Sharada Bhujanga Prayata Ashtakam – śrī śāradā bhujaṅga prayātāṣṭakam

stōtranidhi → śrī sarasvatī stōtrāṇi → śrī śāradā bhujaṅga prayātāṣṭakam

suvakṣōjakumbhāṁ sudhāpūrṇakumbhāṁ
prasādāvalambāṁ prapuṇyāvalambām |
sadāsyēndubimbāṁ sadānōṣṭhabimbāṁ
bhajē śāradāmbāmajasraṁ madambām || 1 ||

kaṭākṣē dayārdrāṁ karē jñānamudrāṁ
kalābhirvinidrāṁ kalāpaiḥ subhadrām |
purastrīṁ vinidrāṁ purastuṅgabhadrāṁ
bhajē śāradāmbāmajasraṁ madambām || 2 ||

lalāmāṅkaphālāṁ lasadgānalōlāṁ
svabhaktaikapālāṁ yaśaḥśrīkapōlām |
karē tvakṣamālāṁ kanatpatralōlāṁ
bhajē śāradāmbāmajasraṁ madambām || 3 ||

susīmantavēṇīṁ dr̥śā nirjitaiṇīṁ
ramatkīravāṇīṁ namadvajrapāṇīm |
sudhāmantharāsyāṁ mudā cintyavēṇīṁ
bhajē śāradāmbāmajasraṁ madambām || 4 ||

suśāntāṁ sudēhāṁ dr̥gantē kacāntāṁ
lasatsallatāṅgīmanantāmacintyām |
smarēttāpasaiḥ sargapūrvasthitāṁ tāṁ
bhajē śāradāmbāmajasraṁ madambām || 5 ||

kuraṅgē turaṅgē mr̥gēndrē khagēndrē
marālē madēbhē mahōkṣē:’dhirūḍhām |
mahatyāṁ navamyāṁ sadā sāmarūpāṁ
bhajē śāradāmbāmajasraṁ madambām || 6 ||

jvalatkāntivahniṁ jaganmōhanāṅgīṁ
bhajē mānasāmbhōja subhrāntabhr̥ṅgīm |
nijastōtrasaṅgītanr̥tyaprabhāṅgīṁ
bhajē śāradāmbāmajasraṁ madambām || 7 ||

bhavāmbhōjanētrājasampūjyamānāṁ
lasanmandahāsaprabhāvaktracihnām |
calaccañcalācārutāṭaṅkakarṇāṁ
bhajē śāradāmbāmajasraṁ madambām || 8 ||

iti śrī śāradā bhujaṅga prayātāṣṭakam |

---

See more śrī sarasvatī stōtrāṇi for chanting.

Did you see any mistake/variation in the content above? Click here to report mistakes and corrections in Stotranidhi content.