Read in తెలుగు / ಕನ್ನಡ / தமிழ் / देवनागरी / English (IAST)
|| సుపార్శ్వవచనానువాదః ||
తతస్తదమృతాస్వాదం గృధ్రరాజేన భాషితమ్ |
నిశమ్య ముదితా హృష్టాస్తే వచః ప్లవగర్షభాః || ౧ ||
జాంబవాన్ వానరశ్రేష్ఠః సహ సర్వైః ప్లవంగమైః |
భూతలాత్సహసోత్థాయ గృధ్రరాజమథాభ్రవీత్ || ౨ ||
క్వ సీతా కేన వా దృష్టా కో వా హరతి మైథిలీమ్ |
తదాఖ్యాతు భవాన్ సర్వం గతిర్భవ వనౌకసామ్ || ౩ ||
కో దాశరథిబాణానాం వజ్రవేగనిపాతినామ్ |
స్వయం లక్ష్మణముక్తానాం న చింతయతి విక్రమమ్ || ౪ ||
స హరీన్ ప్రీతిసంయుక్తాన్ సీతాశ్రుతిసమాహితాన్ |
పునరాశ్వాసయన్ ప్రీత ఇదం వచనమబ్రవీత్ || ౫ ||
శ్రూయతామిహ వైదేహ్యా యథా మే హరణం శ్రుతమ్ |
యేన చాపి మమాఖ్యాతం యత్ర వాఽఽయతలోచనా || ౬ ||
అహమస్మిన్ గిరౌ దుర్గే బహుయోజనమాయతే |
చిరాన్నిపతితో వృద్ధః క్షీణప్రాణపరాక్రమః || ౭ ||
తం మామేవం గతం పుత్రః సుపార్శ్వో నామ నామతః |
ఆహారేణ యథాకాలం బిభర్తి పతతాం వరః || ౮ ||
తీక్ష్ణకామాస్తు గంధర్వాస్తీక్ష్ణకోపా భుజంగమాః |
మృగాణాం తు భయం తీక్ష్ణం తతస్తీక్ష్ణక్షుధా వయమ్ || ౯ ||
స కదాచిత్ క్షుధార్తస్య మమాహారాభికాంక్షిణః |
గతసూర్యేఽహని ప్రాప్తో మమ పుత్రో హ్యనామిషః || ౧౦ ||
స మయా వృద్ధభావాచ్చ కోపాచ్చ పరిభర్త్సితః |
క్షుత్పిపాసాపరీతేన కుమారః పతతాం వరః || ౧౧ ||
స మామాహారసంరోధాత్ పీడితః ప్రీతివర్ధనః |
అనుమాన్య యథాతత్త్వమిదం వచనమబ్రవీత్ || ౧౨ ||
అహం తాత యథాకాలమామిషార్థీ ఖమాప్లుతః |
మహేంద్రస్య గిరేర్ద్వారమావృత్య చ సమాస్థితః || ౧౩ ||
తతః సత్త్వసహస్రాణాం సాగరాంతరచారిణామ్ |
పంథానమేకోఽధ్యవసం సన్నిరోద్ధుమవాఙ్ముఖః || ౧౪ ||
తత్ర కశ్చిన్మయా దృష్టః సూర్యోదయసమప్రభామ్ |
స్త్రియమాదాయ గచ్ఛన్ వై భిన్నాంజనచయోపమః || ౧౫ ||
సోఽహమభ్యవహారార్థం తౌ దృష్ట్వా కృతనిశ్చయః |
తేన సామ్నా వినీతేన పంథానమభియాచితః || ౧౬ ||
న హి సామోపపన్నానాం ప్రహర్తా విద్యతే క్వచిత్ |
నీచేష్వపి జనః కశ్చిత్కిమంగ బత మద్విధః || ౧౭ ||
స యాతస్తేజసా వ్యోమ సంక్షిపన్నివ వేగతః |
అథాహం ఖచరైర్భూతైరభిగమ్య సభాజితః || ౧౮ ||
దిష్ట్యా జీవసి తాతేతి హ్యబ్రువన్మాం మహర్షయః |
కథంచిత్ సకలత్రోఽసౌ గతస్తే స్వస్త్యసంశయమ్ || ౧౯ ||
ఏవముక్తస్తతోఽహం తైః సిద్ధైః పరమశోభనైః |
స చ మే రావణో రాజా రక్షసాం ప్రతివేదితః || ౨౦ ||
హరన్ దాశరథేర్భార్యాం రామస్య జనకాత్మజామ్ |
భ్రష్టాభరణకౌశేయాం శోకవేగపరాజితామ్ || ౨౧ ||
రామలక్ష్మణయోర్నామ క్రోశంతీం ముక్తమూర్ధజామ్ |
ఏష కాలాత్యయస్తావదితి కాలవిదాం వరః || ౨౨ ||
ఏతమర్థం సమగ్రం మే సుపార్శ్వః ప్రత్యవేదయత్ |
తచ్ఛ్రుత్వాఽపి హి మే బుద్ధిర్నాసీత్కాచిత్పరాక్రమే || ౨౩ ||
అపక్షో హి కథం పక్షీ కర్మ కించిదుపక్రమే |
యత్తు శక్యం మయా కర్తుం వాగ్బుద్ధిగుణవర్తినా || ౨౪ ||
శ్రూయతాం తత్ప్రవక్ష్యామి భవతాం పౌరుషాశ్రయమ్ |
వాఙ్మతిభ్యాం తు సర్వేషాం కరిష్యామి ప్రియం హి వః || ౨౫ ||
యద్ధి దాశరథేః కార్యం మమ తన్నాత్ర సంశయః |
తే భవంతో మతిశ్రేష్ఠా బలవంతో మనస్వినః || ౨౬ ||
ప్రేషితాః కపిరాజేన దేవైరపి దురాసదాః |
రామలక్ష్మణబాణాశ్చ నిశితాః కంకపత్రిణః || ౨౭ ||
త్రయాణామపి లోకానాం పర్యాప్తాస్త్రాణనిగ్రహే |
కామం ఖలు దశగ్రీవంస్తేజోబలసమన్వితః || ౨౮ ||
భవతాం తు సమర్థానాం న కించిదపి దుష్కరమ్ |
తదలం కాలసంగేన క్రియతాం బుద్ధినిశ్చయః |
న హి కర్మసు సజ్జంతే బుద్ధిమంతో భవద్విధాః || ౨౯ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే ఏకోనషష్టితమః సర్గః || ౫౯ ||
సంపూర్ణ వాల్మీకి రామాయణే కిష్కింధాకాండ చూడండి.
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
