Read in తెలుగు / ಕನ್ನಡ / தமிழ் / देवनागरी / English (IAST)
|| svayamprabhātithyam ||
ityuktvā hanumāṁstatra punaḥ kr̥ṣṇājināmbarām |
abravīttāṁ mahābhāgāṁ tāpasīṁ dharmacāriṇīm || 1 ||
idaṁ praviṣṭāḥ sahasā bilaṁ timirasaṁvr̥tam |
kṣutpipāsāpariśrāntāḥ parikhinnāśca sarvaśaḥ || 2 ||
mahaddharaṇyā vivaraṁ praviṣṭāḥ sma pipāsitāḥ |
imāṁstvēvaṁvidhān bhāvān vividhānadbhutōpamān || 3 ||
dr̥ṣṭvā vayaṁ pravyathitāḥ sambhrāntā naṣṭacētasaḥ |
kasyaitē kāñcanā vr̥kṣāstaruṇādityasannibhāḥ || 4 ||
śucīnyabhyavahāryāṇi mūlāni ca phalāni ca |
kāñcanāni vimānāni rājatāni gr̥hāṇi ca || 5 ||
tapanīyagavākṣaṇi maṇijālāvr̥tāni ca |
puṣpitāḥ phalavantaśca puṇyāḥ surabhigandhinaḥ || 6 ||
imē jāmbūnadamayāḥ pādapāḥ kasya tējasā |
kāñcanāni ca padmāni jātāni vimalē jalē || 7 ||
kathaṁ matsyāśca sauvarṇāścaranti saha kacchapaiḥ |
ātmānamanubhāvaṁ ca kasya caitattapōbalam || 8 ||
ajānatāṁ naḥ sarvēṣāṁ sarvamākhyātumarhasi |
ēvamuktā hanumatā tāpasī dharmacāriṇī || 9 ||
pratyuvāca hanūmantaṁ sarvabhūtahitē ratā |
mayō nāma mahātējā māyāvī dānavarṣabhaḥ || 10 ||
tēnēdaṁ nirmitaṁ sarvaṁ māyayā kāñcanaṁ vanam |
purā dānavamukhyānāṁ viśvakarmā babhūva ha || 11 ||
yēnēdaṁ kāñcanaṁ divyaṁ nirmitaṁ bhavanōttamam |
sa tu varṣasahasrāṇi tapastaptvā mahāvanē || 12 ||
pitāmahādvaraṁ lēbhē sarvamauśanasaṁ dhanam |
vanaṁ vidhāya balavān sarvakāmēśvarastadā || 13 ||
uvāsa sukhitaḥ kālaṁ kañcidasmin mahāvanē |
tamapsarasi hēmāyāṁ śaktaṁ dānavapuṅgavam || 14 ||
vikramyaivāśaniṁ gr̥hya jaghānēśaḥ purandaraḥ |
idaṁ ca brahmāṇā dattaṁ hēmāyai vanamuttamam || 15 ||
śāśvatāḥ kāmabhōgāśca gr̥haṁ cēdaṁ hiraṇmayam |
duhitā mērusāvarṇērahaṁ tasyāḥ svayamprabhā || 16 ||
idaṁ rakṣāmi bhavanaṁ hēmāyā vānarōttama |
mama priyasakhī hēmā nr̥ttagītaviśāradā || 17 ||
tayā dattavarā cāsmi rakṣāmi bhavanōttamam |
kiṁ kāryaṁ kasya vā hētōḥ kāntārāṇi prapaśyatha |
kathaṁ cēdaṁ vanaṁ durgaṁ yuṣmābhirupalakṣitam || 18 ||
imānyabhyavahāryāṇi mūlāni ca phalāni ca |
bhuktvā pītvā ca pānīyaṁ sarvaṁ mē vaktumarhatha || 19 ||
ityārṣē śrīmadrāmāyaṇē vālmīkīyē ādikāvyē kiṣkindhākāṇḍē ēkapañcāśaḥ sargaḥ || 51 ||
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.
మా ప్రచురణ: "శ్రీ బగళాముఖీ స్తోత్రనిధి (తాత్పర్య సహితం)" ప్రింటింగు పూర్తి అయి కొనుగోలుకు సిద్ధంగా ఉంది.
స్తోత్రనిధి (తెలుగు) వాట్సాప్ ఛానల్ : మా తెలుగు వాట్సాప్ ఛానల్ ని ఫాలో చేయడానికి ఇక్కడ క్లిక్ చేయండి.
Support this Dharma Karya : If you find value in the Stotranidhi collection, please consider supporting this work. You can make a contribution through these links - PhonePe/GooglePay/BHIM (within India) or Paypal (outside India)
Buy Prabhata Stotranidhi Book: A single book with important stotras of Devatas is available in 4 languages - "తెలుగు" , "ಕನ್ನಡ" , "देवनागरि" , "English (IAST)".
విప్రులకు, ద్విజులకు విజ్ఞప్తి : మంత్ర అనుష్ఠానం లేక నేటి కాలంలో ధర్మాచరణ క్షీణిస్తూ ఉన్నది. దయచేసి మీకు ఉపదేశం ఉన్న మంత్రం కనీసం లక్ష జపం చేయండి. మీకు అతిదగ్గరలో ఉన్న దేవాలయానికి ప్రతిరోజూ వెళ్ళి అక్కడి దేవత మంత్రాన్ని కనీసం 108 జపంచేసి, ఆ దేవత బలాన్ని వృద్ధి చేయండి. దేవత అనుగ్రహం ఉంటేనే ఆ ప్రాంతంలో ధర్మం వర్ధిల్లుతుంది.
Important message to Dharmikas : Please visit your nearest Devalayam and chant mantra of that Devata atleast 108 times daily in that temple. When Devata becomes powerful, it will automatically protect Dharma.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
