Read in తెలుగు / ಕನ್ನಡ / தமிழ் / देवनागरी / English (IAST)
|| śakrāhalyāśāpaḥ ||
pr̥ṣṭvā tu kuśalaṁ tatra parasparasamāgamē |
kathāntē sumatirvākyaṁ vyājahāra mahāmunim || 1 ||
imau kumārau bhadraṁ tē dēvatulyaparākramau |
gajasiṁhagatī vīrau śārdūlavr̥ṣabhōpamau || 2 ||
padmapatraviśālākṣau khaḍgatūṇīdhanurdharau |
aśvināviva rūpēṇa samupasthitayauvanau || 3 ||
yadr̥cchayaiva gāṁ prāptau dēvalōkādivāmarau |
kathaṁ padbhyāmiha prāptau kimarthaṁ kasya vā munē || 4 ||
bhūṣayantāvimaṁ dēśaṁ candrasūryāvivāmbaram |
parasparasya sadr̥śau pramāṇēṅgitacēṣṭitaiḥ || 5 ||
kimarthaṁ ca naraśrēṣṭhau samprāptau durgamē pathi |
varāyudhadharau vīrau śrōtumicchāmi tattvataḥ || 6 ||
tasya tadvacanaṁ śrutvā yathāvr̥ttaṁ nyavēdayat |
siddhāśramanivāsaṁ ca rākṣasānāṁ vadhaṁ tathā || 7 ||
viśvāmitravacaḥ śrutvā rājā paramaharṣitaḥ |
atithī paramau prāptau putrau daśarathasya tau || 8 ||
pūjayāmāsa vidhivatsatkārārhau mahābalau |
tataḥ paramasatkāraṁ sumatēḥ prāpya rāghavau || 9 ||
uṣya tatra niśāmēkāṁ jagmaturmithilāṁ tataḥ |
tāndr̥ṣṭvā munayaḥ sarvē janakasya purīṁ śubhām || 10 ||
sādhu sādhviti śaṁsantō mithilāṁ samapūjayan |
mithilōpavanē tatra āśramaṁ dr̥śya rāghavaḥ || 11 ||
purāṇaṁ nirjanaṁ ramyaṁ papraccha munipuṅgavam |
śrīmadāśramasaṅkāśaṁ kiṁ nvidaṁ munivarjitam || 12 ||
śrōtumicchāmi bhagavankasyāyaṁ pūrva āśramaḥ |
tacchrutvā rāghavēṇōktaṁ vākyaṁ vākyaviśāradaḥ || 13 ||
pratyuvāca mahātējā viśvāmitrō mahāmuniḥ |
hanta tē kathayiṣyāmi śr̥ṇu tattvēna rāghava || 14 ||
yasyaitadāśramapadaṁ śaptaṁ kōpānmahātmanā |
gautamasya naraśrēṣṭha pūrvamāsīnmahātmanaḥ || 15 ||
āśramō divyasaṅkāśaḥ surairapi supūjitaḥ |
sa cēha tapa ātiṣṭhadahalyāsahitaḥ purā || 16 ||
varṣapūgānanēkāṁśca rājaputra mahāyaśaḥ |
kadāciddivasē rāma tatō dūraṁ gatē munau || 17 ||
tasyāntaraṁ viditvā tu sahasrākṣaḥ śacīpatiḥ |
munivēṣadharō:’halyāmidaṁ vacanamabravīt || 18 ||
r̥tukālaṁ pratīkṣantē nārthinaḥ susamāhitē |
saṅgamaṁ tvahamicchāmi tvayā saha sumadhyamē || 19 ||
munivēṣaṁ sahasrākṣaṁ vijñāya raghunandana |
matiṁ cakāra durmēdhā dēvarājakutūhalāt || 20 ||
athābravītsuraśrēṣṭhaṁ kr̥tārthēnāntarātmanā |
kr̥tārthāsmi suraśrēṣṭha gaccha śīghramitaḥ prabhō || 21 ||
ātmānaṁ māṁ ca dēvēśa sarvadā rakṣa mānada |
indrastu prahasanvākyamahalyāmidamabravīt || 22 ||
suśrōṇi parituṣṭō:’smi gamiṣyāmi yathāgatam |
ēvaṁ saṅgamya tu tayā niścakrāmōṭajāttataḥ || 23 ||
sa sambhramāttvaranrāma śaṅkitō gautamaṁ prati |
gautamaṁ sa dadarśātha praviśantaṁ mahāmunim || 24 || [taṁ]
dēvadānavadurdharṣaṁ tapōbalasamanvitam |
tīrthōdakapariklinnaṁ dīpyamānamivānalam || 25 ||
gr̥hītasamidhaṁ tatra sakuśaṁ munipuṅgavam |
dr̥ṣṭvā surapatistrastō vivarṇavadanō:’bhavat || 26 ||
atha dr̥ṣṭvā sahasrākṣaṁ munivēṣadharaṁ muniḥ |
durvr̥ttaṁ vr̥ttasampannō rōṣādvacanamabravīt || 27 ||
mama rūpaṁ samāsthāya kr̥tavānasi durmatē |
akartavyamidaṁ tasmādviphalastvaṁ bhaviṣyasi || 28 ||
gautamēnaivamuktasya sarōṣēṇa mahātmanā |
pētaturvr̥ṣaṇau bhūmau sahasrākṣasya tat kṣaṇāt || 29 ||
tathā śaptvā sa vai śakramahalyāmapi śaptavān |
iha varṣasahasrāṇi bahūni tvaṁ nivatsyasi || 30 ||
vāyubhakṣā nirāhārā tapyantī bhasmaśāyinī |
adr̥śyā sarvabhūtānāmāśramē:’sminnivatsyasi || 31 ||
yadā caitadvanaṁ ghōraṁ rāmō daśarathātmajaḥ |
āgamiṣyati durdharṣastadā pūtā bhaviṣyasi || 32 ||
tasyātithyēna durvr̥ttē lōbhamōhavivarjitā |
matsakāśē mudā yuktā svaṁ vapurdhārayiṣyasi || 33 ||
ēvamuktvā mahātējā gautamō duṣṭacāriṇīm |
imamāśramamutsr̥jya siddhacāraṇasēvitē |
himavacchikharē ramyē tapastēpē mahātapāḥ || 34 ||
ityārṣē śrīmadrāmāyaṇē vālmīkīyē ādikāvyē bālakāṇḍē aṣṭacatvāriṁśaḥ sargaḥ || 48 ||
bālakāṇḍa ēkōnapañcāśaḥ sargaḥ (49) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
