Read in తెలుగు / ಕನ್ನಡ / தமிழ் / देवनागरी / English (IAST)
|| ambarīṣayajñaḥ ||
śunaḥśēpaṁ naraśrēṣṭha gr̥hītvā tu mahāyaśāḥ |
vyaśrāmyatpuṣkarē rājā madhyāhnē raghunandana || 1 ||
tasya viśramamāṇasya śunaḥśēpō mahāyaśāḥ |
puṣkarakṣētramāgamya viśvāmitraṁ dadarśa ha || 2 ||
tapyantamr̥ṣibhiḥ sārdhaṁ mātulaṁ paramāturaḥ |
vivarṇavadanō dīnastr̥ṣṇayā ca śramēṇa ca || 3 ||
papātāṅkē munau rāma vākyaṁ cēdamuvāca ha | [munērāśu]
na mē:’sti mātā na pitā jñātayō bāndhavāḥ kutaḥ || 4 ||
trātumarhasi māṁ saumya dharmēṇa munipuṅgavaḥ |
trātā tvaṁ hi muniśrēṣṭha sarvēṣāṁ tvaṁ hi bhāvanaḥ || 5 ||
rājā ca kr̥takāryaḥ syādahaṁ dīrghāyuravyayaḥ |
svargalōkamupāśnīyāṁ tapastaptvā hyanuttamam || 6 ||
tvaṁ mē nāthō hyanāthasya bhava bhavyēna cētasā |
pitēva putraṁ dharmātmaṁstrātumarhasi kilbiṣāt || 7 ||
tasya tadvacanaṁ śrutvā viśvāmitrō mahātapāḥ |
sāntvayitvā bahuvidhaṁ putrānidamuvāca ha || 8 ||
yatkr̥tē pitaraḥ putrāñjanayanti śubhārthinaḥ |
paralōkahitārthāya tasya kālō:’yamāgataḥ || 9 ||
ayaṁ munisutō bālō mattaḥ śaraṇamicchati |
asya jīvitamātrēṇa priyaṁ kuruta putrakāḥ || 10 ||
sarvē sukr̥takarmāṇaḥ sarvē dharmaparāyaṇāḥ |
paśubhūtā narēndrasya tr̥ptimagnēḥ prayacchata || 11 ||
nāthavāṁśca śunaḥśēpō yajñaścāvighnitō bhavēt |
dēvatāstarpitāśca syurmama cāpi kr̥taṁ vacaḥ || 12 ||
munēstu vacanaṁ śrutvā madhuṣyandādayaḥ sutāḥ |
sābhimānaṁ naraśrēṣṭha salīlamidamabruvan || 13 ||
kathamātmasutānhitvā trāyasē:’nyasutaṁ vibhō |
akāryamiva paśyāmaḥ śvamāṁsamiva bhōjanē || 14 ||
tēṣāṁ tadvacanaṁ śrutvā putrāṇāṁ munipuṅgavaḥ |
krōdhasaṁraktanayanō vyāhartumupacakramē || 15 ||
niḥsādhvasamidaṁ prōktaṁ dharmādapi vigarhitam |
atikramya tu madvākyaṁ dāruṇaṁ rōmaharṣaṇam || 16 ||
śvamāṁsabhōjinaḥ sarvē vāsiṣṭhā iva jātiṣu |
pūrṇaṁ varṣasahasraṁ tu pr̥thivyāmanuvatsyatha || 17 ||
kr̥tvā śāpasamāyuktānputrānmunivarastadā |
śunaḥśēpamuvācārtaṁ kr̥tvā rakṣāṁ nirāmayām || 18 ||
pavitrapāśairāsaktō raktamālyānulēpanaḥ |
vaiṣṇavaṁ yūpamāsādya vāgbhiragnimudāhara || 19 ||
imē tu gāthē dvē divyē gāyēthā muniputraka |
ambarīṣasya yajñē:’smiṁstataḥ siddhimavāpsyasi || 20 ||
śunaḥśēpō gr̥hītvā tē dvē gāthē susamāhitaḥ |
tvarayā rājasiṁhaṁ tamambarīṣamuvāca ha || 21 ||
rājasiṁha mahāsattva śīghraṁ gacchāvahē sadaḥ |
nirvartayasva rājēndra dīkṣāṁ ca samupāviśa || 22 ||
tadvākyamr̥ṣiputrasya śrutvā harṣasamutsukaḥ |
jagāma nr̥patiḥ śīghraṁ yajñavāṭamatandritaḥ || 23 ||
sadasyānumatē rājā pavitrakr̥talakṣaṇam |
paśuṁ raktāmbaraṁ kr̥tvā yūpē taṁ samabandhayat || 24 ||
sa baddhō vāgbhiragryābhirabhituṣṭāva vai surau |
indramindrānujaṁ caiva yathāvanmuniputrakaḥ || 25 ||
tataḥ prītaḥ sahasrākṣō rahasyastutitarpitaḥ |
dīrghamāyustadā prādācchunaḥśēpāya rāghava || 26 ||
sa ca rājā naraśrēṣṭha yajñasyāntamavāptavān |
phalaṁ bahuguṇaṁ rāma sahasrākṣaprasādajam || 27 ||
viśvāmitrō:’pi dharmātmā bhūyastēpē mahātapāḥ |
puṣkarēṣu naraśrēṣṭha daśavarṣaśatāni ca || 28 ||
ityārṣē śrīmadrāmāyaṇē vālmīkīyē ādikāvyē bālakāṇḍē dviṣaṣṭhitamaḥ sargaḥ || 62 ||
bālakāṇḍa triṣaṣṭitamaḥ sargaḥ (63) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.