Read in తెలుగు / ಕನ್ನಡ / தமிழ் / देवनागरी / English (IAST)
|| prathama caritam ||
asya śrī prathamacaritasya brahmā r̥ṣiḥ, gāyatrī chandaḥ, śrīmahākālī dēvatā, nandā śaktiḥ, raktadantikā bījaṁ, agnistattvaṁ, r̥gvēda dhyānam, śrīmahākālīprītyarthē prathamacarita pārāyaṇē viniyōgaḥ |
dhyānam –
khaḍgaṁ cakragadēṣucāpaparighān śūlaṁ bhuśuṇḍīṁ śiraḥ
śaṅkhaṁ sandadhatīṁ karaistrinayanāṁ sarvāṅgabhūṣāvr̥tām |
nīlāśmadyutimāsyapādadaśakāṁ sēvē mahākālikāṁ
yāmastaut svapitē harau kamalajō hantuṁ madhuṁ kaiṭabham ||
ōṁ namaścaṇḍikāyai ||
ōṁ aiṁ mārkaṇḍēya uvāca || 1 ||
sāvarṇiḥ sūryatanayō yō manuḥ kathyatē:’ṣṭamaḥ |
niśāmaya tadutpattiṁ vistarādgadatō mama || 2 ||
mahāmāyānubhāvēna yathā manvantarādhipaḥ |
sa babhūva mahābhāgaḥ sāvarṇistanayō ravēḥ || 3 ||
svārōciṣē:’ntarē pūrvaṁ caitravaṁśasamudbhavaḥ |
surathō nāma rājā:’bhūt samastē kṣitimaṇḍalē || 4 ||
tasya pālayataḥ samyak prajāḥ putrānivaurasān |
babhūvuḥ śatravō bhūpāḥ kōlāvidhvaṁsinastadā || 5 ||
tasya tairabhavadyuddhamatiprabaladaṇḍinaḥ |
nyūnairapi sa tairyuddhē kōlāvidhvaṁsibhirjitaḥ || 6 ||
tataḥ svapuramāyātō nijadēśādhipō:’bhavat |
ākrāntaḥ sa mahābhāgastaistadā prabalāribhiḥ || 7 ||
amātyairbalibhirduṣṭairdurbalasya durātmabhiḥ |
kōśō balaṁ cāpahr̥taṁ tatrāpi svapurē tataḥ || 8 ||
tatō mr̥gayāvyājēna hr̥tasvāmyaḥ sa bhūpatiḥ |
ēkākī hayamāruhya jagāma gahanaṁ vanam || 9 ||
sa tatrāśramamadrākṣīddvijavaryasya mēdhasaḥ |
praśāntaśvāpadākīrṇaṁ muniśiṣyōpaśōbhitam || 10 ||
tasthau kañcit sa kālaṁ ca muninā tēna satkr̥taḥ |
itaścētaśca vicaraṁstasmin munivarāśramē || 11 ||
sō:’cintayattadā tatra mamatvākr̥ṣṭamānasaḥ || 12 ||
matpūrvaiḥ pālitaṁ pūrvaṁ mayā hīnaṁ puraṁ hi tat |
madbhr̥tyaistairasadvr̥ttairdharmataḥ pālyatē na vā || 13 ||
na jānē sa pradhānō mē śūrō hastī sadā madaḥ |
mama vairivaśaṁ yātaḥ kān bhōgānupalapsyatē || 14 ||
yē mamānugatā nityaṁ prasādadhanabhōjanaiḥ |
anuvr̥ttiṁ dhruvaṁ tē:’dya kurvantyanyamahībhr̥tām || 15 ||
asamyagvyayaśīlaistaiḥ kurvadbhiḥ satataṁ vyayam |
sañcitaḥ sō:’tiduḥkhēna kṣayaṁ kōśō gamiṣyati || 16 ||
ētaccānyacca satataṁ cintayāmāsa pārthivaḥ |
tatra viprāśramābhyāśē vaiśyamēkaṁ dadarśa saḥ || 17 ||
sa pr̥ṣṭastēna kastvaṁ bhō hētuścāgamanē:’tra kaḥ |
saśōka iva kasmāttvaṁ durmanā iva lakṣyasē || 18 ||
ityākarṇya vacastasya bhūpatēḥ praṇayōditam |
pratyuvāca sa taṁ vaiśyaḥ praśrayāvanatō nr̥pam || 19 ||
vaiśya uvāca || 20 ||
samādhirnāma vaiśyō:’hamutpannō dhanināṁ kulē |
putradārairnirastaśca dhanalōbhādasādhubhiḥ || 21 ||
vihīnaśca dhanairdāraiḥ putrairādāya mē dhanam |
vanamabhyāgatō duḥkhī nirastaścāptabandhubhiḥ || 22 ||
sō:’haṁ na vēdmi putrāṇāṁ kuśalākuśalātmikām |
pravr̥ttiṁ svajanānāṁ ca dārāṇāṁ cātra saṁsthitaḥ || 23 ||
kiṁ nu tēṣāṁ gr̥hē kṣēmamakṣēmaṁ kiṁ nu sāmpratam || 24 ||
kathaṁ tē kiṁ nu sadvr̥ttā durvr̥ttāḥ kiṁ nu mē sutāḥ || 25 ||
rājōvāca || 26 ||
yairnirastō bhavāṁllubdhaiḥ putradārādibhirdhanaiḥ || 27 ||
tēṣu kiṁ bhavataḥ snēhamanubadhnāti mānasam || 28 ||
vaiśya uvāca || 29 ||
ēvamētadyathā prāha bhavānasmadgataṁ vacaḥ |
kiṁ karōmi na badhnāti mama niṣṭhuratāṁ manaḥ || 30 ||
yaiḥ santyajya pitr̥snēhaṁ dhanalubdhairnirākr̥taḥ |
patisvajanahārdaṁ ca hārdi tēṣvēva mē manaḥ || 31 ||
kimētannābhijānāmi jānannapi mahāmatē |
yatprēmapravaṇaṁ cittaṁ viguṇēṣvapi bandhuṣu || 32 ||
tēṣāṁ kr̥tē mē niḥśvāsō daurmanasyaṁ ca jāyatē || 33 ||
karōmi kiṁ yanna manastēṣvaprītiṣu niṣṭhuram || 34 ||
mārkaṇḍēya uvāca || 35 ||
tatastau sahitau vipra taṁ muniṁ samupasthitau || 36 ||
samādhirnāma vaiśyō:’sau sa ca pārthivasattamaḥ || 37 ||
kr̥tvā tu tau yathānyāyaṁ yathārhaṁ tēna saṁvidam |
upaviṣṭau kathāḥ kāściccakraturvaiśyapārthivau || 38 ||
rājōvāca || 39 ||
bhagavaṁstvāmahaṁ praṣṭumicchāmyēkaṁ vadasva tat || 40 ||
duḥkhāya yanmē manasaḥ svacittāyattatāṁ vinā || 41 ||
mamatvaṁ gatarājyasya rājyāṅgēṣvakhilēṣvapi |
jānatō:’pi yathājñasya kimētanmunisattama || 42 ||
ayaṁ ca nikr̥taḥ putrairdārairbhr̥tyaistathōjjhitaḥ |
svajanēna ca santyaktastēṣu hārdī tathāpyati || 43 ||
ēvamēṣa tathāhaṁ ca dvāvapyatyantaduḥkhitau |
dr̥ṣṭadōṣē:’pi viṣayē mamatvākr̥ṣṭamānasau || 44 ||
tatkimētanmahābhāga yanmōhō jñāninōrapi |
mamāsya ca bhavatyēṣā vivēkāndhasya mūḍhatā || 45 ||
r̥ṣiruvāca || 46 ||
jñānamasti samastasya jantōrviṣayagōcarē |
viṣayāśca mahābhāga yāti caivaṁ pr̥thakpr̥thak || 47 ||
divāndhāḥ prāṇinaḥ kēcidrātrāvandhāstathāparē |
kēciddivā tathā rātrau prāṇinastulyadr̥ṣṭayaḥ || 48 ||
jñāninō manujāḥ satyaṁ kiṁ nu tē na hi kēvalam |
yatō hi jñāninaḥ sarvē paśupakṣimr̥gādayaḥ || 49 ||
jñānaṁ ca tanmanuṣyāṇāṁ yattēṣāṁ mr̥gapakṣiṇām |
manuṣyāṇāṁ ca yattēṣāṁ tulyamanyattathōbhayōḥ || 50 ||
jñānē:’pi sati paśyaitān pataṅgāñchāvacañcuṣu |
kaṇamōkṣādr̥tānmōhāt pīḍyamānānapi kṣudhā || 51 ||
mānuṣā manujavyāghra sābhilāṣāḥ sutān prati |
lōbhātpratyupakārāya nanvētān kiṁ na paśyasi || 52 ||
tathāpi mamatāvartē mōhagartē nipātitāḥ |
mahāmāyāprabhāvēṇa saṁsārasthitikāriṇā || 53 ||
tannātra vismayaḥ kāryō yōganidrā jagatpatēḥ |
mahāmāyā harēścaiṣā tayā sammōhyatē jagat || 54 ||
jñānināmapi cētāṁsi dēvī bhagavatī hi sā |
balādākr̥ṣya mōhāya mahāmāyā prayacchati || 55 ||
tayā visr̥jyatē viśvaṁ jagadētaccarācaram |
saiṣā prasannā varadā nr̥ṇāṁ bhavati muktayē || 56 ||
sā vidyā paramā muktērhētubhūtā sanātanī || 57 ||
saṁsārabandhahētuśca saiva sarvēśvarēśvarī || 58 ||
rājōvāca || 59 ||
bhagavan kā hi sā dēvī mahāmāyēti yāṁ bhavān |
bravīti kathamutpannā sā karmāsyāśca kiṁ dvija || 60 ||
yatprabhāvā ca sā dēvī yatsvarūpā yadudbhavā || 61 ||
tatsarvaṁ śrōtumicchāmi tvattō brahmavidāṁ vara || 62 ||
r̥ṣiruvāca || 63 ||
nityaiva sā jaganmūrtistayā sarvamidaṁ tatam || 64 ||
tathāpi tatsamutpattirbahudhā śrūyatāṁ mama || 65 ||
dēvānāṁ kāryasiddhyarthamāvirbhavati sā yadā |
utpannēti tadā lōkē sā nityāpyabhidhīyatē || 66 ||
yōganidrāṁ yadā viṣṇurjagatyēkārṇavīkr̥tē |
āstīrya śēṣamabhajatkalpāntē bhagavān prabhuḥ || 67 ||
tadā dvāvasurau ghōrau vikhyātau madhukaiṭabhau |
viṣṇukarṇamalōdbhūtau hantuṁ brahmāṇamudyatau || 68 ||
sa nābhikamalē viṣṇōḥ sthitō brahmā prajāpatiḥ |
dr̥ṣṭvā tāvasurau cōgrau prasuptaṁ ca janārdanam || 69 ||
tuṣṭāva yōganidrāṁ tāmēkāgrahr̥dayasthitaḥ |
vibōdhanārthāya harērharinētrakr̥tālayām || 70 ||
viśvēśvarīṁ jagaddhātrīṁ sthitisaṁhārakāriṇīm |
nidrāṁ bhagavatīṁ viṣṇōratulāṁ tējasaḥ prabhuḥ || 71 ||
brahmōvāca || 72 ||
tvaṁ svāhā tvaṁ svadhā tvaṁ hi vaṣaṭkāraḥ svarātmikā |
sudhā tvamakṣarē nityē tridhā mātrātmikā sthitā || 73 ||
ardhamātrāsthitā nityā yānuccāryā viśēṣataḥ |
tvamēva sandhyā sāvitrī tvaṁ dēvi jananī parā || 74 ||
tvayaitaddhāryatē viśvaṁ tvayaitatsr̥jyatē jagat |
tvayaitatpālyatē dēvi tvamatsyantē ca sarvadā || 75 ||
visr̥ṣṭau sr̥ṣṭirūpā tvaṁ sthitirūpā ca pālanē |
tathā saṁhr̥tirūpāntē jagatō:’sya jaganmayē || 76 ||
mahāvidyā mahāmāyā mahāmēdhā mahāsmr̥tiḥ |
mahāmōhā ca bhavatī mahādēvī mahēśvarī || 77 ||
prakr̥tistvaṁ ca sarvasya guṇatrayavibhāvinī |
kālarātrirmahārātrirmōharātriśca dāruṇā || 78 ||
tvaṁ śrīstvamīśvarī tvaṁ hrīstvaṁ buddhirbōdhalakṣaṇā |
lajjā puṣṭistathā tuṣṭistvaṁ śāntiḥ kṣāntirēva ca || 79 ||
khaḍginī śūlinī ghōrā gadinī cakriṇī tathā |
śaṅkhinī cāpinī bāṇabhuśuṇḍīparighāyudhā || 80 ||
saumyā saumyatarāśēṣasaumyēbhyastvatisundarī |
parāparāṇāṁ paramā tvamēva paramēśvarī || 81 ||
yacca kiñcitkvacidvastu sadasadvākhilātmikē |
tasya sarvasya yā śaktiḥ sā tvaṁ kiṁ stūyasē mayā || 82 ||
yayā tvayā jagatsraṣṭā jagatpātyatti yō jagat |
sō:’pi nidrāvaśaṁ nītaḥ kastvāṁ stōtumihēśvaraḥ || 83 ||
viṣṇuḥ śarīragrahaṇamahamīśāna ēva ca |
kāritāstē yatō:’tastvāṁ kaḥ stōtuṁ śaktimān bhavēt || 84 ||
sā tvamitthaṁ prabhāvaiḥ svairudārairdēvi saṁstutā |
mōhayaitau durādharṣāvasurau madhukaiṭabhau || 85 ||
prabōdhaṁ ca jagatsvāmī nīyatāmacyutō laghu || 86 ||
bōdhaśca kriyatāmasya hantumētau mahāsurau || 87 ||
r̥ṣiruvāca || 88 ||
ēvaṁ stutā tadā dēvī tāmasī tatra vēdhasā |
viṣṇōḥ prabōdhanārthāya nihantuṁ madhukaiṭabhau || 89 ||
nētrāsyanāsikābāhuhr̥dayēbhyastathōrasaḥ |
nirgamya darśanē tasthau brahmaṇō:’vyaktajanmanaḥ || 90 ||
uttasthau ca jagannāthastayā muktō janārdanaḥ |
ēkārṇavē:’hiśayanāttataḥ sa dadr̥śē ca tau || 91 ||
madhukaiṭabhau durātmānāvativīryaparākramau |
krōdharaktēkṣaṇāvattuṁ brahmāṇaṁ janitōdyamau || 92 ||
samutthāya tatastābhyāṁ yuyudhē bhagavān hariḥ |
pañcavarṣasahasrāṇi bāhupraharaṇō vibhuḥ || 93 ||
tāvapyatibalōnmattau mahāmāyāvimōhitau || 94 ||
uktavantau varō:’smattō vriyatāmiti kēśavam || 95 ||
śrībhagavānuvāca || 96 ||
bhavētāmadya mē tuṣṭau mama vadhyāvubhāvapi || 97 ||
kimanyēna varēṇātra ētāvaddhi vr̥taṁ mayā || 98 ||
r̥ṣiruvāca || 99 ||
vañcitābhyāmiti tadā sarvamāpōmayaṁ jagat |
vilōkya tābhyāṁ gaditō bhagavān kamalēkṣaṇaḥ || 100 ||
āvāṁ jahi na yatrōrvī salilēna pariplutā || 101 ||
r̥ṣiruvāca || 102 ||
tathētyuktvā bhagavatā śaṅkhacakragadābhr̥tā |
kr̥tvā cakrēṇa vai cchinnē jaghanē śirasī tayōḥ || 103 ||
ēvamēṣā samutpannā brahmaṇā saṁstutā svayam |
prabhāvamasyā dēvyāstu bhūyaḥ śr̥ṇu vadāmi tē || 104 ||
|| aiṁ ōm ||
iti śrīmārkaṇḍēyapurāṇē sāvarṇikē manvantarē dēvīmāhātmyē madhukaiṭabhavadhō nāma prathamō:’dhyāyaḥ || 1 ||
(uvācamantrāḥ – 14, ardhamantrāḥ – 24, ślōkamantrāḥ – 66, ēvaṁ – 104)
dvitīyō:dhyāyaḥ (mahiṣāsurasainyavadha) >>
See complete durgā saptaśatī for chanting.
గమనిక: రాబోయే ధనుర్మాసం సందర్భంగా "శ్రీ కృష్ణ స్తోత్రనిధి" ముద్రించుటకు ఆలోచన చేయుచున్నాము. ఇటీవల మేము "శ్రీ సాయి స్తోత్రనిధి" పుస్తకము విడుదల చేశాము.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
