభిశ్చ సేవితమ్ || ౨౨ ||
సిద్ధచారణసంఘైశ్చ ప్రకీర్ణం సుమనోహరమ్ |
తముపైతి సహస్రాక్షః సదా పర్వసు పర్వసు || ౨౩ ||
ద్వీపస్తస్యాపరే పారే శతయోజనవిస్తృతః |
అగమ్యో మానుషైర్దీప్తస్తం మార్గధ్వం సమంతతః || ౨౪ ||
తత్ర సర్వాత్మనా సీతా మార్గితవ్యా విశేషతః |
స హి దేశస్తు వధ్యస్య రావణస్య దురాత్మనః || ౨౫ ||
రాక్షసాధిపతేర్వాసః సహస్రాక్షసమద్యుతేః |
దక్షిణస్య సముద్రస్య మధ్యే తస్య తు రాక్షసీ || ౨౬ ||
అంగారకేతి విఖ్యాతా ఛాయామాక్షిప్య భోజనీ |
ఏవం నిఃసంశయాన్ కృత్వా సంశయాన్నష్టసంశయాః || ౨౭ ||
మృగయధ్వం నరేంద్రస్య పత్నీమమితతేజసః |
తమతిక్రమ్య లక్ష్మీవాన్ సముద్రే శతయోజనే || ౨౮ ||
గిరిః పుష్పితకో నామ సిద్ధచారణసేవితః |
చంద్రసూర్యాంశుసంకాశః సాగరాంబుసమావృతః || ౨౯ ||
భ్రాజతే విపులైః శృంగైరంబరం విలిఖన్నివ |
తస్యైవం కాంచనం శృంగం సేవతే యం దివాకరః || ౩౦ ||
శ్వేతం రాజతశృంగం చ సేవతే యం నిశాకరః |
న తం కృతఘ్నాః పశ్యంతి న నృశంసా న నాస్తికాః || ౩౧ ||
ప్రణమ్య శిరసా శైలం తం విమార్గత వానరాః |
తమతిక్రమ్య దుర్ధర్షాః సూర్యవాన్నామ పర్వతః || ౩౨ ||
అధ్వనా దుర్విగాహేన యోజనాని చతుర్దశ |
తతస్తమప్యతిక్రమ్య వైద్యుతో నామ పర్వతః || ౩౩ ||
సర్వకామఫలైర్వృక్షైః సర్వకాలమనోహరైః |
తత్ర భుక్త్వా వరార్హాణి మూలాని చ ఫలాని చ || ౩౪ ||
మధూని పీత్వా ముఖ్యాని పరం గచ్ఛత వానరాః |
తత్ర నేత్రమనఃకాంతః కుంజరో నామ పర్వతః || ౩౫ ||
అగస్త్యభవనం యత్ర నిర్మితం విశ్వకర్మణా |
తత్ర యోజనవిస్తారముచ్ఛ్రితం దశయోజనమ్ || ౩౬ ||
శరణం కాంచనం దివ్యం నానారత్నవిభూషితమ్ |
తత్ర భోగవతీ నామ సర్పాణామాలయః పురీ || ౩౭ ||
విశాలకక్ష్యా దుర్ధర్షా సర్వతః పరిరక్షితా |
రక్షితా పన్నగైర్ఘోరైస్తీక్ష్ణదంష్ట్రైర్మహావిషైః || ౩౮ ||
సర్పరాజో మహాప్రాజ్ఞో యస్యాం వసతి వాసుకిః |
నిర్యాయ మార్గితవ్యా చ సా చ భోగవతీ పురీ || ౩౯ ||
తత్ర చానంతరా దేశా యే కేచన సుసంవృతాః |
తం చ దేశమతిక్రమ్య మహానృషభసంస్థితః || ౪౦ ||
సర్వరత్నమయః శ్రీమానృషభో నామ పర్వతః |
గోశీర్షకం పద్మకం చ హరిశ్యామం చ చందనమ్ || ౪౧ ||
దివ్యముత్పద్యతే యత్ర తచ్చైవాగ్నిసమప్రభమ్ |
న తు తచ్చందనం దృష్ట్వా స్ప్రష్టవ్యం చ కదాచన || ౪౨ ||
రోహితా నామ గంధర్వా ఘోరా రక్షంతి తద్వనమ్ |
తత్ర గంధర్వపతయః పంచ సూర్యసమప్రభాః || ౪౩ ||
శైలూషో గ్రామణీః శిగ్రుః శుభ్రో బభ్రుస్తథైవ చ |
రవిసోమాగ్నివపుషాం నివాసః పుణ్యకర్మణామ్ || ౪౪ ||
అంతే పృథివ్యా దుర్ధర్షాస్తత్ర స్వర్గజితః స్థితాః |
తతః పరం న వః సేవ్యః పితృలోకః సుదారుణః || ౪౫ ||
రాజధానీ యమస్యైషా కష్టేన తమసా వృతా |
ఏతావదేవ యుష్మాభిర్వీరా వానరపుంగవాః || ౪౬ ||
శక్యం విచేతుం గంతుం వా నాతో గతిమాతాం గతిః |
సర్వమేతత్సమాలోక్య యచ్చాన్యదపి దృశ్యతే || ౪౭ ||
గతిం విదిత్వా వైదేహ్యాః సన్నివర్తితుమర్హథ |
యస్తు మాసాన్నివృత్తోఽగ్రే దృష్టా సీతేతి వక్ష్యతి || ౪౮ ||
మత్తుల్యవిభవో భోగైః సుఖం స విహరిష్యతి |
తతః ప్రియతరో నాస్తి మమ ప్రాణాద్విశేషతః |
కృతాపరాధో బహుశో మమ బంధుర్భవిష్యతి || ౪౯ ||
అమితబలపరాక్రమా భవంతో
విపులగుణేషు కులేషు చ ప్రసూతాః |
మనుజపతిసుతాం యథా లభధ్వం
తదధిగుణం పురషార్థమారభధ్వమ్ || ౫౦ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ఏకచత్వారింశః సర్గః || ౪౧ ||
సంపూర్ణ వాల్మీకి రామాయణే కిష్కింధాకాండ చూడండి.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
