Read in తెలుగు / ಕನ್ನಡ / தமிழ் / देवनागरी / English (IAST)
|| hanūmanmantraḥ ||
aṅgadasya vacaḥ śrutvā sugrīvaḥ sacivaiḥ saha |
lakṣmaṇaṁ kupitaṁ śrutvā mumōcāsanamātmavān || 1 ||
sacivānabravīdvākyaṁ niścitya gurulāghavam |
mantrajñānmantrakuśalō mantrēṣu pariniṣṭhitān || 2 ||
na mē durvyāhr̥taṁ kiñcinnāpi mē duranuṣṭhitam |
lakṣmaṇō rāghavabhrātā kruddhaḥ kimiti cintayē || 3 ||
asuhr̥dbhirmamāmitrairnityamantaradarśibhiḥ |
mama dōṣānasambhūtān śrāvitō rāghavānujaḥ || 4 ||
atra tāvadyathābuddhi sarvairēva yathāvidhi |
bhāvasya niścayastāvadvijñēyō nipuṇaṁ śanaiḥ || 5 ||
na khalvasti mama trāsō lakṣmaṇānnāpi rāghavāt |
mitraṁ tvasthānakupitaṁ janayatyēva sambhramam || 6 ||
sarvathā sukaraṁ mitraṁ duṣkaraṁ paripālanam |
anityatvācca cittānāṁ prītiralpē:’pi bhidyatē || 7 ||
atō nimittaṁ trastō:’haṁ rāmēṇa tu mahātmanā |
yanmamōpakr̥taṁ śakyaṁ pratikartuṁ na tanmayā || 8 ||
sugrīvēṇaivamuktastu hanumān mārutātmajaḥ |
uvāca svēna tarkēṇa madhyē vānaramantriṇām || 9 ||
sarvathā naitadāścaryaṁ yastvaṁ harigaṇēśvara |
na vismarasi susnigdhamupakārakr̥taṁ śubham || 10 ||
rāghavēṇa tu vīrēṇa bhayamutsr̥jya dūrataḥ |
tvatpriyārthaṁ hatō vālī śakratulyaparākramaḥ || 11 ||
sarvathā praṇayāt kruddhō rāghavō nātra saṁśayaḥ |
bhrātaraṁ samprahitavān lakṣmaṇaṁ lakṣmivardhanam || 12 ||
tvaṁ pramattō na jānīṣē kālaṁ kālavidāṁ vara |
phullasaptacchadaśyāmā pravr̥ttā tu śaracchivā || 13 ||
nirmalagrahanakṣatrā dyauḥ pranaṣṭabalāhakā |
prasannāśca diśaḥ sarvāḥ saritaśca sarāṁsi ca || 14 ||
prāptamudyōgakālaṁ tu nāvaiṣi haripuṅgava |
tvaṁ pramatta iti vyaktaṁ lakṣmaṇō:’yamihāgataḥ || 15 ||
ārtasya hr̥tadārasya paruṣaṁ puruṣāntarāt |
vacanaṁ marṣaṇīyaṁ tē rāghavasya mahātmanaḥ || 16 ||
kr̥tāparādhasya hi tē nānyat paśyāmyahaṁ kṣamam |
antarēṇāñjaliṁ baddhvā lakṣmaṇasya prasādanāt || 17 ||
niyuktairmantribhirvācyō hyavaśyaṁ pārthivō hitam |
ata ēva bhayaṁ tyaktvā bravīmyavadhr̥taṁ vacaḥ || 18 ||
abhikruddhaḥ samarthō hi cāpamudyamya rāghavaḥ |
sadēvāsuragandharvaṁ vaśē sthāpayituṁ jagat || 19 ||
na sa kṣamaḥ kōpayituṁ yaḥ prasādyaḥ punarbhavēt |
pūrvōpakāraṁ smaratā kr̥tajñēna viśēṣataḥ || 20 ||
tasya mūrdhnā praṇamya tvaṁ saputraḥ sasuhr̥jjanaḥ |
rājaṁstiṣṭha svasamayē bharturbhāryēva tadvaśē || 21 ||
na rāmarāmānujaśāsanaṁ tvayā
kapīndra yuktaṁ manasāpyapōhitum |
manō hi tē jñāsyati mānuṣaṁ balaṁ
sarāghavasyāsya surēndravarcasaḥ || 22 ||
ityārṣē śrīmadrāmāyaṇē vālmīkīyē ādikāvyē kiṣkindhākāṇḍē dvātriṁśaḥ sargaḥ || 32 ||
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē araṇyakāṇḍa for chanting.
మా తదుపరి ప్రచురణ : శ్రీ విష్ణు స్తోత్రనిధి ముద్రించుటకు ఆలోచన చేయుచున్నాము. ఇటీవల శ్రీ దక్షిణామూర్తి స్తోత్రనిధి పుస్తకము విడుదల చేశాము. Click here to buy.
పైరసీ ప్రకటన : శ్రీఆదిపూడి వెంకటశివసాయిరామ్ గారు మరియు నాగేంద్రాస్ న్యూ గొల్లపూడి వీరాస్వామి సన్ కలిసి స్తోత్రనిధి పుస్తకాలను ఉన్నది ఉన్నట్టు కాపీచేసి, పేరు మార్చి అమ్ముతున్నారు. దయచేసి గమనించగలరు.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
