Read in తెలుగు / ಕನ್ನಡ / தமிழ் / देवनागरी / English (IAST)
|| ఉమామాహాత్మ్యమ్ ||
ఉక్తవాక్యే మునౌ తస్మిన్నుభౌ రాఘవలక్ష్మణౌ |
అభినంద్య కథాం వీరావూచతుర్మునిపుంగవమ్ || ౧ ||
ధర్మయుక్తమిదం బ్రహ్మన్కథితం పరమం త్వయా |
దుహితుః శైలరాజస్య జ్యేష్ఠాయా వక్తుమర్హసి || ౨ ||
విస్తరం విస్తరజ్ఞోఽసి దివ్యమానుషసంభవమ్ |
త్రీన్పథో హేతునా కేన ప్లావయేల్లోకపావనీ || ౩ ||
కథం గంగా త్రిపథగా విశ్రుతా సరిదుత్తమా |
త్రిషు లోకేషు ధర్మజ్ఞ కర్మభిః కైః సమన్వితా || ౪ ||
తథా బ్రువతి కాకుత్స్థే విశ్వామిత్రస్తపోధనః |
నిఖిలేన కథాం సర్వామృషిమధ్యే న్యవేదయత్ || ౫ ||
పురా రామ కృతోద్వాహో నీలకంఠో మహాతపాః | [శితికంఠో]
దృష్ట్వా చ స్పృహయా దేవీం మైథునాయోపచక్రమే || ౬ ||
శితికంఠస్య దేవస్య దివ్యం వర్షశతం గతమ్ |
తస్య సంక్రీడమానస్య మహాదేవస్య ధీమతః || ౭ ||
న చాపి తనయో రామ తస్యామాసీత్పరంతప |
తతో దేవాః సముద్విగ్నాః పితామహపురోగమాః || ౮ ||
యదిహోత్పద్యతే భూతం కస్తత్ప్రతిసహిష్యతే |
అభిగమ్య సురాః సర్వే ప్రణిపత్యేదమబ్రువన్ || ౯ ||
దేవ దేవ మహాదేవ లోకస్యాస్య హితే రత |
సురాణాం ప్రణిపాతేన ప్రసాదం కర్తుమర్హసి || ౧౦ ||
న లోకా ధారయిష్యంతి తవ తేజః సురోత్తమ |
బ్రాహ్మేణ తపసా యుక్తో దేవ్యా సహ తపశ్చర || ౧౧ ||
త్రైలోక్యహితకామార్థం తేజస్తేజసి ధారయ |
రక్ష సర్వానిమాఁల్లోకాన్నాలోకం కర్తుమర్హసి || ౧౨ ||
దేవతానాం వచః శ్రుత్వా సర్వలోకమహేశ్వరః |
బాఢమిత్యబ్రవీత్సర్వాన్పునశ్చేదమువాచ హ || ౧౩ ||
ధారయిష్యామ్యహం తేజస్తేజస్యేవ సహోమయా |
త్రిదశాః పృథివీ చైవ నిర్వాణమధిగచ్ఛతు || ౧౪ ||
యదిదం క్షుభితం స్థానాన్మమ తేజో హ్యనుత్తమమ్ |
ధారయిష్యతి కస్తన్మే బ్రువంతు సురసత్తమాః || ౧౫ ||
ఏవముక్తాస్తతో దేవాః ప్రత్యూచుర్వృషభధ్వజమ్ |
యత్తేజః క్షుభితం హ్యేతత్తద్ధరా ధారయిష్యతి || ౧౬ ||
ఏవముక్తః సురపతిః ప్రముమోచ మహీతలే |
తేజసా పృథివీ యేన వ్యాప్తా సగిరికాననా || ౧౭ ||
తతో దేవాః పునరిదమూచుశ్చాథ హుతాశనమ్ |
ప్రవిశ త్వం మహాతేజో రౌద్రం వాయుసమన్వితః || ౧౮ ||
తదగ్నినా పునర్వ్యాప్తం సంజాతః శ్వేతపర్వతః |
దివ్యం శరవణం చైవ పావకాదిత్యసన్నిభమ్ || ౧౯ ||
యత్ర జాతో మహాతేజాః కార్తికేయోఽగ్నిసంభవః |
అథోమాం చ శివం చైవ దేవాః సర్షిగణాస్తదా || ౨౦ ||
పూజయామాసురత్యర్థం సుప్రీతమనసస్తతః |
అథ శైలసుతా రామ త్రిదశానిదమబ్రవీత్ || ౨౧ ||
అప్రియస్య కృతస్యాద్య ఫలం ప్రాప్స్యథ మే సురాః |
ఇత్యుక్త్వా సలిలం గృహ్య పార్వతీ భాస్కరప్రభా || ౨౨ ||
సమన్యురశపత్సర్వాన్క్రోధసంరక్తలోచనా |
యస్మాన్నివారితా చైవ సంగతిః పుత్రకామ్యయా || ౨౩ ||
అపత్యం స్వేషు దారేషు నోత్పాదయితుమర్హథ |
అద్యప్రభృతి యుష్మాకమప్రజాః సంతు పత్నయః || ౨౪ ||
ఏవముక్త్వా సురాన్ సర్వాన్ శశాప పృథివీమపి |
అవనే నైకరూపా త్వం బహుభార్యా భవిష్యసి || ౨౫ ||
న చ పుత్రకృతాం ప్రీతిం మత్క్రోధకలుషీకృతా |
ప్రాప్స్యసి త్వం సుదుర్మేధే మమ పుత్రమనిచ్ఛతీ || ౨౬ ||
తాన్సర్వాన్వ్రీడితాన్దృష్ట్వా సురాన్సురపతిస్తదా |
గమనాయోపచక్రామ దిశం వరుణపాలితామ్ || ౨౭ ||
స గత్వా తప ఆతిష్ఠత్పార్శ్వే తస్యోత్తరే గిరేః |
హిమవత్ప్రభవే శృంగే సహ దేవ్యా మహేశ్వరః || ౨౮ ||
ఏష తే విస్తరో రామ శైలపుత్ర్యా నివేదితః |
గంగాయాః ప్రభవం చైవ శృణు మే సహలక్ష్మణః || ౨౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాండే షట్త్రింశః సర్గః || ౩౬ ||
బాలకాండ సప్తత్రింశః సర్గః (౩౭) >>
సంపూర్ణ వాల్మీకి రామాయణే బాలకాండ చూడండి.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.