Read in తెలుగు / ಕನ್ನಡ / தமிழ் / देवनागरी / English (IAST)
|| apriyapathyavacanam ||
tacchrutvā rākṣasēndrasya vākyaṁ vākyaviśāradaḥ |
pratyuvāca mahāprājñō mārīcō rākṣasēśvaram || 1 ||
sulabhāḥ puruṣā rājan satataṁ priyavādinaḥ |
apriyasya tu pathyasya vaktā śrōtā ca durlabhaḥ || 2 ||
na nūnaṁ buddhyasē rāmaṁ mahāvīryaṁ guṇōnnatam |
ayuktacāraścapalō mahēndravaruṇōpamam || 3 ||
api svasti bhavēttāta sarvēṣāṁ bhuvi rakṣasām |
api rāmō na saṅkruddhaḥ kuryāllōkamarākṣasam || 4 ||
api tē jīvitāntāya nōtpannā janakātmajā |
api sītānimittaṁ ca na bhavēdvyasanaṁ mama || 5 ||
api tvamīśvaraṁ prāpya kāmavr̥ttaṁ niraṅkuśam |
na vinaśyēt purī laṅkā tvayā saha sarākṣasā || 6 ||
tvadvidhaḥ kāmavr̥ttō hi duḥśīlaḥ pāpamantritaḥ |
ātmānaṁ svajanaṁ rāṣṭraṁ sa rājā hanti durmatiḥ || 7 ||
na ca pitrā parityaktō nāmaryādaḥ kathañcana |
na lubdhō na ca duḥśīlō na ca kṣatriyapāṁsanaḥ || 8 ||
na ca dharmaguṇairhīnaḥ kausalyānandavardhanaḥ |
na tīkṣṇō na ca bhūtānāṁ sarvēṣāmahitē rataḥ || 9 ||
vañcitaṁ pitaraṁ dr̥ṣṭvā kaikēyyā satyavādinam |
kariṣyāmīti dharmātmā tāta pravrajitō vanam || 10 ||
kaikēyyāḥ priyakāmārthaṁ piturdaśarathasya ca |
hitvā rājyaṁ ca bhōgāṁśca praviṣṭō daṇḍakāvanam || 11 ||
na rāmaḥ karkaśastāta nāvidvānnājitēndriyaḥ |
anr̥taṁ duḥśrutaṁ caiva naiva tvaṁ vaktumarhasi || 12 ||
rāmō vigrahavān dharmaḥ sādhuḥ satyaparākramaḥ |
rājā sarvasya lōkasya dēvānāṁ maghavāniva || 13 ||
kathaṁ tvaṁ tasya vaidēhīṁ rakṣitāṁ svēna tējasā |
icchasi prasabhaṁ hartuṁ prabhāmiva vivasvataḥ || 14 ||
śarārciṣamanādhr̥ṣyaṁ cāpakhaḍgēndhanaṁ raṇē |
rāmāgniṁ sahasā dīptaṁ na pravēṣṭuṁ tvamarhasi || 15 ||
dhanurvyāditadīptāsyaṁ śarārciṣamamarṣaṇam |
cāpapāśadharaṁ vīraṁ śatrusainyapahāriṇam || 16 ||
rājyaṁ sukhaṁ ca santyajya jīvitaṁ cēṣṭamātmanaḥ |
nātyāsādayituṁ tāta rāmāntakamihārhasi || 17 ||
apramēyaṁ hi tattējō yasya sā janakātmajā |
na tvaṁ samarthastāṁ hartuṁ rāmacāpāśrayāṁ vanē || 18 ||
tasya sā narasiṁhasya siṁhōraskasya bhāminī |
prāṇēbhyō:’pi priyatarā bhāryā nityamanuvratā || 19 ||
na sā dharṣayituṁ śakyā maithilyōjasvinaḥ priyā |
dīptasyēva hutāśasya śikhā sītā sumadhyamā || 20 ||
kimudyamamimaṁ vyarthaṁ kr̥tvā tē rākṣasādhipa |
dr̥ṣṭaścēttvaṁ raṇē tēna tadantaṁ tava jīvitam || 21 ||
jīvitaṁ ca sukhaṁ caiva rājyaṁ caiva sudurlabham |
yadīcchasi ciraṁ bhōktuṁ mā kr̥thā rāmavipriyam || 22 ||
sa sarvaiḥ sacivaiḥ sārdhaṁ vibhīṣaṇapurōgamaiḥ |
mantrayitvā tu dharmiṣṭhaiḥ kr̥tvā niścayamātmanaḥ || 23 ||
dōṣāṇāṁ ca guṇānāṁ ca sampradhārya balābalam |
ātmanaśca balaṁ jñātvā rāghavasya ca tattvataḥ |
hitāhitaṁ viniścitya kṣamaṁ tvaṁ kartumarhasi || 24 ||
ahaṁ tu manyē tava na kṣamaṁ raṇē
samāgamaṁ kōsalarājasūnunā |
idaṁ hi bhūyaḥ śr̥ṇu vākyamuttamaṁ
kṣamaṁ ca yuktaṁ ca niśācarēśvara || 25 ||
ityārṣē śrīmadrāmāyaṇē vālmīkīyē ādikāvyē araṇyakāṇḍē saptatriṁśaḥ sargaḥ || 37 ||
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.