Read in తెలుగు / ಕನ್ನಡ / தமிழ் / देवनागरी / English (IAST)
|| హనూమద్భేదనమ్ ||
తథా బ్రువతి తారే తు తారాధిపతివర్చసి |
అథ మేనే హృతం రాజ్యం హనుమానంగదేన తత్ || ౧ ||
బుద్ధ్యా హ్యష్టాంగయా యుక్తం చతుర్బలసమన్వితమ్ |
చతుర్దశగుణం మేనే హనుమాన్ వాలినః సుతమ్ || ౨ ||
ఆపూర్యమాణం శశ్వచ్చ తేజోబలపరాక్రమైః |
శశినం శుక్లపక్షాదౌ వర్ధమానమివ శ్రియా || ౩ ||
బృహస్పతిసమం బుద్ధ్యా విక్రమే సదృశం పితుః |
శుశ్రూషమాణం తారస్య శుక్రస్యేవ పురందరమ్ || ౪ ||
భర్తురర్థే పరిశ్రాంతం సర్వశాస్త్రవిదాం వరమ్ |
అభిసంధాతుమారేభే హనుమానంగదం తతః || ౫ ||
స చతుర్ణాముపాయానాం తృతీయముపవర్ణయన్ |
భేదయామాస తాన్ సర్వాన్ వానరాన్ వాక్యసంపదా || ౬ ||
తేషు సర్వేషు భిన్నేషు తతోఽభీషయదంగదమ్ |
భీషణైర్బహుభిర్వాక్యైః కోపోపాయసమన్వితైః || ౭ ||
త్వం సమర్థతరః పిత్రా యుద్ధే తారేయ వై ధురమ్ |
దృఢం ధారయితుం శక్తః కపిరాజ్యం యథా పితా || ౮ ||
నిత్యమస్థిరచిత్తా హి కపయో హరిపుంగవః |
నాజ్ఞాప్యం విసహిష్యంతి పుత్రదారాన్ వినా త్వయా || ౯ ||
త్వాం నైతే హ్యనుయుంజేయుః ప్రత్యక్షం ప్రవదామి తే |
యథాఽయం జాంబవాన్నీలః సుహోత్రశ్చ మహాకపిః || ౧౦ ||
న హ్యహం త ఇమే సర్వే సామదానాదిభిర్గుణైః |
దండేన వా త్వయా శక్యాః సుగ్రీవాదపకర్షితుమ్ || ౧౧ ||
విగృహ్యాసనమప్యాహుర్దుర్బలేన బలీయసః |
ఆత్మరక్షాకరస్తస్మాన్న విగృహ్ణీత దుర్బలః || ౧౨ ||
యాం చేమాం మన్యసే ధాత్రీమేతద్బిలమితి శ్రుతమ్ |
ఏతల్లక్ష్మణబాణానామీషత్కార్యం విదారణే || ౧౩ ||
స్వల్పం హి కృతమింద్రేణ క్షిపతా హ్యశనిం పురా |
లక్ష్మణో నిశితైర్బాణైర్భింద్యాత్పత్రపుటం యథా || ౧౪ ||
లక్ష్మణస్య తు నారాచా బహవః సంతి తద్విధాః |
వజ్రాశనిసమస్పర్శా గిరీణామపి దారణాః || ౧౫ ||
అవస్థానే యదైవ త్వమాసిష్యసి పరంతప |
తదేవ హరయః సర్వే త్యక్ష్యంతి కృతనిశ్చయాః || ౧౬ ||
స్మరంతః పుత్రదారాణాం నిత్యోద్విగ్నా బుభుక్షితాః |
ఖేదితా దుఃఖశయ్యాభిస్త్వాం కరిష్యంతి పృష్ఠతః || ౧౭ ||
స త్వం హీనః సుహృద్భిశ్చ హితకామైశ్చ బంధుభిః |
తృణాదపి భృశోద్విగ్నః స్పందమానాద్భవిష్యసి || ౧౮ ||
న చ జాతు న హింస్యుస్త్వాం ఘోరా లక్ష్మణసాయకాః |
అపావృత్తం జిఘాంసంతో మహావేగా దురాసదాః || ౧౯ ||
అస్మాభిస్తు గతం సార్ధం వినీతవదుపస్థితమ్ |
ఆనుపూర్వ్యాత్తు సుగ్రీవో రాజ్యే త్వాం స్థాపయిష్యతి || ౨౦ ||
ధర్మకామః పితృవ్యస్తే ప్రీతికామో దృఢవ్రతః |
శుచిః సత్యప్రతిజ్ఞశ్చ న త్వాం జాతు జిఘాంసతి || ౨౧ ||
ప్రియకామశ్చ తే మాసుస్తదర్థం చాస్య జీవితమ్ |
తస్యాపత్యం చ నాస్త్యన్యత్ తస్మాదంగద గమ్యతామ్ || ౨౨ ||
ఇత్యార్షే శ్రీమద్రామాయణే వాల్మీకీయే ఆదికావ్యే కిష్కింధాకాండే చతుఃపంచాశః సర్గః || ౫౪ ||
సంపూర్ణ వాల్మీకి రామాయణే కిష్కింధాకాండ చూడండి.
గమనిక (15-May) : "శ్రీ దక్షిణామూర్తి స్తోత్రనిధి" ప్రింటింగు పూర్తి అయినది. కొనుగోలు చేయుటకు ఈ లింకు క్లిక్ చేయండి - Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
