Read in తెలుగు / ಕನ್ನಡ / தமிழ் / देवनागरी / English (IAST)
|| కబంధశాపాఖ్యానమ్ ||
పురా రామ మహాబాహో మహాబలపరాక్రమమ్ |
రూపమాసీన్మమాచింత్యం త్రిషు లోకేషు విశ్రుతమ్ || ౧ ||
యథా సోమస్య శక్రస్య సూర్యస్య చ యథా వపుః |
సోఽహం రూపమిదం కృత్వా లోకవిత్రాసనం మహత్ || ౨ ||
ఋషీన్వనగతాన్ రామ త్రాసయామి తతస్తతః |
తతః స్థూలశిరా నామ మహర్షిః కోపితో మయా || ౩ ||
సంచిన్వన్ వివిధం వన్యం రూపేణానేన ధర్షితః |
తేనాహముక్తః ప్రేక్ష్యైవం ఘోరశాపాభిధాయినా || ౪ ||
ఏతదేవ నృశంసం తే రూపమస్తు విగర్హితమ్ |
స మయా యాచితః క్రుద్ధః శాపస్యాంతో భవేదితి || ౫ ||
అభిశాపకృతస్యేతి తేనేదం భాషితం వచః |
యదా ఛిత్త్వా భుజౌ రామస్త్వాం దహేద్విజనే వనే || ౬ ||
తదా త్వం ప్రాప్స్యసే రూపం స్వమేవ విపులం శుభమ్ |
శ్రియా విరాజితం పుత్రం దనోస్త్వం విద్ధి లక్ష్మణ || ౭ ||
ఇంద్రకోపాదిదం రూపం ప్రాప్తమేవం రణాజిరే |
అహం హి తపసోగ్రేణ పితామహమతోషయమ్ || ౮ ||
దీర్ఘమాయుః స మే ప్రాదాత్తతో మాం విభ్రమోఽస్పృశత్ |
దీర్ఘమాయుర్మయా ప్రాప్తం కిం మే శక్రః కరిష్యతి || ౯ ||
ఇత్యేవం బుద్ధిమాస్థాయ రణే శక్రమధర్షయమ్ |
తస్య బాహుప్రముక్తేన వజ్రేణ శతపర్వణా || ౧౦ ||
సక్థినీ చైవ మూర్ధా చ శరీరే సంప్రవేశితమ్ |
స మయా యాచ్యమానః సన్నానయద్యమసాదనమ్ || ౧౧ ||
పితామహవచః సత్యం తదస్త్వితి మమాబ్రవీత్ |
అనాహారః కథం శక్తో భగ్నసక్థిశిరోముఖః || ౧౨ ||
వజ్రేణాభిహతః కాలం సుదీర్ఘమపి జీవితుమ్ |
ఏవముక్తస్తు మే శక్రో బాహూ యోజనమాయతౌ || ౧౩ ||
ప్రాదాదాస్యం చ మే కుక్షౌ తీక్ష్ణదంష్ట్రమకల్పయత్ |
సోఽహం భుజాభ్యాం దీర్ఘాభ్యాం సంకృష్యాస్మిన్వనేచరాన్ || ౧౪ ||
సింహద్విపమృగవ్యాఘ్రాన్ భక్షయామి సమంతతః |
స తు మామబ్రవీదింద్రో యదా రామః సలక్ష్మణః || ౧౫ ||
ఛేత్స్యతే సమరే బాహూ తదా స్వర్గం గమిష్యతి |
అనేన వపుషా రామ వనేఽస్మిన్ రాజసత్తమ || ౧౬ ||
యద్యత్పశ్యామి సర్వస్య గ్రహణం సాధు రోచయే |
అవశ్యం గ్రహణం రామో మన్యేఽహం సముపైష్యతి || ౧౭ ||
ఇమాం బుద్ధిం పురస్కృత్య దేహన్యాసకృతశ్రమః |
స త్వం రామోఽసి భద్రం తే నాహమన్యేన రాఘవ || ౧౮ ||
శక్యో హంతుం యథాతత్త్వమేవముక్తం మహర్షిణా |
అహం హి మతిసాచివ్యం కరిష్యామి నరర్షభ || ౧౯ ||
మిత్రం చైవోపదేక్ష్యామి యువాభ్యాం సంస్కృతోఽగ్నినా |
ఏవముక్తస్తు ధర్మాత్మా దనునా తేన రాఘవః || ౨౦ ||
ఇదం జగాద వచనం లక్ష్మణస్యోపశృణ్వతః |
రావణేన హృతా భార్యా మమ సీతా యశస్వినీ || ౨౧ ||
నిష్క్రాంతస్య జనస్థానాత్సహ భ్రాత్రా యథాసుఖమ్ |
నామమాత్రం తు జానామి న రూపం తస్య రక్షసః || ౨౨ ||
నివాసం వా ప్రభావం వా వయం తస్య న విద్మహే |
శోకార్తానామనాథానామేవం విపరిధావతామ్ || ౨౩ ||
కారుణ్యం సదృశం కర్తుముపకారే చ వర్తతామ్ |
కాష్ఠాన్యాదాయ శుష్కాణి కాలే భగ్నాని కుంజరైః || ౨౪ ||
ధక్ష్యామస్త్వాం వయం వీర శ్వభ్రే మహతి కల్పితే |
స త్వం సీతాం సమాచక్ష్వ యేన వా యత్ర వా హృతా || ౨౫ ||
కురు కల్యాణమత్యర్థం యది జానాసి తత్త్వతః |
ఏవముక్తస్తు రామేణ వాక్యం దనురనుత్తమమ్ || ౨౬ ||
ప్రోవాచ కుశలో వక్తుం వక్తారమపి రాఘవమ్ |
దివ్యమస్తి న మే జ్ఞానం నాభిజానామి మైథిలీమ్ || ౨౭ ||
యస్తాం జ్ఞాస్యతి తం వక్ష్యే దగ్ధః స్వం రూపమాస్థితః |
అదగ్ధస్య తు విజ్ఞాతుం శక్తిరస్తి న మే ప్రభో || ౨౮ ||
రాక్షసం తం మహావీర్యం సీతా యేన హృతా తవ |
విజ్ఞానం హి మమ భ్రష్టం శాపదోషేణ రాఘవ || ౨౯ ||
స్వకృతేన మయా ప్రాప్తం రూపం లోకవిగర్హితమ్ |
కింతు యావన్న యాత్యస్తం సవితా శ్రాంతవాహనః || ౩౦ ||
తావన్మామవటే క్షిప్త్వా దహ రామ యథావిధి |
దగ్ధస్త్వయాహమవటే న్యాయేన రఘునందన || ౩౧ ||
వక్ష్యామి తమహం వీర యస్తం జ్ఞాస్యతి రాక్షసమ్ |
తేన సఖ్యం చ కర్తవ్యం న్యాయవృత్తేన రాఘవ || ౩౨ ||
కల్పయిష్యతి తే ప్రీతః సాహాయ్యం లఘువిక్రమః |
న హి తస్యాస్త్యవిజ్ఞాతం త్రిషు లోకేషు రాఘవ |
సర్వాన్ పరిసృతో లోకాన్ పురాఽసౌ కారణాంతరే || ౩౩ ||
ఇత్యార్షే శ్రీమద్రామాయణే వాల్మీకీయే ఆదికావ్యే అరణ్యకాండే ఏకసప్తతితమః సర్గః || ౭౧ ||
గమనిక : మా తదుపరి ప్రచురణ "శ్రీ దక్షిణామూర్తి స్తోత్రనిధి" పుస్తకము ప్రింటు చేయుటకు ఆలోచన చేయుచున్నాము.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
