Read in తెలుగు / ಕನ್ನಡ / தமிழ் / देवनागरी / English (IAST)
satyācāryasya gamanē kadācinmuktidāyakam |
kāśīkṣētramprati saha gauryā mārgē tu śaṅkaram ||
antyavēṣadharaṁ dr̥ṣṭvā gacchagacchēti cābravīt |
śaṅkarassō:’pi caṇḍālaḥ taṁ punaḥ prāha śaṅkaram ||
annamāyādannamayamathavācaitanyamēva caitanyāt |
yativara dūrīkartuṁ vāñchasi kiṁ brūhi gacchagacchēti ||
pratyagvastuni nistaraṅgasahajānandāvabōdhāmbudhau
viprō:’yaṁ śvapacō:’yamityapi mahān kō:’yaṁ vibhēda bhramaḥ |
kiṁ gaṅgāmbuni bimbitē:’mbaramaṇau cāṇḍālavīthīpayaḥ
pūrē vā:’ntaramasti kāñcanaghaṭīmr̥tkumbhayōrvā:’mbarē ||
jāgratsvapnasuṣuptiṣu sphuṭatarā yā saṁvidujjr̥mbhatē
yā brahmādipipīlikāntatanuṣu prōtā jagatsākṣiṇī |
saivāhaṁ na ca dr̥śyavastviti dr̥ḍhaprajñāpi yasyāsti cē-
ccaṇḍālō:’stu sa tu dvijō:’stu gururityēṣā manīṣā mama || 1 ||
brahmaivāhamidaṁ jagacca sakalaṁ cinmātravistāritaṁ
sarvaṁ caitadavidyayā triguṇayā:’śēṣaṁ mayā kalpitam |
itthaṁ yasya dr̥ḍhā matissukhatarē nityē parē nirmalē
caṇḍālō:’stu sa tu dvijō:’stu gururityēṣā manīṣā mama || 2 ||
śaśvannaśvaramēva viśvamakhilaṁ niścitya vācā gurō-
rnityaṁ brahma nirantaraṁ vimr̥śatā nirvyājaśāntātmanā |
bhūtaṁ bhāvi ca duṣkr̥taṁ pradahatā saṁvinmayē pāvakē
prārabdhāya samarpitaṁ svavapurityēṣā manīṣā mama || 3 ||
yā tiryaṅnaradēvatābhirahamityantaḥ sphuṭā gr̥hyatē
yadbhāsā hr̥dayākṣadēhaviṣayā bhānti svatō:’cētanāḥ |
tāṁ bhāsyaiḥ pihitārkamaṇḍalanibhāṁ sphūrtiṁ sadā bhāvaya-
nyōgī nirvr̥tamānasō hi gururityēṣā manīṣā mama || 4 ||
yatsaukhyāmbudhilēśalēśata imē śakrādayō nirvr̥tā
yaccittē nitarāṁ praśāntakalanē labdhvā munirnirvr̥taḥ |
yasminnityasukhāmbudhau galitadhīrbrahmaiva na brahmavi-
dyaḥ kaścitsa surēndravanditapadō nūnaṁ manīṣā mama || 5 ||
See more vividha stōtrāṇi for chanting.
గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.