Read in తెలుగు / ಕನ್ನಡ / தமிழ் / देवनागरी / English (IAST)
|| తారాహితోక్తిః ||
అథ తస్య నినాదం తు సుగ్రీవస్య మహాత్మనః |
శుశ్రావాంతఃపురగతో వాలీ భ్రాతురమర్షణః || ౧ ||
శ్రుత్వా తు తస్య నినదం సర్వభూతప్రకంపనమ్ |
మదశ్చైకపదే నష్టః క్రోధశ్చాపతితో మహాన్ || ౨ ||
స తు రోషపరీతాంగో వాలీ సంధ్యాతపప్రభః |
ఉపరక్త ఇవాదిత్యః సద్యో నిష్ప్రభతాం గతః || ౩ ||
వాలీ దంష్ట్రాకరాళస్తు క్రోధాద్దీప్తాగ్నిసన్నిభః |
భాత్యుత్పతితపద్మాభః సమృణాళ ఇవ హ్రదః || ౪ ||
శబ్దం దుర్మర్షణం శ్రుత్వా నిష్పపాత తతో హరిః |
వేగేన చరణన్యాసైర్దారయన్నివ మేదినీమ్ || ౫ ||
తం తు తారా పరిష్వజ్య స్నేహాద్దర్శితసౌహృదా |
ఉవాచ త్రస్తాసంభ్రాంతా హితోదర్కమిదం వచః || ౬ ||
సాధు క్రోధమిమం వీర నదీవేగమివాగతమ్ |
శయనాదుత్థితః కాల్యం త్యజ భుక్తామివ స్రజమ్ || ౭ ||
కాల్యమేతేన సంగ్రామం కరిష్యసి హరీశ్వర |
వీర తే శత్రుబాహుల్యం ఫల్గుతా వా న విద్యతే || ౮ ||
సహసా తవ నిష్క్రామో మమ తావన్న రోచతే |
శ్రూయతాం చాభిధాస్యామి యన్నిమిత్తం నివార్యసే || ౯ ||
పూర్వమాపతితః క్రోధాత్ స త్వామాహ్వయతే యుధి |
నిష్పత్య చ నిరస్తస్తే హన్యమానో దిశో గతః || ౧౦ ||
త్వయా తస్య నిరస్తస్య పీడితస్య విశేషతః |
ఇహైత్య పునరాహ్వానం శంకాం జనయతీవ మే || ౧౧ ||
దర్పశ్చ వ్యవసాయశ్చ యాదృశస్తస్య నర్దతః |
నినాదస్య చ సంరంభో నైతదల్పం హి కారణమ్ || ౧౨ ||
నాసహాయమహం మన్యే సుగ్రీవం తమిహాగతమ్ |
అవష్టబ్ధసహాయశ్చ యమాశ్రిత్యైష గర్జతి || ౧౩ ||
ప్రకృత్యా నిపుణశ్చైవ బుద్ధిమాంశ్చైవ వానరః |
అపరీక్షితవీర్యేణ సుగ్రీవః సహ నేష్యతి || ౧౪ ||
పూర్వమేవ మయా వీర శ్రుతం కథయతో వచః |
అంగదస్య కుమారస్య వక్ష్యామి త్వా హితం వచః || ౧౫ ||
అంగదస్తు కుమారోఽయం వనాంతముపనిర్గతః |
ప్రవృత్తిస్తేన కథితా చారైరాప్తైర్నివేదితా || ౧౬ ||
అయోధ్యాధిపతేః పుత్రో శూరో సమరదుర్జయౌ |
ఇక్ష్వాకూణాం కులే జాతౌ ప్రథితౌ రామలక్ష్మణౌ || ౧౭ ||
సుగ్రీవప్రియకామార్థం ప్రాప్తౌ తత్ర దురాసదౌ |
తవ భ్రాతుర్హి విఖ్యాతః సహాయో రణకర్కశః || ౧౮ ||
రామః పరబలామర్దీ యుగాంతాగ్నిరివోత్థితః |
నివాసవృక్షః సాధూనామాపన్నానాం పరా గతిః || ౧౯ ||
ఆర్తానాం సంశ్రయశ్చైవ యశసశ్చైకభాజనమ్ |
జ్ఞానవిజ్ఞానసంపన్నో నిదేశే నిరతః పితుః || ౨౦ ||
ధాతూనామివ శైలేంద్రో గుణానామాకరో మహాన్ |
తత్క్షమం న విరోధస్తే సహ తేన మహాత్మనా || ౨౧ ||
దుర్జయేనాప్రమేయేన రామేణ రణకర్మసు |
శూర వక్ష్యామి తే కించిన్న చేచ్ఛామ్యభ్యసూయితుమ్ || ౨౨ ||
శ్రూయతాం క్రియతాం చైవ తవ వక్ష్యామి యద్ధితమ్ |
యౌవరాజ్యేన సుగ్రీవం తూర్ణం సాధ్వభిషేచయ || ౨౩ ||
విగ్రహం మా కృథా వీర భ్రాత్రా రాజన్ యవీయసా | [బలీయసా]
అహం హి తే క్షమం మన్యే తేన రామేణ సౌహృదమ్ || ౨౪ ||
సుగ్రీవేణ చ సంప్రీతిం వైరముత్సృజ్య దూరతః |
లాలనీయో హి తే భ్రాతా యవీయానేష వానరః || ౨౫ ||
తత్ర వా సన్నిహస్థో వా సర్వథా బంధురేవ తే |
న హి తేన సమం బంధుం భువి పశ్యామి కంచన || ౨౬ ||
దానమానాదిసత్కారైః కురుష్వ ప్రత్యనంతరమ్ |
వైరమేతత్సముత్సృజ్య తవ పార్శ్వే స తిష్ఠతు || ౨౭ ||
సుగ్రీవో విపులగ్రీవస్తవ బంధుః సదా మతః |
భ్రాతుః సౌహృదమాలంబ నాన్యా గితిరిహాస్తి తే || ౨౮ ||
యది తే మత్ప్రియం కార్యం యది చావైషి మాం హితామ్ |
యాచ్యమానః ప్రయత్నేన సాధు వాక్యం కురుష్వ మే || ౨౯ ||
ప్రసీద పథ్యం శృణు జల్పితం హి మే
న రోషమేవానువిధాతుమర్హసి |
క్షమో హి తే కోసలరాజసూనునా
న విగ్రహః శక్రసమానతేజసా || ౩౦ ||
తదా హి తారా హితమేవ వాక్యం
తం వాలినం పథ్యమిదం బభాషే |
న రోచతే తద్వచనం హి తస్య
కాలాభిపన్నస్య వినాశకాలే || ౩౧ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే పంచదశః సర్గః || ౧౫ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక : హనుమద్విజయోత్సవం (హనుమజ్జయంతి) సందర్భంగా "శ్రీ ఆంజనేయ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి మా పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
