Durga Saptashati Pradhanika Rahasyam – prādhānika rahasyam

asya śrī saptaśatīrahasyatrayasya nārāyaṇa r̥ṣiḥ anuṣṭupchandaḥ mahākālīmahālakṣmīmahāsarasvatyō dēvatā yathōktaphalāvāptyarthaṁ japē viniyōgaḥ |

rājōvāca |
bhagavannavatārā mē caṇḍikāyāstvayōditāḥ |
ētēṣāṁ prakr̥tiṁ brahman pradhānaṁ vaktumarhasi || 1 ||

ārādhyaṁ yanmayā dēvyāḥ svarūpaṁ yēna ca dvija |
vidhinā brūhi sakalaṁ yathāvatpraṇatasya mē || 2 ||

r̥ṣiruvāca |
idaṁ rahasyaṁ paramamanākhyēyaṁ pracakṣatē |
bhaktō:’sīti na mē kiñcittavāvācyaṁ narādhipa || 3 ||

sarvasyādyā mahālakṣmīstriguṇā paramēśvarī |
lakṣyālakṣyasvarūpā sā vyāpya kr̥tsnaṁ vyavasthitā || 4 ||

mātuluṅgaṁ gadāṁ khēṭaṁ pānapātraṁ ca bibhratī |
nāgaṁ liṅgaṁ ca yōniṁ ca bibhratī nr̥pa mūrdhani || 5 ||

taptakāñcanavarṇābhā taptakāñcanabhūṣaṇā |
śūnyaṁ tadakhilaṁ svēna pūrayāmāsa tējasā || 6 ||

śūnyaṁ tadakhilaṁ lōkaṁ vilōkya paramēśvarī |
babhāra paramaṁ rūpaṁ tamasā kēvalēna hi || 7 ||

sā bhinnāñjanasaṅkāśā daṁṣṭrāṅkitavarānanā |
viśālalōcanā nārī babhūva tanumadhyamā || 8 ||

khaḍgapātraśiraḥkhēṭairalaṅkr̥tacaturbhujā |
kabandhahāraṁ śirasā bibhrāṇā hi śiraḥsrajam || 9 ||

sā prōvāca mahālakṣmīṁ tāmasī pramadōttamā |
nāma karma ca mē mātardēhi tubhyaṁ namō namaḥ || 10 ||

tāṁ prōvāca mahālakṣmīstāmasīṁ pramadōttamām |
dadāmi tava nāmāni yāni karmāṇi tāni tē || 11 ||

mahāmāyā mahākālī mahāmārī kṣudhā tr̥ṣā |
nidrā tr̥ṣṇā caikavīrā kālarātrirduratyayā || 12 ||

imāni tava nāmāni pratipādyāni karmabhiḥ |
ēbhiḥ karmāṇi tē jñātvā yō:’dhītē sō:’śnutē sukham || 13 ||

tāmityuktvā mahālakṣmīḥ svarūpamaparaṁ nr̥pa |
sattvākhyēnātiśuddhēna guṇēnēnduprabhaṁ dadhau || 14 ||

akṣamālāṅkuśadharā vīṇāpustakadhāriṇī |
sā babhūva varā nārī nāmānyasyai ca sā dadau || 15 ||

mahāvidyā mahāvāṇī bhāratī vāk sarasvatī |
āryā brāhmī kāmadhēnurvēdagarbhā ca dhīśvarī || 16 || [surēśvarī]

athōvāca mahālakṣmīrmahākālīṁ sarasvatīm |
yuvāṁ janayatāṁ dēvyau mithunē svānurūpataḥ || 17 ||

ityuktvā tē mahālakṣmīḥ sasarja mithunaṁ svayam |
hiraṇyagarbhau rucirau strīpuṁsau kamalāsanau || 18 ||

brahman vidhē viriñcēti dhātarityāha taṁ naram |
śrīḥ padmē kamalē lakṣmītyāha mātā ca tāṁ striyam || 19 ||

mahākālī bhāratī ca mithunē sr̥jataḥ saha |
ētayōrapi rūpāṇi nāmāni ca vadāmi tē || 20 ||

nīlakaṇṭhaṁ raktabāhuṁ śvētāṅgaṁ candraśēkharam |
janayāmāsa puruṣaṁ mahākālī sitāṁ striyam || 21 ||

sa rudraḥ śaṅkaraḥ sthāṇuḥ kapardī ca trilōcanaḥ |
trayī vidyā kāmadhēnuḥ sā strī bhāṣākṣarā svarā || 22 ||

sarasvatī striyaṁ gaurīṁ kr̥ṣṇaṁ ca puruṣaṁ nr̥pa |
janayāmāsa nāmāni tayōrapi vadāmi tē || 23 ||

viṣṇuḥ kr̥ṣṇō hr̥ṣīkēśō vāsudēvō janārdanaḥ |
umā gaurī satī caṇḍī sundarī subhagā śivā || 24 ||

ēvaṁ yuvatayaḥ sadyaḥ puruṣatvaṁ prapēdirē |
cakṣuṣmantō nu paśyanti nētarē:’tadvidō janāḥ || 25 ||

brahmaṇē pradadau patnīṁ mahālakṣmīrnr̥pa trayīm |
rudrāya gaurīṁ varadāṁ vāsudēvāya ca śriyam || 26 ||

svarayā saha sambhūya viriñcō:’ṇḍamajījanat |
bibhēda bhagavān rudrastadgauryā saha vīryavān || 27 ||

aṇḍamadhyē pradhānādi kāryajātamabhūnnr̥pa |
mahābhūtātmakaṁ sarvaṁ jagatsthāvarajaṅgamam || 28 ||

pupōṣa pālayāmāsa tallakṣmyā saha kēśavaḥ |
sañjahāra jagatsarvaṁ saha gauryā mahēśvaraḥ || 29 ||

mahālakṣmīrmahārāja sarvasattvamayīśvarī |
nirākārā ca sākārā saiva nānābhidhānabhr̥t || 30 ||

nāmāntarairnirūpyaiṣā nāmnā nānyēna kēnacit || 31 ||

iti prādhānikaṁ rahasyaṁ sampūrṇam |

Facebook Comments

You may also like...

Leave a Reply

Your email address will not be published.

error: Not allowed
%d bloggers like this: