Read in తెలుగు / ಕನ್ನಡ / தமிழ் / देवनागरी / English (IAST)
|| vasiṣṭhātithyam ||
sa dr̥ṣṭvā paramaprītō viśvāmitrō mahābalaḥ | [taṁ]
praṇamya vidhinā vīrō vasiṣṭhaṁ japatāṁ varam || 1 ||
svāgataṁ tava cētyuktō vasiṣṭhēna mahātmanā |
āsanaṁ cāsya bhagavānvasiṣṭhō vyādidēśa ha || 2 ||
upaviṣṭāya ca tadā viśvāmitrāya dhīmatē |
yathānyāyaṁ munivaraḥ phalamūlānyupāharat || 3 ||
pratigr̥hya ca tāṁ pūjāṁ vasiṣṭhādrājasattamaḥ |
tapōgnihōtraśiṣyēṣu kuśalaṁ paryapr̥cchata || 4 ||
viśvāmitrō mahātējā vanaspatigaṇē tathā |
sarvatra kuśalaṁ cāha vasiṣṭhō rājasattamam || 5 ||
sukhōpaviṣṭaṁ rājānaṁ viśvāmitraṁ mahātapāḥ |
papraccha japatāṁ śrēṣṭhō vasiṣṭhō brahmaṇaḥ sutaḥ || 6 ||
kaccittē kuśalaṁ rājankacciddharmēṇa rañjayan |
prajāḥ pālayasē rājan rājavr̥ttēna dhārmika || 7 ||
kaccittē sambhr̥tā bhr̥tyāḥ kaccittiṣṭhanti śāsanē |
kaccittē vijitāḥ sarvē ripavō ripusūdana || 8 ||
kaccidbalēṣu kōśēṣu mitrēṣu ca parantapa |
kuśalaṁ tē naravyāghra putrapautrē tavānagha || 9 ||
sarvatra kuśalaṁ rājā vasiṣṭhaṁ pratyudāharat |
viśvāmitrō mahātējā vasiṣṭhaṁ vinayānvitaḥ || 10 ||
kr̥tvōbhau suciraṁ kālaṁ dharmiṣṭhau tāḥ kathāḥ śubhāḥ |
mudā paramayā yuktau prīyētāṁ tau parasparam || 11 ||
tatō vasiṣṭhō bhagavānkathāntē raghunandana |
viśvāmitramidaṁ vākyamuvāca prahasanniva || 12 ||
ātithyaṁ kartumicchāmi balasyāsya mahābala |
tava caivāpramēyasya yathārhaṁ sampratīccha mē || 13 ||
satkriyāṁ tu bhavānētāṁ pratīcchatu mayōdyatām |
rājā tvamatithiśrēṣṭhaḥ pūjanīyaḥ prayatnataḥ || 14 ||
ēvamuktō vasiṣṭhēna viśvāmitrō mahāmatiḥ |
kr̥tamityabravīdrājā pūjāvākyēna mē tvayā || 15 || [priya]
phalamūlēna bhagavanvidyatē yattavāśramē |
pādyēnācamanīyēna bhagavaddarśanēna ca || 16 ||
sarvathā ca mahāprājña pūjārhēṇa supūjitaḥ |
gamiṣyāmi namastē:’stu maitrēṇēkṣasva cakṣuṣā || 17 ||
ēvaṁ bruvantaṁ rājānaṁ vasiṣṭhaḥ punarēva hi |
nyamantrayata dharmātmā punaḥ punarudāradhīḥ || 18 ||
bāḍhamityēva gādhēyō vasiṣṭhaṁ pratyuvāca ha |
yathā priyaṁ bhagavatastathāstu munisattama || 19 ||
ēvamuktō mahātējā vasiṣṭhō japatāṁ varaḥ |
ājuhāva tataḥ prītaḥ kalmāṣīṁ dhūtakalmaṣaḥ || 20 ||
ēhyēhi śabalē kṣipraṁ śr̥ṇu cāpi vacō mama |
sabalasyāsya rājarṣēḥ kartuṁ vyavasitō:’smyaham || 21 ||
bhōjanēna mahārhēṇa satkāraṁ saṁvidhatsva mē |
yasya yasya yathākāmaṁ ṣaḍrasēṣvabhipūjitam || 22 ||
tatsarvaṁ kāmadhuk kṣipramabhivarṣa kr̥tē mama |
rasēnānnēna pānēna lēhyacōṣyēṇa samyutam |
annānāṁ nicayaṁ sarvaṁ sr̥jasva śabalē tvara || 23 ||
ityārṣē śrīmadrāmāyaṇē vālmīkīyē ādikāvyē bālakāṇḍē dvipañcāśaḥ sargaḥ || 52 ||
bālakāṇḍa tripañcāśaḥ sargaḥ (53) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
