Read in తెలుగు / ಕನ್ನಡ / தமிழ் / देवनागरी / English (IAST)
|| ayōdhyāvarṇanā ||
sarvā pūrvamiyaṁ yēṣāmāsītkr̥tsnā vasundharā |
prajapatimupādāya nr̥pāṇaṁ jayaśālinām || 1 ||
yēṣāṁ sa sagarō nāma sāgarō yēna khānitaḥ |
ṣaṣṭiḥ putrasahasrāṇi yaṁ yāntaṁ paryavārayan || 2 ||
ikṣvākūṇāmidaṁ tēṣāṁ rājñāṁ vaṁśē mahātmanām |
mahadutpannamākhyanaṁ rāmāyaṇamiti śrutam || 3 ||
tadidaṁ vartayiṣyāmi sarvaṁ nikhilamāditaḥ |
dharmakāmārthasahitaṁ śrōtavyamanasūyayā || 4 ||
kōsalō nāma muditaḥ sphītō janapadō mahān |
niviṣṭaḥ sarayūtīrē prabhūtadhanadhānyavān || 5 ||
ayōdhyā nāma nagarī tatrāsīllōkaviśrutā |
manunā mānavēndrēṇa yā purī nirmitā svayam || 6 ||
āyatā daśa ca dvē ca yōjanāni mahāpurī |
śrīmatī trīṇi vistīrṇā suvibhaktāmahāpathā || 7 ||
rājamārgēṇa mahatā suvibhaktēna śōbhitā |
muktapuṣpāvakīrṇēna jalasiktēna nityaśaḥ || 8 ||
tāṁ tu rājā daśarathō mahārāṣṭravivardhanaḥ |
purīmāvāsayāmāsa divaṁ dēvapatiryathā || 9 ||
kavāṭatōraṇavatīṁ suvibhaktāntarāpaṇām |
sarvayantrāyudhavatīmupētāṁ sarvaśilpibhiḥ || 10 ||
sūtamāgadhasambādhāṁ śrīmatīmatulaprabhām |
uccāṭ-ṭāladhvajavatīṁ śataghnīśatasaṅkulām || 11 ||
vadhūnāṭakasaṅghaiśca samyuktāṁ sarvataḥ purīm |
udyānāmravaṇōpētāṁ mahatīṁ sālamēkhalām || 12 ||
durgagambhīraparikhāṁ durgāmanyairdurāsadam |
vājivāraṇasampūrṇāṁ gōbhiruṣṭraiḥ kharaistathā || 13 ||
sāmantarājasaṅghaiśca balikarmabhirāvr̥tām |
nānādēśanivāsaiśca vaṇigbhirupaśōbhitām || 14 ||
prāsādai ratnavikr̥taiḥ parvatairupaśōbhitām |
kūṭāgāraiśca sampūrṇāmindrasyēvāmarāvatīm || 15 ||
citrāmaṣṭāpadākārāṁ varanārīgaṇairyutām |
sarvaratnasamākīrṇāṁ vimānagr̥haśōbhitām || 16 ||
gr̥hagāḍhāmavicchidrāṁ samabhūmau nivēśitām |
śālitaṇḍulasampūrṇāmikṣudaṇḍarasōdakām || 17 ||
dundubhībhirmr̥daṅgaiśca vīṇābhiḥ paṇavaistathā |
nāditāṁ bhr̥śamatyarthaṁ pr̥thivyāṁ tāmanuttamām || 18 ||
vimānamiva siddhānāṁ tapasādhigataṁ divi |
sunivēśitavēśmāntāṁ narōttamasamāvr̥tām || 19 ||
yē ca bāṇairna vidhyanti viviktamaparāvaram |
śabdavēdhyaṁ ca vitataṁ laghuhastā viśāradāḥ || 20 ||
siṁhavyāghravarāhāṇāṁ mattānāṁ nardatāṁ vanē |
hantārōniśitairbāṇairbalādbāhubalairapi || 21 ||
tādr̥śānāṁ sahasraistāmabhipūrṇāṁ mahārathaiḥ |
purīmāvāsayāmāsa rājā daśarathastadā || 22 ||
tāmagnimadbhirguṇavadbhirāvr̥tāṁ
dvijōttamairvēdaṣaḍaṅgapāragaiḥ |
sahasradaiḥ satyaratairmahātmabhi-
-rmaharṣikalpairr̥ṣibhiśca kēvalaiḥ || 23 ||
ityārṣē śrīmadrāmāyaṇē vālmīkīyē ādikāvyē bālakāṇḍē pañcamaḥ sargaḥ || 5 ||
bālakāṇḍa ṣaṣṭhaḥ sargaḥ (6) >>
See more śrī rāma stōtrāṇi for chanting.
See more vālmīki rāmāyaṇam for chanting.
See more vālmīki rāmāyaṇē bālakāṇḍa for chanting.
గమనిక: ఉగాది నుండి మొదలయ్యే వసంత నవరాత్రుల కోసం "శ్రీ లలితా స్తోత్రనిధి" పారాయణ గ్రంథము అందుబాటులో ఉంది.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
