Read in తెలుగు / ಕನ್ನಡ / தமிழ் / देवनागरी / English (IAST)
|| హనుమదాశ్వాసనమ్ ||
తతో నిపతితాం తారాం చ్యుతాం తారామివాంబరాత్ |
శనైరాశ్వాసయామాస హనుమాన్ హరియూథపః || ౧ ||
గుణదోషకృతం జంతుః స్వకర్మఫలహేతుకమ్ |
అవ్యగ్రస్తదవాప్నోతి సర్వం ప్రేత్య శుభాశుభమ్ || ౨ ||
శోచ్యా శోచసి కం శోచ్యం దీనం దీనాఽనుకంపసే |
కస్య కో వాఽను శోచ్యోఽస్తి దేహేఽస్మిన్ బుద్బుదోపమే || ౩ ||
అంగదస్తు కుమారోఽయం ద్రష్టవ్యో జీవపుత్రయా |
ఆయత్యాం చ విధేయాని సమర్థాన్యస్య చింతయ || ౪ ||
జానాస్యనియతామేవం భూతానామాగతిం గతిమ్ |
తస్మాచ్ఛుభం హి కర్తవ్యం పండితేనైహలౌకికమ్ || ౫ ||
యస్మిన్ హరిసహస్రాణి ప్రయుతాన్యర్బుదాని చ |
వర్తయంతి కృతాంశాని సోఽయం దిష్టాంతమాగతః || ౬ ||
యదయం న్యాయదృష్టార్థః సామదానక్షమాపరః |
గతో ధర్మజితాం భూమిం నైనం శోచితుమర్హసి || ౭ ||
సర్వే హి హరిశార్దూలాః పుత్రశ్చాయం తవాంగదః |
ఇదం హర్యృక్షరాజ్యం చ త్వత్సనాథమనిందితే || ౮ ||
తావిమౌ శోకసంతాపౌ శనైః ప్రేరయ భామిని |
త్వాయా పరిగృహీతోఽయమంగదః శాస్తు మేదినీమ్ || ౯ ||
సంతతిశ్చ యథా దృష్టా కృత్యం యచ్చాపి సామ్ప్రతమ్ |
రాజ్ఞస్తత్క్రియతాం తావదేష కాలస్య నిశ్చయః || ౧౦ ||
సంస్కార్యో హరిరాజశ్చ అంగదశ్చాభిషిచ్యతామ్ |
సింహాసనగతం పుత్రం పశ్యంతీ శాంతిమేష్యసి || ౧౧ ||
సా తస్య వచనం శ్రుత్వా భర్తృవ్యసనపీడితా |
అబ్రవీదుత్తరం తారా హనుమంతమవస్థితమ్ || ౧౨ ||
అంగదప్రతిరూపాణాం పుత్రాణామేకతః శతమ్ |
హతస్యాప్యస్య వీరస్య గాత్రసంశ్లేషణం వరమ్ || ౧౩ ||
న చాహం హరిరాజస్య ప్రభావామ్యంగదస్య వా |
పితృవ్యస్తస్య సుగ్రీవః సర్వకార్యేష్వనంతరః || ౧౪ ||
న హ్యేషా బుద్ధిరాస్థేయా హనుమన్నంగదం ప్రతి |
పితా హి బంధుః పుత్రస్య న మాతా హరిసత్తమ || ౧౫ ||
న హి మమ హరిరాజసంశ్రయాత్
క్షమతరమస్తి పరత్ర చేహ వా |
అభిముఖహతవీరసేవితం
శయనమిదం మమ సేవితుం క్షమమ్ || ౧౬ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ఏకవింశః సర్గః || ౨౧ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక: శరన్నవరాత్రుల సందర్భంగా "శ్రీ లలితా స్తోత్రనిధి" మరియు "శ్రీ దుర్గా స్తోత్రనిధి" పుస్తకములు కొనుగోలుకు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
