Read in తెలుగు / ಕನ್ನಡ / தமிழ் / देवनागरी / English (IAST)
|| ప్రాయోపవేశః ||
శ్రుత్వా హనుమతో వాక్యం ప్రశ్రితం ధర్మసంహితమ్ |
స్వామిసత్కారసంయుక్తమంగదో వాక్యమబ్రవీత్ || ౧ ||
స్థైర్యమాత్మ మనఃశౌచమానృశంస్యమథార్జవమ్ |
విక్రమశ్చైవ ధైర్యం చ సుగ్రీవే నోపపద్యతే || ౨ ||
భ్రాతుర్జ్యేష్ఠస్య యో భార్యాం జీవితో మహిషీం ప్రియామ్ |
ధర్మేణ మాతరం యస్తు స్వీకరోతి జుగుప్సితః || ౩ ||
కథం స ధర్మం జానీతే యేన భ్రాత్రా మహాత్మనా |
యుద్ధాయాభినియుక్తేన బిలస్య పిహితం ముఖమ్ || ౪ ||
సత్యాత్పాణిగృహీతశ్చ కృతకర్మా మహాయశాః |
విస్మృతో రాఘవో యేన స కస్య తు కృతం స్మరేత్ || ౫ ||
లక్ష్మణస్య భయాద్యేన నాధర్మభయభీరుణా |
ఆదిష్టా మార్గితుం సీతాం ధర్మమస్మిన్ కథం భవేత్ || ౬ ||
తస్మిన్ పాపే కృతఘ్నే తు స్మృతిహీనే చలాత్మని |
ఆర్యః కో విశ్వసేజ్జాతు తత్కులీనో జిజీవిషుః || ౭ ||
రాజ్యే పుత్రః ప్రతిష్ఠాప్యః సగుణో నిర్గుణోఽపి వా |
కథం శత్రుకులీనం మాం సుగ్రీవో జీవయిష్యతి || ౮ ||
భిన్నమంత్రోఽపరాద్ధశ్చ హీనశక్తిః కథం హ్యహమ్ |
కిష్కింధాం ప్రాప్య జీవేయమనాథ ఇవ దుర్బలః || ౯ ||
ఉపాంశుదండేన హి మాం బంధనేనోపపాదయేత్ |
శఠః క్రూరో నృశంసశ్చ సుగ్రీవో రాజ్యకారణాత్ || ౧౦ ||
బంధనాద్వాఽవసాదాన్మే శ్రేయః ప్రాయోపవేశనమ్ |
అనుజానీత మాం సర్వే గృహం గచ్ఛంతు వానరాః || ౧౧ ||
అహం వః ప్రతిజానామి నాగమిష్యామ్యహం పురీమ్ |
ఇహైవ ప్రాయమాసిష్యే శ్రేయో మరణమేవ మే || ౧౨ ||
అభివాదనపూర్వం తు రాఘవౌ బలశాలినౌ |
అభివాదనపూర్వం తు రాజా కుశలమేవ చ || ౧౩ ||
వాచ్యస్తాతో యవీయాన్ మే సుగ్రీవో వానరేశ్వరః |
ఆరోగ్యపూర్వం కుశలం వాచ్యా మాతా రుమా చ మే || ౧౪ ||
మాతరం చైవ మే తారామాశ్వాసయితుమర్హథ |
ప్రకృత్యా ప్రియపుత్రా సా సానుక్రోశా తపస్వినీ || ౧౫ ||
వినష్టమిహ మాం శ్రుత్వా వ్యక్తం హాస్యతి జీవితమ్ |
ఏతావదుక్త్వా వచనం వృద్ధాంస్తానభివాద్య చ || ౧౬ ||
వివేశ చాంగదో భూమౌ రుదన్ దర్భేషు దుర్మనాః |
తస్య సంవిశతస్తత్ర రుదంతో వానరర్షభాః || ౧౭ ||
నయనేభ్యః ప్రముముచురుష్ణం వై వారి దుఃఖితాః |
సుగ్రీవం చైవ నిందంతః ప్రశంసంతశ్చ వాలినమ్ || ౧౮ ||
పరివార్యాంగదం సర్వే వ్యవసన్ ప్రాయమాసితుమ్ |
మతం తద్వాలిపుత్రస్య విజ్ఞాయ ప్లవగర్షభాః || ౧౯ ||
ఉపస్పృశ్యోదకం తత్ర ప్రాఙ్ముఖాః సముపావిశన్ |
దక్షిణాగ్రేషు దర్భేషు ఉదక్తీరం సమాశ్రితాః || ౨౦ ||
ముమూర్షవో హరిశ్రేష్ఠా ఏతత్క్షమమితి స్మ హ |
రామస్య వనవాసం చ క్షయం దశరథస్య చ || ౨౧ ||
జనస్థానవధం చైవ వధం చైవ జటాయుషః |
హరణం చైవ వైదేహ్యా వాలినశ్చ వధం రణే |
రామకోపం చ వదతాం హరీణాం భయమాగతమ్ || ౨౨ ||
ఏవం వదద్భిర్బహుభిర్మహీధరో
మహాద్రికూటప్రతిమైః ప్లవంగమైః |
బభూవ సన్నాదితనిర్దరాంతరో
భృశం నదద్భిర్జలదైరివోల్బణైః || ౨౩ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే పంచపంచాశః సర్గః || ౫౫ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
