Read in తెలుగు / ಕನ್ನಡ / தமிழ் / देवनागरी / English (IAST)
|| sītānirvēdaḥ ||
tathā tāsāṁ vadantīnāṁ paruṣaṁ dāruṇaṁ bahu |
rākṣasīnāmasaumyānāṁ rurōda janakātmajā || 1 ||
ēvamuktā tu vaidēhī rākṣasībhirmanasvinī |
uvāca paramatrastā bāṣpagadgadayā girā || 2 ||
na mānuṣī rākṣasasya bhāryā bhavitumarhati |
kāmaṁ khādata māṁ sarvā na kariṣyāmi vō vacaḥ || 3 ||
sā rākṣasīmadhyagatā sītā surasutōpamā |
na śarma lēbhē duḥkhārtā rāvaṇēna ca tarjitā || 4 ||
vēpatē smādhikaṁ sītā viśantīvāṅgamātmanaḥ |
vanē yūthaparibhraṣṭā mr̥gī kōkairivārditā || 5 ||
sā tvaśōkasya vipulāṁ śākhāmālambya puṣpitām |
cintayāmāsa śōkēna bhartāraṁ bhagnamānasā || 6 ||
sā snāpayantī vipulau stanau nētrajalasravaiḥ |
cintayantī na śōkasya tadā:’ntamadhigacchati || 7 ||
sā vēpamānā patitā pravātē kadalī yathā |
rākṣasīnāṁ bhayatrastā viṣaṇṇavadanā:’bhavat || 8 || [vivarṇa]
tasyāḥ sā dīrghavipulā vēpantyā sītayā tadā |
dadr̥śē kampinī vēṇī vyālīva parisarpatī || 9 ||
sā niḥśvasantī duḥkhārtā śōkōpahatacētanā |
ārtā vyasr̥jadaśrūṇi maithilī vilalāpa ha || 10 ||
hā rāmēti ca duḥkhārtā hā punarlakṣmaṇēti ca |
hā śvaśru mama kausalyē hā sumitrēti bhāminī || 11 ||
lōkapravādaḥ satyō:’yaṁ paṇḍitaiḥ samudāhr̥taḥ |
akālē durlabhō mr̥tyuḥ striyā vā puruṣasya vā || 12 ||
yatrāhamēvaṁ krūrābhī rākṣasībhirihārditā |
jīvāmi hīnā rāmēṇa muhūrtamapi duḥkhitā || 13 ||
ēṣālpapuṇyā kr̥paṇā vinaśiṣyāmyanāthavat |
samudramadhyē nauḥ pūrṇā vāyuvēgairivāhatā || 14 ||
bhartāraṁ tamapaśyantī rākṣasīvaśamāgatā |
sīdāmi khalu śōkēna kūlaṁ tōyahataṁ yathā || 15 ||
taṁ padmadalapatrākṣaṁ siṁhavikrāntagāminam |
dhanyāḥ paśyanti mē nāthaṁ kr̥tajñaṁ priyavādinam || 16 ||
sarvathā tēna hīnāyā rāmēṇa viditātmanā |
tīkṣṇaṁ viṣamivāsvādya durlabhaṁ mama jīvitam || 17 ||
kīdr̥śaṁ tu mayā pāpaṁ purā janmāntarē kr̥tam |
yēnēdaṁ prāpyatē duḥkhaṁ mayā ghōraṁ sudāruṇam || 18 ||
jīvitaṁ tyaktumicchāmi śōkēna mahatā vr̥tā |
rākṣasībhiśca rakṣyantyā rāmō nāsādyatē mayā || 19 ||
dhigastu khalu mānuṣyaṁ dhigastu paravaśyatām |
na śakyaṁ yatparityaktumātmacchandēna jīvitam || 20 ||
ityārṣē śrīmadrāmāyaṇē vālmīkīyē ādikāvyē sundarakāṇḍē pañcaviṁśaḥ sargaḥ || 25 ||
sundarakāṇḍa ṣaḍviṁśaḥ sargaḥ (26)>>
See Complete vālmīki sundarakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
