Read in తెలుగు / ಕನ್ನಡ / தமிழ் / देवनागरी / English (IAST)
|| khararāmasamprahāraḥ ||
nihataṁ dūṣaṇaṁ dr̥ṣṭvā raṇē triśirasā saha |
kharasyāpyabhavatrāsō dr̥ṣṭvā rāmasya vikramam || 1 ||
sa dr̥ṣṭvā rākṣasaṁ sainyamaviṣahyaṁ mahābalaḥ |
hatamēkēna rāmēṇa triśirōdūṣaṇāvapi || 2 ||
tadbalaṁ hatabhūyiṣṭhaṁ vimanāḥ prēkṣya rākṣasaḥ |
āsasāda kharō rāmaṁ namucirvāsavaṁ yathā || 3 ||
vikr̥ṣya balavaccāpaṁ nārācānraktabhōjanān |
kharaścikṣēpa rāmāya kruddhānāśīviṣāniva || 4 ||
jyāṁ vidhunvan subahuśaḥ śikṣayā:’strāṇi darśayan |
cakāra samarē mārgān śarai rathagataḥ kharaḥ || 5 ||
sa sarvāśca diśō bāṇaiḥ pradiśaśca mahārathaḥ |
pūrayāmāsa taṁ dr̥ṣṭvā rāmō:’pi sumahaddhanuḥ || 6 ||
sa sāyakairdurviṣahaiḥ sasphuliṅgairivāgnibhiḥ |
nabhaścakārāvivaraṁ parjanya iva vr̥ṣṭibhiḥ || 7 ||
tadbabhūva śitairbāṇaiḥ khararāmavisarjitaiḥ |
paryākāśamanākāśaṁ sarvataḥ śarasaṅkulam || 8 ||
śarajālāvr̥taḥ sūryō na tadā sma prakāśatē |
anyōnyavadhasaṁrambhādubhayōḥ samprayudhyatōḥ || 9 ||
tatō nālīkanārācaistīkṣṇāgraiśca vikarṇibhiḥ |
ājaghāna kharō rāmaṁ tōtrairiva mahādvipam || 10 ||
taṁ rathasthaṁ dhanuṣpāṇiṁ rākṣasaṁ paryavasthitam |
dadr̥śuḥ sarvabhūtāni pāśahastamivāntakam || 11 ||
hantāraṁ sarvasainyasya pauruṣē paryavasthitam |
pariśrāntaṁ mahāsattvaṁ mēnē rāmaṁ kharastadā || 12 ||
taṁ siṁhamiva vikrāntaṁ siṁhavikrāntagāminam |
dr̥ṣṭvā nōdvijatē rāmaḥ siṁhaḥ kṣudramr̥gaṁ yathā || 13 ||
tataḥ sūryanikāśēna rathēna mahatā kharaḥ |
āsasāda raṇē rāmaṁ pataṅga iva pāvakam || 14 ||
tatō:’sya saśaraṁ cāpaṁ muṣṭidēśē mahātmanaḥ |
kharaścicchēda rāmasya darśayan pāṇilāghavam || 15 ||
sa punastvaparān sapta śarānādāya varmaṇi |
nijaghāna kharaḥ kruddhaḥ śakrāśanisamaprabhān || 16 ||
tatastatprahataṁ bāṇaiḥ kharamuktaiḥ suparvabhiḥ |
papāta kavacaṁ bhūmau rāmasyādityavarcasaḥ || 17 ||
tataḥ śarasahasrēṇa rāmamapratimaujasam |
ardayitvā mahānādaṁ nanāda samērē kharaḥ || 18 ||
sa śarairarpitaḥ kruddhaḥ sarvagātrēṣu rāghavaḥ |
rarāja samarē rāmō vidhūmō:’gniriva jvalan || 19 ||
tatō gambhīranirhrādaṁ rāmaḥ śatrunibarhaṇaḥ |
cakārāntāya sa ripōḥ sajyamanyanmahaddhanuḥ || 20 ||
sumahadvaiṣṇavaṁ yattadatisr̥ṣṭaṁ maharṣiṇā |
varaṁ taddhanurudyamya kharaṁ samabhidhāvata || 21 ||
tataḥ kanakapuṅkhaistu śaraiḥ sannataparvabhiḥ |
bibhēda rāmaḥ saṅkruddhaḥ kharasya samarē dhvajam || 22 ||
sa darśanīyō bahudhā vikīrṇaḥ kāñcanadhvajaḥ |
jagāma dharaṇīṁ sūryō dēvatānāmivājñayā || 23 ||
taṁ caturbhiḥ kharaḥ kruddhō rāmaṁ gātrēṣu mārgaṇaiḥ |
vivyādha yudhi marmajñō mātaṅgamiva tōmaraiḥ || 24 ||
sa rāmō bahubhirbāṇaiḥ kharakārmukaniḥsr̥taiḥ |
viddhō rudhirasiktāṅgō babhūva ruṣitō bhr̥śam || 25 ||
sa dhanurdhanvināṁ śrēṣṭhaḥ pragr̥hya paramāhavē |
mumōca paramēṣvāsaḥ ṣaṭ śarānabhilakṣitān || 26 ||
śirasyēkēna bāṇēna dvābhyāṁ bāhvōrathārdayat |
tribhiścandrārdhavaktraiśca vakṣasyabhijaghāna ha || 27 ||
tataḥ paścānmahātējā nārācān bhāskarōpamān |
jighāṁsū rākṣasaṁ kruddhastrayōdaśa samādadē || 28 ||
tatō:’sya yugamēkēna caturbhiścaturō hayān |
ṣaṣṭhēna tu śiraḥ saṅkhyē kharasya rathasārathēḥ || 29 ||
tribhistrivēṇuṁ balavān dvābhyāmakṣaṁ mahābalaḥ |
dvādaśēna tu bāṇēna kharasya saśaraṁ dhanuḥ || 30 ||
chittvā vajranikāśēna rāghavaḥ prahasanniva |
trayōdaśēnēndrasamō bibhēda samarē kharam || 31 ||
prabhagnadhanvā virathō hatāśvō hatasārathiḥ |
gadāpāṇiravaplutya tasthau bhūmau kharastadā || 32 ||
tatkarma rāmasya mahārathasya
samētya dēvāśca maharṣayaśca |
apūjayan prāñjalayaḥ prahr̥ṣṭā-
-stadā vimānāgragatāḥ samētāḥ || 33 ||
ityārṣē śrīmadrāmāyaṇē vālmīkiyē araṇyakāṇḍē aṣṭāviṁśaḥ sargaḥ || 28 ||
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
