Read in తెలుగు / ಕನ್ನಡ / தமிழ் / देवनागरी / English (IAST)
|| kuṁbhakarṇamatiḥ ||
sa tāṁ pariṣadaṁ kr̥tsnāṁ samīkṣya samitiñjayaḥ |
pracōdayāmāsa tadā prahastaṁ vāhinīpatim || 1 ||
sēnāpatē yathā tē syuḥ kr̥tavidyāścaturvidhāḥ |
yōdhā nagararakṣāyāṁ tathā vyādēṣṭumarhasi || 2 ||
sa prahastaḥ praṇītātmā cikīrṣan rājaśāsanam |
vinikṣipadbalaṁ sarvaṁ bahirantaśca mandirē || 3 ||
tatō vinikṣipya balaṁ pr̥thaṅnagaraguptayē |
prahastaḥ pramukhē rājñō niṣasāda jagāda ca || 4 ||
nihitaṁ bahirantaśca balaṁ balavatastava |
kuruṣvāvimanāḥ kṣipraṁ yadabhiprētamasti tē || 5 ||
prahastasya vacaḥ śrutvā rājā rājyahitē rataḥ |
sukhēpsuḥ suhr̥dāṁ madhyē vyājahāra sa rāvaṇaḥ || 6 ||
priyāpriyē sukhaṁ duḥkhaṁ lābhālābhau hitāhitē |
dharmakāmārthakr̥cchrēṣu yūyamārhatha vēditum || 7 ||
sarvakr̥tyāni yuṣmābhiḥ samārabdhāni sarvadā |
mantrakarmaniyuktāni na jātu viphalāni mē || 8 ||
sasōmagrahanakṣatrairmarudbhiriva vāsavaḥ |
bhavadbhirahamatyarthaṁ vr̥taḥ śriyamavāpnuyām || 9 ||
ahaṁ tu khalu sarvānvaḥ samarthayitumudyataḥ |
kumbhakarṇasya tu svapnānnēmamarthamacōdayam || 10 ||
ayaṁ hi suptaḥ ṣaṇmāsānkumbhakarṇō mahābalaḥ |
sarvaśastrabhr̥tāṁ mukhyaḥ sa idānīṁ samutthitaḥ || 11 ||
iyaṁ ca daṇḍakāraṇyādrāmasya mahiṣī priyā |
rakṣōbhiścaritāddēśādānītā janakātmajā || 12 ||
sā mē na śayyāmārōḍhumicchatyalasagāminī |
triṣu lōkēṣu cānyā mē na sītāsadr̥śī matā || 13 ||
tanumadhyā pr̥thuśrōṇī śāradēndunibhānanā |
hēmabimbanibhā saumyā māyēva mayanirmitā || 14 ||
sulōhitatalau ślakṣṇau caraṇau supratiṣṭhitau |
dr̥ṣṭvā tāmranakhau tasyā dīpyatē mē śarīrajaḥ || 15 ||
hutāgnērarcisaṅkāśāmēnāṁ saurīmiva prabhām |
dr̥ṣvā sītāṁ viśālākṣīṁ kāmasya vaśamēyivān || 16 ||
unnasaṁ vadanaṁ valgu vipulaṁ cārulōcanam |
paśyaṁstadā:’vaśastasyāḥ kāmasya vaśamēyivān || 17 ||
krōdhaharṣasamānēna durvarṇakaraṇēna ca |
śōkasantāpanityēna kāmēna kaluṣīkr̥taḥ || 18 ||
sā tu saṁvatsaraṁ kālaṁ māmayācata bhāminī |
pratīkṣamāṇā bhartāraṁ rāmamāyatalōcanā || 19 ||
tanmayā cārunētrāyāḥ pratijñātaṁ vacaḥ śubham |
śrāntō:’haṁ satataṁ kāmādyātō haya ivādhvani || 20 ||
kathaṁ sāgaramakṣōbhyaṁ uttaranti vanaukasaḥ | [tariṣyanti]
bahusattvasamākīrṇaṁ tau vā daśarathātmajau || 21 || [jhaṣā]
athavā kapinaikēna kr̥taṁ naḥ kadanaṁ mahat |
durjñēyāḥ kāryagatayō brūta yasya yathāmati || 22 ||
mānuṣānmē bhayaṁ nāsti tathāpi tu vimr̥śyatām |
tadā dēvāsurē yuddhē yuṣmābhiḥ sahitō:’jayam || 23 ||
tē mē bhavantaśca tathā sugrīvapramukhān harīn |
parē pārē samudrasya puraskr̥tya nr̥pātmajau || 24 ||
sītāyāḥ padavīṁ prāptau samprāptau varuṇālayam |
adēyā ca yathā sītā vadhyau daśarathātmajau || 25 ||
bhavadbhirmantryatāṁ mantraḥ sunītiścābhidhīyatām |
na hi śaktiṁ prapaśyāmi jagatyanyasya kasyacit || 26 ||
sāgaraṁ vānaraistīrtvā niścayēna jayō mama |
tasya kāmaparītasya niśamya paridēvitam |
kumbhakarṇaḥ pracukrōdha vacanaṁ cēdamabravīt || 27 ||
yadā tu rāmasya salakṣmaṇasya
prasahya sītā khalu sā ihāhr̥tā |
sakr̥tsamīkṣyaiva suniścitaṁ tadā
bhajēta cittaṁ yamunēva yāmunam || 28 ||
sarvamētanmahārāja kr̥tamapratimaṁ tava |
vidhīyēta sahāsmābhirādāvēvāsya karmaṇaḥ || 29 ||
nyāyēna rājakāryāṇi yaḥ karōti daśānana |
na sa santapyatē paścānniścitārthamatirnr̥paḥ || 30 ||
anupāyēna karmāṇi viparītāni yāni ca |
kriyamāṇāni duṣyanti havīṁṣyaprayatēṣviva || 31 ||
yaḥ paścātpūrvakāryāṇi karmāṇyabhicikīrṣati |
pūrvaṁ cāparakāryāṇi na sa vēda nayānayau || 32 ||
capalasya tu kr̥tyēṣu prasamīkṣyādhikaṁ balam |
kṣipramanyē prapadyantē krauñcasya khamiva dvijāḥ || 33 ||
tvayēdaṁ mahadārabdhaṁ kāryamapraticintitam |
diṣṭyā tvāṁ nāvadhīdrāmō viṣamiśramivāmiṣam || 34 ||
tasmāttvayā samārabdhaṁ karma hyapratimaṁ paraiḥ |
ahaṁ samīkariṣyāmi hatvā śatrūṁ-stavānagha || 35 ||
[* ahamutsādayiṣyāmi śatrūṁstava viśāmpatē | *]
yadi śakravivasvantau yadi pāvakamārutau |
tāvahaṁ yōdhayiṣyāmi kubēravaruṇāvapi || 36 ||
girimātraśarīrasya mahāparighayōdhinaḥ |
nardatastīkṣṇadaṁṣṭrasya bibhiyādvai purandaraḥ || 37 ||
punarmāṁ sa dvitīyēna śarēṇa nihaniṣyati |
tatō:’haṁ tasya pāsyāmi rudhiraṁ kāmamāśvasa || 38 ||
vadhēna vai dāśarathēḥ sukhāvahaṁ
jayaṁ tavāhartumahaṁ yatiṣyē |
hatvā ca rāmaṁ saha lakṣmaṇēna
khādāmi sarvān hariyūthamukhyān || 39 ||
ramasva kāmaṁ piba cāgryavāruṇīṁ
kuruṣva kāryāṇi hitāni vijvaraḥ |
mayā tu rāmē gamitē yamakṣayaṁ
cirāya sītā vaśagā bhaviṣyati || 40 ||
ityārṣē śrīmadrāmāyaṇē vālmīkīyē ādikāvyē yuddhakāṇḍē dvādaśaḥ sargaḥ || 12 ||
yuddhakāṇḍa trayōdaśaḥ sargaḥ (13)>>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē yuddhakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.