Read in తెలుగు / ಕನ್ನಡ / தமிழ் / देवनागरी / English (IAST)
|| brahmāgamanam ||
nāradasya tu tadvākyaṁ śrutvā vākyaviśāradaḥ |
pūjayāmāsa dharmātmā sahaśiṣyō mahāmuniḥ || 1 ||
yathāvatpūjitastēna dēvarṣirnāradastathā |
āpr̥cchyaivābhyanujñātaḥ sa jagāma vihāyasam || 2 ||
sa muhūrtaṁ gatē tasmindēvalōkaṁ munistadā |
jagāma tamasātīraṁ jāhnavyāstvavidūrataḥ || 3 ||
sa tu tīraṁ samāsādya tamasāyā munistadā |
śiṣyamāha sthitaṁ pārśvē dr̥ṣṭvā tīrthamakardamam || 4 ||
akardamamidaṁ tīrthaṁ bharadvāja niśāmaya |
ramaṇīyaṁ prasannāmbu sanmanuṣyamanō yathā || 5 ||
nyasyatāṁ kalaśastāta dīyatāṁ valkalaṁ mama |
idamēvāvagāhiṣyē tamasātīrthamuttamam || 6 ||
ēvamuktō bharadvājō vālmīkēna mahātmanā |
prāyacchata munēstasya valkalaṁ niyatō gurōḥ || 7 ||
sa śiṣyahastādādāya valkalaṁ niyatēndriyaḥ |
vicacāra ha paśyaṁstatsarvatō vipulaṁ vanam || 8 ||
tasyābhyāśē tu mithunaṁ carantamanapāyinam |
dadarśa bhagavāṁstatra krauñcayōścāruniḥsvanam || 9 ||
tasmāttu mithunādēkaṁ pumāṁsaṁ pāpaniścayaḥ |
jaghāna vairanilayō niṣādastasya paśyataḥ || 10 ||
taṁ śōṇitaparītāṅgaṁ vēṣṭamānaṁ mahītalē |
bhāryā tu nihataṁ dr̥ṣṭvā rurāva karuṇāṁ giram || 11 ||
viyuktā patinā tēna dvijēna sahacāriṇā |
tāmraśīrṣēṇa mattēna patriṇā sahitēna vai || 12 ||
tathā tu taṁ dvijaṁ dr̥ṣṭvā niṣādēna nipātitam |
r̥ṣērdharmātmanastasya kāruṇyaṁ samapadyata || 13 ||
tataḥ karuṇavēditvādadharmō:’yamiti dvijaḥ |
niśāmya rudatīṁ krauñcīmidaṁ vacanamabravīt || 14 ||
mā niṣāda pratiṣṭhāṁ tvamagamaḥ śāśvatīḥ samāḥ |
yatkrauñcamithunādēkamavadhīḥ kāmamōhitam || 15 ||
tasyaivaṁ bruvataścintā babhūva hr̥di vīkṣataḥ |
śōkārtēnāsya śakunēḥ kimidaṁ vyāhr̥taṁ mayā || 16 ||
cintayansa mahāprājñaścakāra matimān matim |
śiṣyaṁ caivābravīdvākyamidaṁ sa munipuṅgavaḥ || 17 ||
pādabaddhō:’kṣarasamastantrīlayasamanvitaḥ |
śōkārtasya pravr̥ttō mē ślōkō bhavatu nānyathā || 18 ||
śiṣyastu tasya bruvatō munērvākyamanuttamam |
pratijagrāha saṁhr̥ṣṭastasya tuṣṭō:’bhavadguruḥ || 19 ||
sō:’bhiṣēkaṁ tataḥ kr̥tvā tīrthē tasminyathāvidhi |
tamēva cintayannarthamupāvartata vai muniḥ || 20 ||
bharadvājastataḥ śiṣyō vinītaḥ śrutavān muniḥ |
kalaśaṁ pūrṇamādāya pr̥ṣṭhatō:’nujagāma ha || 21 ||
sa praviśyāśramapadaṁ śiṣyēṇa saha dharmavit |
upaviṣṭaḥ kathāścānyāścakāra dhyānamāsthitaḥ || 22 ||
ājagāma tatō brahmā lōkakartā svayaṁ prabhuḥ |
caturmukhō mahātējā draṣṭuṁ taṁ munipuṅgavam || 23 ||
vālmīkiratha taṁ dr̥ṣṭvā sahasōtthāya vāgyataḥ |
prāñjaliḥ prayatō bhūtvā tasthau paramavismitaḥ || 24 ||
pūjayāmāsa taṁ dēvaṁ pādyārghyāsanavandanaiḥ |
praṇamya vidhivaccainaṁ pr̥ṣṭvā:’nāmayamavyayam || 25 ||
athōpaviśya bhagavānāsanē paramārcitē |
vālmīkayē ca r̥ṣayē sandidēśāsanaṁ tataḥ || 26 ||
brahmaṇā samanujñātaḥ sō:’pyupāviśadāsanē |
upaviṣṭē tadā tasminsākṣāllōkapitāmahē || 27 ||
tadgatēnaiva manasā vālmīkirdhyānamāsthitaḥ |
pāpātmanā kr̥taṁ kaṣṭaṁ vairagrahaṇabuddhinā || 28 ||
yastādr̥śaṁ cāruravaṁ krauñcaṁ hanyādakāraṇāt |
śōcannēva muhuḥ krauñcīmupa ślōkamimaṁ punaḥ || 29 ||
punarantargatamanā bhūtvā śōkaparāyaṇaḥ |
tamuvāca tatō brahmā prahasya munipuṅgavam || 30 ||
ślōka ēva tvayā baddhō nātra kāryā vicāraṇā |
macchandādēva tē brahman pravr̥ttē:’yaṁ sarasvatī || 31 ||
rāmasya caritaṁ kr̥tsnaṁ kuru tvamr̥ṣisattama |
dharmātmanō guṇavatō lōkē rāmasya dhīmataḥ || 32 ||
vr̥ttaṁ kathaya vīrasya yathā tē nāradācchrutam |
rahasyaṁ ca prakāśaṁ ca yadvr̥ttaṁ tasya dhīmataḥ || 33 ||
rāmasya saha saumitrē rākṣasānāṁ ca sarvaśaḥ |
vaidēhyāścaiva yadvr̥ttaṁ prakāśaṁ yadi vā rahaḥ || 34 ||
taccāpyaviditaṁ sarvaṁ viditaṁ tē bhaviṣyati |
na tē vāganr̥tā kāvyē kācidatra bhaviṣyati || 35 ||
kuru rāmakathāṁ puṇyāṁ ślōkabaddhāṁ manōramām |
yāvat sthāsyanti girayaḥ saritaśca mahītalē || 36 ||
tāvadrāmāyaṇa kathā lōkēṣu pracariṣyati |
yāvadrāmāyaṇa kathā tvatkr̥tā pracariṣyati || 37 ||
tāvadūrdhvamadhaśca tvaṁ mallōkēṣu nivatsyasi |
ityuktvā bhagavān brahmā tatraivāntaradhīyata || 38 ||
tataḥ saśiṣyō bhagavānmunirvismayamāyayau |
tasya śiṣyāstataḥ sarvē jaguḥ ślōkamimaṁ punaḥ || 39 ||
muhurmuhuḥ prīyamāṇā prāhuśca bhr̥śavismitāḥ |
samākṣaraiścaturbhiryaḥ pādairgītō maharṣiṇā || 40 ||
sō:’nuvyāharaṇādbhūyaḥ śōkaḥ ślōkatvamāgataḥ |
tasya buddhiriyaṁ jātā vālmīkērbhāvitātmanaḥ |
kr̥tsnaṁ rāmāyaṇaṁ kāvyamīdr̥śaiḥ karavāṇyaham || 41 ||
udāravr̥ttārthapadairmanōramai-
-stataḥ sa rāmasya cakāra kīrtimān |
samākṣaraiḥ ślōkaśatairyaśasvinō
yaśaskaraṁ kāvyamudāradhīrmuniḥ || 42 ||
tadupagatasamāsasandhiyōgaṁ
samamadhurōpanatārthavākyabaddham |
raghuvaracaritaṁ munipraṇītaṁ
daśaśirasaśca vadhaṁ niśāmayadhvam || 43 ||
ityārṣē śrīmadrāmāyaṇē vālmīkīyē ādikāvyē bālakāṇḍē dvitīyaḥ sargaḥ || 2 ||
bālakāṇḍa tr̥tīyaḥ sargaḥ (3) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.