Ayodhya Kanda Sarga 98 – అయోధ్యాకాండ అష్టనవతితమః సర్గః (౯౮)


|| రామాన్వేషణమ్ ||

నివేశ్య సేనాం తు విభుః పద్భ్యాం పాదవతాం వరః |
అభిగంతుం స కాకుత్స్థమియేష గురువర్తకమ్ || ౧ ||

నివిష్టమాత్రే సైన్యే తు యథోద్దేశం వినీతవత్ |
భరతో భ్రాతరం వాక్యం శత్రుఘ్నమిదమబ్రవీత్ || ౨ ||

క్షిప్రం వనమిదం సౌమ్య నరసంఘైః సమంతతః |
లుబ్ధైశ్చ సహితైరేభిస్త్వమన్వేషితుమర్హసి || ౩ ||

గుహో జ్ఞాతిసహస్రేణ శరచాపాసిధారిణా |
సమన్వేషతు కాకుత్స్థమస్మిన్ పరివృతః స్వయమ్ || ౪ ||

అమాత్యైః సహ పౌరైశ్చ గురుభిశ్చ ద్విజాతిభిః |
వనం సర్వం చరిష్యామి పద్భ్యాం పరివృతః స్వయమ్ || ౫ ||

యావన్న రామం ద్రక్ష్యామి లక్ష్మణం వా మహాబలమ్ |
వైదేహీం వా మహాభాగాం న మే శాంతిర్భవిష్యతి || ౬ ||

యావన్న చంద్రసంకాశం ద్రక్ష్యామి శుభమాననమ్ |
భ్రాతుః పద్మపలాశాక్షం న మే శాంతిర్భవిష్యతి || ౭ ||

యావన్న చరణౌ భ్రాతుః పార్థివవ్యంజనాన్వితౌ |
శిరసా ధారయిష్యామి న మే శాంతిర్భవిష్యతి || ౮ ||

యావన్న రాజ్యే రాజ్యార్హః పితృపైతామహే స్థితః |
అభిషేకజలక్లిన్నో న మే శాంతిర్భవిష్యతి || ౯ ||

సిద్ధార్థః ఖలు సౌమిత్రిర్యశ్చంద్రవిమలోపమమ్ |
ముఖం పశ్యతి రామస్య రాజీవాక్షం మహాద్యుతి || ౧౦ ||

కృతకృత్యా మహాభాగా వైదేహీ జనకాత్మజా |
భర్తారం సాగరాంతాయాః పృథివ్యా యాఽనుగచ్ఛతి || ౧౧ ||

సుభగశ్చిత్రకూటోఽసౌ గిరిరాజోపమో గిరిః |
యస్మిన్వసతి కాకుత్స్థః కుబేర ఇవ నందనే || ౧౨ ||

కృతకార్యమిదం దుర్గం వనం వ్యాలనిషేవితమ్ |
యదధ్యాస్తే మహాతేజాః రామః శస్త్రభృతాం వరః || ౧౩ ||

ఏవముక్త్వా మహాతేజాః భరతః పురుషర్షభః |
పద్భ్యామేవ మహాబాహుః ప్రవివేశ మహద్వనమ్ || ౧౪ ||

స తాని ద్రుమజాలాని జాతాని గిరిసానుషు |
పుష్పితాగ్రాణి మధ్యేన జగామ వదతాం వరః || ౧౫ ||

స గిరిశ్చిత్రకూటస్య సాలమాసాద్య పుష్పితమ్ |
రామాశ్రమగతస్యాగ్నేః దదర్శ ధ్వజముచ్ఛ్రితమ్ || ౧౬ ||

తం దృష్ట్వా భరతః శ్రీమాన్ ముమోహ సహబాంధవః |
అత్ర రామ ఇతి జ్ఞాత్వా గతః పారమివాంభసః || ౧౭ ||

స చిత్రకూటే తు గిరౌ నిశమ్య
రామాశ్రమం పుణ్యజనోపపన్నమ్ |
గుహేన సార్ధం త్వరితో జగామ
పునర్నివేశ్యైవ చమూం మహాత్మా || ౧౮ ||

ఇత్యార్షే శ్రీమద్రామాయణే వాల్మీకీయే ఆదికావ్యే అయోధ్యాకాండే అష్టనవతితమః సర్గః || ౯౮ ||

అయోధ్యాకాండ ఏకోనశతతమః సర్గః (౯౯) >>


సంపూర్ణ వాల్మీకి రామాయణ అయోధ్యకాండ చూడండి.


గమనిక: మా రెండు పుస్తకాలు - "నవగ్రహ స్తోత్రనిధి" మరియు "శ్రీ సూర్య స్తోత్రనిధి", విడుదల చేశాము. కొనుగోలుకు ఇప్పుడు అందుబాటులో ఉన్నాయి.

Did you see any mistake/variation in the content above? Click here to report mistakes and corrections in Stotranidhi content.

Facebook Comments
error: Not allowed