Read in తెలుగు / ಕನ್ನಡ / தமிழ் / English (IAST)
ద్వావింశతిదశకమ్ (౨౨) – అజామిలోపాఖ్యానమ్
అజామిలో నామ మహీసురః పురా
చరన్విభో ధర్మపథాన్ గృహాశ్రమీ |
గురోర్గిరా కాననమేత్య దృష్టవాన్
సుధృష్టశీలాం కులటాం మదాకులామ్ || ౨౨-౧ ||
స్వతః ప్రశాన్తోఽపి తదాహృతాశయః
స్వధర్మముత్సృజ్య తయా సమారమన్ |
అధర్మకారీ దశమీ భవన్పున-
ర్దధౌ భవన్నామయుతే సుతే రతిమ్ || ౨౨-౨ ||
స మృత్యుకాలే యమరాజకిఙ్కరాన్
భయఙ్కరాంస్త్రీనభిలక్షయన్భియా |
పురా మనాక్త్వత్స్మృతివాసనాబలాత్
జుహావ నారాయణనామకం సుతమ్ || ౨౨-౩ ||
దురాశయస్యాపి తదాత్వనిర్గత-
త్వదీయనామాక్షరమాత్రవైభవాత్ |
పురోఽభిపేతుర్భవదీయపార్షదాః
శ్చతుర్భుజాః పీతపటా మనోహరాః || ౨౨-౪ ||
[** మనోరమాః **]
అముం చ సమ్పాశ్య వికర్షతో భటాన్
విముఞ్చతేత్యారురుధుర్బలాదమీ |
నివారితాస్తే చ భవజ్జనైస్తదా
తదీయపాపం నిఖిలం న్యవేదయన్ || ౨౨-౫ ||
భవన్తు పాపాని కథం తు నిష్కృతే
కృతేఽపి భో దణ్డనమస్తి పణ్డితాః |
న నిష్కృతిః కిం విదితా భవాదృశా-
మితి ప్రభో త్వత్పురుషా బభాషిరే || ౨౨-౬ ||
శ్రుతిస్మృతిభ్యాం విహితా వ్రతాదయః
పునన్తి పాపం న లునన్తి వాసనామ్ |
అనన్తసేవా తు నికృన్తతి ద్వయీ-
మితి ప్రభో త్వత్పురుషా బభాషిరే || ౨౨-౭ ||
అనేన భో జన్మసహస్రకోటిభిః
కృతేషు పాపేష్వపి నిష్కృతిః కృతా |
యదగ్రహీన్నామ భయాకులో హరే-
రితి ప్రభో త్వత్పురుషా బభాషిరే || ౨౨-౮ ||
నృణామబుద్ధ్యాపి ముకున్దకీర్తనం
దహత్యఘౌఘాన్మహిమాస్య తాదృశః |
యథాగ్నిరేధాంసి యథౌషధం గదా-
నితి ప్రభో త్వత్పురుషా బభాషిరే || ౨౨-౯ ||
ఇతీరితైర్యామ్యభటైరపాసృతే
భవద్భటానాం చ గణే తిరోహితే |
భవత్స్మృతిం కఞ్చన కాలమాచరన్
భవత్పదం ప్రాపి భవద్భటైరసౌ || ౨౨-౧౦ ||
స్వకిఙ్కరావేదనశఙ్కితో యమ-
స్త్వదఙ్ఘ్రిభక్తేషు న గమ్యతామితి |
స్వకీయభృత్యానశిశిక్షదుచ్చకైః
స దేవ వాతాలయనాథ పాహి మామ్ || ౨౨-౧౧ ||
ఇతి ద్వావింశదశకం సమాప్తం
సంపూర్ణ శ్రీమన్నారాయణీయం (౧౦౦ దశకాలు) చూడండి.
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
