Read in తెలుగు / ಕನ್ನಡ / தமிழ் / देवनागरी / English (IAST)
|| sutīkṣṇābhyanujñā ||
rāmastu sahasaumitriḥ sutīkṣṇēnābhipūjitaḥ |
pariṇāmya niśāṁ tatra prabhātē pratyabudhyata || 1 ||
utthāya tu yathākālaṁ rāghavaḥ saha sītayā |
upāspr̥śatsuśītēna jalēnōtpalagandhinā || 2 ||
atha tē:’gniṁ surāṁścaiva vaidēhī rāmalakṣmaṇau |
kālyaṁ vidhivadabhyarcya tapasviśaraṇē vanē || 3 ||
udayantaṁ dinakaraṁ dr̥ṣṭvā vigatakalmaṣāḥ |
sutīkṣṇamabhigamyēdaṁ ślakṣṇaṁ vacanamabruvan || 4 ||
sukhōṣitāḥ sma bhagavaṁstvayā pūjyēna pūjitāḥ |
āpr̥cchāmaḥ prayāsyāmō munayastvarayanti naḥ || 5 ||
tvarāmahē vayaṁ draṣṭuṁ kr̥tsnamāśramamaṇḍalam |
r̥ṣīṇāṁ puṇyaśīlānāṁ daṇḍakāraṇyavāsinām || 6 ||
abhyanujñātumicchāmaḥ sahaibhirmunipuṅgavaiḥ |
dharmanityaistapōdāntairviśikhairiva pāvakaiḥ || 7 ||
aviṣahyātapō yāvatsūryō nātivirājatē |
amārgēṇāgatāṁ lakṣmīṁ prāpyēvānvayavarjitaḥ || 8 ||
tāvadicchāmahē gantumityuktvā caraṇau munēḥ |
vavandē saha saumitriḥ sītayā saha rāghavaḥ || 9 ||
tau saṁspr̥śantau caraṇāvutthāpya munipuṅgavaḥ |
gāḍhamāliṅgya sasnēhamidaṁ vacanamabravīt || 10 ||
ariṣṭaṁ gaccha panthānaṁ rāma saumitriṇā saha |
sītayā cānayā sārdhaṁ chāyayēvānuvr̥ttayā || 11 ||
paśyāśramapadaṁ ramyaṁ daṇḍakāraṇyavāsinām |
ēṣāṁ tapasvināṁ vīra tapasā bhāvitātmanām || 12 ||
suprājyaphalamūlāni puṣpitāni vanāni ca |
praśastamr̥gayūthāni śāntapakṣigaṇāni ca || 13 ||
phullapaṅkajaṣaṇḍāni prasannasalilāni ca |
kāraṇḍavavikīrṇāni taṭākāni sarāṁsi ca || 14 ||
drakṣyasē dr̥ṣṭiramyāṇi giriprasravaṇāni ca |
ramaṇīyānyaraṇyāni mayūrābhirutāni ca || 15 ||
gamyatāṁ vatsa saumitrē bhavānapi ca gacchatu |
āgantavyaṁ tvayā tāta punarēvāśramaṁ mama || 16 ||
ēvamuktastathētyuktvā kākutsthaḥ sahalakṣmaṇaḥ |
pradakṣiṇaṁ muniṁ kr̥tvā prasthātumupacakramē || 17 ||
tataḥ śubhatarē tūṇī dhanuṣī cāyatēkṣaṇā |
dadau sītā tayōrbhrātrōḥ khaḍgau ca vimalau tataḥ || 18 ||
ābadhya ca śubhē tūṇī cāpau cādāya sasvanau |
niṣkrāntāvāśramādgantumubhau tau rāmalakṣmaṇau || 19 ||
śrīmantau rūpasampannau dīpyamānau svatējasā |
prasthitau dhr̥tacāpau tau sītayā saha rāghavau || 20 ||
ityārṣē śrīmadrāmāyaṇē vālmīkīyē ādikāvyē araṇyakāṇḍē aṣṭamaḥ sargaḥ || 8 ||
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
