Aranya Kanda Sarga 27 – araṇyakāṇḍa saptaviṁśaḥ sargaḥ (27)


|| triśirōvadhaḥ ||

kharaṁ tu rāmābhimukhaṁ prayāntaṁ vāhinīpatiḥ |
rākṣasastriśirā nāma sannipatyēdamabravīt || 1 ||

māṁ niyōjaya vikrānta sannivartasva sāhasāt |
paśya rāmaṁ mahābāhuṁ samyugē vinipātitam || 2 ||

pratijānāmi tē satyamāyudhaṁ cāhamālabhē |
yathā rāmaṁ vadhiṣyāmi vadhārhaṁ sarvarakṣasām || 3 ||

ahaṁ vā:’sya raṇē mr̥tyurēṣa vā samarē mama |
vinivr̥tya raṇōtsāhān muhūrtaṁ prāśnikō bhava || 4 ||

prahr̥ṣṭē vā hatē rāmē janasthānaṁ prayāsyasi |
mayi vā nihatē rāmaṁ samyugāyōpayāsyasi || 5 ||

kharastriśirasā tēna mr̥tyulōbhātprasāditaḥ |
gaccha yudhyētyanujñātō rāghavābhimukhō yayau || 6 ||

triśirāśca rathēnaiva vājiyuktēna bhāsvatā |
abhyadravadraṇē rāmaṁ triśr̥ṅga iva parvataḥ || 7 ||

śaradhārāsamūhān sa mahāmēgha ivōtsr̥jam |
vyasr̥jatsadr̥śaṁ nādaṁ jalārdrasya tu dundubhēḥ || 8 ||

āgacchanta triśirasaṁ rākṣasaṁ prēkṣya rāghavaḥ |
dhanuṣā pratijagrāha vidhūnvan sāyakān śitān || 9 ||

sa samprahārastumulō rāmatriśirasōrmahān |
babhūvātīva balinōḥ siṁhakuñjarayōriva || 10 ||

tatastriśirasā bāṇairlalāṭē tāḍitāstribhiḥ |
amarṣī kupitō rāmaḥ saṁrabdhamidamabravīt || 11 ||

ahō vikramaśūrasya rākṣasasyēdr̥śaṁ balam |
puṣpairiva śarairyasya lalāṭē:’smi parikṣataḥ || 12 ||

mamāpi pratigr̥hṇīṣva śarāṁścāpaguṇacyutān |
ēvamuktvā tu saṁrabdhaḥ śarānāśīviṣōpamān || 13 ||

triśirōvakṣasi kruddhō nijaghāna caturdaśa |
caturbhisturagānasya śaraiḥ sannataparvabhiḥ || 14 ||

nyapātayata tējasvī caturastasya vājinaḥ |
aṣṭabhiḥ sāyakaiḥ sūtaṁ rathōpasthān nyapātayat || 15 ||

rāmaścicchēda bāṇēna dhvajaṁ cāsya samucchritam |
tatō hatarathāttasmādutpatantaṁ niśācaram || 16 ||

vibhēda rāmastaṁ bāṇairhr̥dayē sōbhavajjaḍaḥ |
sāyakaiścāpramēyātmā sāmarṣastasya rakṣasaḥ || 17 ||

śirāṁsyapātayadrāmō vēgavadbhistribhiḥ śitaiḥ |
sa bhūmau rudhirōdgārī rāmabāṇābhipīḍitaḥ || 18 ||

nyapatatpatitaiḥ pūrvaṁ svaśirōbhirniśācaraḥ |
hataśēṣāstatō bhagnā rākṣasāḥ kharasaṁśrayāḥ || 19 ||

dravanti sma na tiṣṭhanti vyāghratrastā mr̥gā iva |
tān kharō dravatō dr̥ṣṭvā nivartya ruṣitaḥ svayam |
rāmamēvābhidudrāva rāhuścandramasaṁ yathā || 20 ||

ityārṣē śrīmadrāmāyaṇē vālmīkīyē ādikāvyē araṇyakāṇḍē saptaviṁśaḥ sargaḥ || 27 ||


See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.


పైరసీ ప్రకటన : నాగేంద్రాస్ న్యూ గొల్లపూడి వీరాస్వామి సన్ మరియు శ్రీఆదిపూడి వెంకటశివసాయిరామ్ గారు కలిసి మా రెండు పుస్తకాలను ("శ్రీ వారాహీ స్తోత్రనిధి" మరియు "శ్రీ శ్యామలా స్తోత్రనిధి") ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed