Read in తెలుగు / ಕನ್ನಡ / தமிழ் / देवनागरी / English (IAST)
|| śūrpaṇakhābhāvāviṣkaraṇam ||
kr̥tābhiṣēkō rāmastu sītā saumitrirēva ca |
tasmādgōdāvarītīrāttatō jagmuḥ svamāśramam || 1 ||
āśramaṁ tamupāgamya rāghavaḥ sahalakṣmaṇaḥ |
kr̥tvā paurvāhṇikaṁ karma parṇaśālāmupāgamat || 2 ||
uvāsa sukhitastatra pūjyamānō maharṣibhiḥ |
lakṣmaṇēna saha bhrātrā cakāra vividhāḥ kathāḥ || 3 ||
sa rāmaḥ parṇaśālāyāmāsīnaḥ saha sītayā |
virarāja mahābāhuścitrayā candramā iva || 4 ||
tathāsīnasya rāmasya kathāsaṁsaktacētasaḥ |
taṁ dēśaṁ rākṣasī kācidājagāma yadr̥cchayā || 5 ||
sā tu śūrpaṇakhā nāma daśagrīvasya rakṣasaḥ |
bhaginī rāmamāsādya dadarśa tridaśōpamam || 6 ||
siṁhōraskaṁ mahābāhuṁ padmapatranibhēkṣaṇam |
ājānubāhuṁ dīptāsyamatīva priyadarśanam || 7 ||
gajavikrāntagamanaṁ jaṭāmaṇḍaladhāriṇam |
sukumāraṁ mahāsattvaṁ pārthivavyañjanānvitam || 8 ||
rāmamindīvaraśyāmaṁ kandarpasadr̥śaprabham |
babhūvēndrōpamaṁ dr̥ṣṭvā rākṣasī kāmamōhitā || 9 ||
sumukhaṁ durmukhī rāmaṁ vr̥ttamadhyaṁ mahōdarī |
viśālākṣaṁ virūpākṣī sukēśaṁ tāmramūrdhajā || 10 ||
prītirūpaṁ virūpā sā susvaraṁ bhairavasvarā |
taruṇaṁ dāruṇā vr̥ddhā dakṣiṇaṁ vāmabhāṣiṇī || 11 ||
nyāyavr̥ttaṁ sudurvr̥ttā priyamapriyadarśanā |
śarīrajasamāviṣṭā rākṣasī vākyamabravīt || 12 ||
jaṭī tāpasarūpēṇa sabhāryaḥ śaracāpadhr̥t |
āgatastvamimaṁ dēśaṁ kathaṁ rākṣasasēvitam || 13 ||
kimāgamanakr̥tyaṁ tē tattvamākhyātumarhasi |
ēvamuktastu rākṣasyā śūrpaṇakhyā parantapaḥ || 14 ||
r̥jubuddhitayā sarvamākhyātumupacakramē |
anr̥taṁ na hi rāmasya kadācidapi sammatam || 15 ||
viśēṣēṇāśramasthasya samīpē strījanasya ca |
āsīddaśarathō nāma rājā tridaśavikramaḥ || 16 ||
tasyāhamagrajaḥ putrō rāmō nāma janaiḥ śrutaḥ |
bhrātāyaṁ lakṣmaṇō nāma yavīyān māmanuvrataḥ || 17 ||
iyaṁ bhāryā ca vaidēhī mama sītēti viśrutā |
niyōgāttu narēndrasya piturmātuśca yantritaḥ || 18 ||
dharmārthaṁ dharmakāṅkṣī ca vanaṁ vastumihāgataḥ |
tvāṁ tu vēditumicchāmi kathyatāṁ kā:’si kasya vā || 19 ||
na hi tāvanmanōjñāṅgī rākṣasī pratibhāsi mē |
iha vā kiṁ nimittaṁ tvamāgatā brūhi tattvataḥ || 20 ||
sā:’bravīdvacanaṁ śrutvā rākṣasī madanārditā |
śrūyatāṁ rāma vakṣyāmi tattvārthaṁ vacanaṁ mama || 21 ||
ahaṁ śūrpaṇakhā nāma rākṣasī kāmarūpiṇī |
araṇyaṁ vicarāmīdamēkā sarvabhayaṅkarā || 22 ||
rāvaṇō nāma mē bhrātā balīyān rākṣasēśvaraḥ |
vīrō viśravasaḥ putrō yadi tē śrōtramāgataḥ || 23 ||
pravr̥ddhanidraśca sadā kumbhakarṇō mahābalaḥ |
vibhīṣaṇastu dharmātmā na tu rākṣasacēṣṭitaḥ || 24 ||
prakhyātavīryau ca raṇē bhrātarau kharadūṣaṇau |
tānahaṁ samatikrāntā rāma tvāpūrvadarśanāt || 25 ||
samupētā:’smi bhāvēna bhartāraṁ puruṣōttamam |
ahaṁ prabhāvasampannā svacchandabalagāminī || 26 ||
cirāya bhava mē bhartā sītayā kiṁ kariṣyasi |
vikr̥tā ca virūpā ca na cēyaṁ sadr̥śī tava || 27 ||
ahamēvānurūpā tē bhāryārūpēṇa paśya mām |
imāṁ virūpāmasatīṁ karālāṁ nirṇatōdarīm || 28 ||
anēna tē saha bhrātrā bhakṣayiṣyāmi mānuṣīm |
tataḥ parvataśr̥ṅgāṇi vanāni vividhāni ca || 29 ||
paśyansaha mayā kānta daṇḍakānvicariṣyasi |
ityēvamuktaḥ kākutsthaḥ prahasya madirēkṣaṇām || 30 ||
idaṁ vacanamārēbhē vaktuṁ vākyaviśāradaḥ || 31 ||
ityārṣē śrīmadrāmāyaṇē vālmīkīyē ādikāvyē araṇyakāṇḍē saptadaśaḥ sargaḥ || 17 ||
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.
గమనిక: శరన్నవరాత్రుల సందర్భంగా "శ్రీ లలితా స్తోత్రనిధి" మరియు "శ్రీ దుర్గా స్తోత్రనిధి" పుస్తకములు కొనుగోలుకు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
