Read in తెలుగు / ಕನ್ನಡ / தமிழ் / देवनागरी / English (IAST)
|| rāvaṇavadhōpāyaḥ ||
mēdhāvī tu tatō dhyātvā sa kiñcididamuttaram |
labdhasañjñastatastaṁ tu vēdajñō nr̥pamabravīt || 1 ||
iṣṭiṁ tē:’haṁ kariṣyāmi putrīyāṁ putrakāraṇāt |
atharvaśirasi prōktairmantraiḥ siddhāṁ vidhānataḥ || 2 ||
tataḥ prakramya tāmiṣṭiṁ putrīyāṁ putrakāraṇāt |
juhāva cāgnau tējasvī mantradr̥ṣṭēna karmaṇā || 3 ||
tatō dēvāḥ sagandharvāḥ siddhāśca paramarṣayaḥ |
bhāgapratigrahārthaṁ vai samavētā yathāvidhi || 4 ||
tāḥ samētya yathānyāyaṁ tasminsadasi dēvatāḥ |
abruvam̐llōkakartāraṁ brahmāṇaṁ vacanaṁ mahat || 5 ||
bhagavaṁ-stvatprasādēna rāvaṇō nāma rākṣasaḥ |
sarvānnō bādhatē vīryācchāsituṁ taṁ na śaknumaḥ || 6 ||
tvayā tasmai varō dattaḥ prītēna bhagavanpurā |
mānayantaśca taṁ nityaṁ sarvaṁ tasya kṣamāmahē || 7 ||
udvējayati lōkāṁstrīnucchritāndvēṣṭi durmatiḥ |
śakraṁ tridaśarājānaṁ pradharṣayitumicchati || 8 ||
r̥ṣīnyakṣānsa gandharvānasurānbrāhmaṇāṁstathā |
atikrāmati durdharṣō varadānēna mōhitaḥ || 9 ||
nainaṁ sūryaḥ pratapati pārśvē vāti na mārutaḥ |
calōrmimālī taṁ dr̥ṣṭvā samudrō:’pi na kampatē || 10 ||
sumahannō bhayaṁ tasmādrākṣasādghōradarśanāt |
vadhārthaṁ tasya bhagavannupāyaṁ kartumarhasi || 11 ||
ēvamuktaḥ suraiḥ sarvaiścintayitvā tatō:’bravīt |
hantāyaṁ vihitastasya vadhōpāyō durātmanaḥ || 12 ||
tēna gandharvayakṣāṇāṁ dēvadānavarakṣasām |
avadhyō:’smīti vāguktā tathētyuktaṁ ca tanmayā || 13 ||
nākīrtayadavajñānāttadrakṣō mānuṣāṁstadā |
tasmātsa mānuṣādvadhyō mr̥tyurnānyō:’sya vidyatē || 14 ||
ētacchrutvā priyaṁ vākyaṁ brahmaṇā samudāhr̥tam |
dēvā maharṣayaḥ sarvē prahr̥ṣṭāstē:’bhavaṁstadā || 15 ||
ētasminnantarē viṣṇurupayātō mahādyutiḥ |
śaṅkhacakragadāpāṇiḥ pītavāsā jagatpatiḥ || 16 ||
[* adhikaślōkaḥ –
vainatēyaṁ samārūhya bhāskara tōyadaṁ yathā |
tapta hāṭaka kēyūrō vandyamānaḥ surōttamaiḥ ||
*]
brahmaṇā ca samāgamya tatra tasthau samāhitaḥ |
tamabruvansurāḥ sarvē samabhiṣṭūya saṁnatāḥ || 17 ||
tvāṁ niyōkṣyāmahē viṣṇō lōkānāṁ hitakāmyayā |
rājñō daśarathasya tvamayōdhyādhipatēḥ vibhōḥ || 18 ||
dharmajñasya vadānyasya maharṣisamatējasaḥ |
tasya bhāryāsu tisr̥ṣu hrīśrīkīrtyupamāsu ca || 19 ||
viṣṇō putratvamāgaccha kr̥tvā:’:’tmānaṁ caturvidham |
tatra tvaṁ mānuṣō bhūtvā pravr̥ddhaṁ lōkakaṇṭakam || 20 ||
avadhyaṁ daivatairviṣṇō samarē jahi rāvaṇam |
sa hi dēvānsagandharvānsiddhāṁśca munisattamān || 21 ||
rākṣasō rāvaṇō mūrkhō vīryōtsēkēna bādhatē |
r̥ṣayastu tatastēna gandharvāpsarasastathā || 22 ||
krīḍantō nandanavanē krūrēṇa kila hiṁsitāḥ |
vadhārthaṁ vayamāyātāstasya vai munibhiḥ saha || 23 ||
siddhagandharvayakṣāśca tatastvāṁ śaraṇaṁ gatāḥ |
tvaṁ gatiḥ paramā dēva sarvēṣāṁ naḥ parantapa || 24 ||
vadhāya dēvaśatrūṇāṁ nr̥ṇāṁ lōkē manaḥ kuru |
ēvamuktastu dēvēśō viṣṇustridaśapuṅgavaḥ || 25 ||
pitāmahapurōgāṁstān sarvalōkanamaskr̥taḥ |
abravīt tridaśān sarvān samētān dharmasaṁhitān || 26 ||
bhayaṁ tyajata bhadraṁ vō hitārthaṁ yudhi rāvaṇam |
saputrapautraṁ sāmātyaṁ samitrajñātibāndhavam || 27 ||
hatvā krūraṁ durātmānaṁ dēvarṣīṇāṁ bhayāvaham |
daśa varṣasahasrāṇi daśa varṣaśatāni ca || 28 ||
vatsyāmi mānuṣē lōkē pālayanpr̥thivīmimām |
ēvaṁ dattvā varaṁ dēvō dēvānāṁ viṣṇurātmavān || 29 ||
mānuṣē cintayāmāsa janmabhūmimathātmanaḥ |
tataḥ padmapalāśākṣaḥ kr̥tvā:’:’tmānaṁ caturvidham || 30 ||
pitaraṁ rōcayāmāsa tadā daśarathaṁ nr̥pam |
tatō dēvarṣigandharvāḥ sarudrāḥ sāpsarōgaṇāḥ |
stutibhirdivyarūpābhistuṣṭuvurmadhusūdanam || 31 ||
tamuddhataṁ rāvaṇamugratējasaṁ
pravr̥ddhadarpaṁ tridaśēśvaradviṣam |
virāvaṇaṁ sādhu tapasvi kaṇṭakaṁ
tapasvināmuddhara taṁ bhayāvaham || 32 ||
tamēva hatvā sabalaṁ sabāndhavaṁ
virāvaṇaṁ rāvaṇamugrapauruṣam |
svarlōkamāgaccha gatajvaraściraṁ
surēndraguptaṁ gatadōṣakalmaṣam || 33 ||
ityārṣē śrīmadrāmāyaṇē vālmīkīyē ādikāvyē bālakāṇḍē pañcadaśaḥ sargaḥ || 15 ||
bālakāṇḍa ṣōḍaśaḥ sargaḥ (16) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
