Read in తెలుగు / ಕನ್ನಡ / தமிழ் / देवनागरी / English (IAST)
(పరాశక్తేరావిర్భావవర్ణనమ్)
అథ శ్రీమద్దేవీభాగవతే ద్వాదశస్కంధే దశమోఽధ్యాయః ||
జనమేజయ ఉవాచ |
భగవన్ సర్వధర్మజ్ఞ సర్వశాస్త్రవతాం వర |
ద్విజాతీనాం తు సర్వేషాం శక్త్యుపాస్తిః శ్రుతీరితా || ౧ ||
సంధ్యాకాలత్రయేఽన్యస్మిన్ కాలే నిత్యతయా విభో |
తాం విహాయ ద్విజాః కస్మాద్గృహ్ణీయుశ్చాన్యదేవతాః || ౨ ||
దృశ్యంతే వైష్ణవాః కేచిద్గాణపత్యాస్తథాపరే |
కాపాలికాశ్చీనమార్గరతా వల్కలధారిణః || ౩ ||
దిగంబరాస్తథా బౌద్ధాశ్చార్వాకా ఏవమాదయః |
దృశ్యంతే బహవో లోకే వేదశ్రద్ధావివర్జితాః || ౪ ||
కిమత్ర కారణం బ్రహ్మంస్తద్భవాన్ వక్తుమర్హతి |
బుద్ధిమంతః పండితాశ్చ నానాతర్కవిచక్షణాః || ౫ ||
అపి సంత్యేవ వేదేషు శ్రద్ధయా తు వివర్జితాః |
న హి కశ్చిత్స్వకల్యాణం బుద్ధ్యా హాతుమిహేచ్ఛతి || ౬ ||
కిమత్ర కారణం తస్మాద్వద వేదవిదాం వర |
మణిద్వీపస్య మహిమా వర్ణితో భవతా పురా || ౭ ||
కీదృక్తదస్తి యద్దేవ్యాః పరం స్థానం మహత్తరమ్ |
తచ్చాపి వద భక్తాయ శ్రద్దధానాయ మేఽనఘ || ౮ ||
ప్రసన్నాస్తు వదంత్యేవ గురవో గుహ్యమప్యుత |
సూత ఉవాచ |
ఇతి రాజ్ఞో వచః శ్రుత్వా భగవాన్ బాదరాయణః || ౯ ||
నిజగాద తతః సర్వం క్రమేణైవ మునీశ్వరాః |
యచ్ఛ్రుత్వా తు ద్విజాతీనాం వేదశ్రద్ధా వివర్ధతే || ౧౦ ||
వ్యాస ఉవాచ |
సమ్యక్పృష్టం త్వయా రాజన్ సమయే సమయోచితమ్ |
బుద్ధిమానసి వేదేషు శ్రద్ధావాంశ్చైవ లక్ష్యసే || ౧౧ ||
పూర్వం మదోద్ధతా దైత్యా దేవైర్యుద్ధం తు చక్రిరే |
శతవర్షం మహారాజ మహావిస్మయకారకమ్ || ౧౨ ||
నానాశస్త్రప్రహరణం నానామాయావిచిత్రితమ్ |
జగత్ క్షయకరం నూనం తేషాం యుద్ధమభూన్నృప || ౧౩ ||
పరాశక్తికృపావేశాద్దేవైర్దైత్యా జితా యుధి |
భువం స్వర్గం పరిత్యజ్య గతాః పాతాలవేశ్మని || ౧౪ ||
తతః ప్రహర్షితా దేవాః స్వపరాక్రమవర్ణనమ్ |
చక్రుః పరస్పరం మోహాత్సాభిమానాః సమంతతః || ౧౫ ||
జయోఽస్మాకం కుతో న స్యాదస్మాకం మహిమా యతః |
సర్వోత్తమః కుత్ర దైత్యాః పామరా నిష్పరాక్రమాః || ౧౬ ||
సృష్టిస్థితిక్షయకరా వయం సర్వే యశస్వినః |
అస్మదగ్రే పామరాణాం దైత్యానాం చైవ కా కథా || ౧౭ ||
పరాశక్తిప్రభావం తే న జ్ఞాత్వా మోహమాగతాః |
తేషామనుగ్రహం కర్తుం తదైవ జగదంబికా || ౧౮ ||
ప్రాదురాసీత్కృపాపూర్ణా యక్షరూపేణ భూమిప |
కోటిసూర్యప్రతీకాశం చంద్రకోటిసుశీతలమ్ || ౧౯ ||
విద్యుత్కోటిసమానాభం హస్తపాదాదివర్జితమ్ |
అదృష్టపూర్వం తద్దృష్ట్వా తేజః పరమసుందరమ్ || ౨౦ ||
సవిస్మయాస్తదా ప్రోచుః కిమిదం కిమిదం త్వితి |
దైత్యానాం చేష్టితం కిం వా మాయా కాపి మహీయసీ || ౨౧ ||
కేనచిన్నిర్మితా వాఽథ దేవానాం స్మయకారిణీ |
సంభూయ తే తదా సర్వే విచారం చక్రురుత్తమమ్ || ౨౨ ||
యక్షస్య నికటే గత్వా ప్రష్టవ్యం కస్త్వమిత్యపి |
బలాబలం తతో జ్ఞాత్వా కర్తవ్యా తు ప్రతిక్రియా || ౨౩ ||
తతో వహ్నిం సమాహూయ ప్రోవాచేంద్రః సురాధిపః |
గచ్ఛ వహ్నే త్వమస్మాకం యతోఽసి ముఖముత్తమమ్ || ౨౪ ||
తతో గత్వా తు జానీహి కిమిదం యక్షమిత్యపి |
సహస్రాక్షవచః శ్రుత్వా స్వపరాక్రమగర్భితమ్ || ౨౫ ||
వేగాత్స నిర్గతో వహ్నిర్యయౌ యక్షస్య సన్నిధౌ |
తదా ప్రోవాచ యక్షస్తం త్వం కోఽసీతి హుతాశనమ్ || ౨౬ ||
వీర్యం చ త్వయి కిం యత్తద్వద సర్వం మమాగ్రతః |
అగ్నిరస్మి తథా జాతవేదా అస్మీతి సోఽబ్రవీత్ || ౨౭ ||
సర్వస్య దహనే శక్తిర్మయి విశ్వస్య తిష్ఠతి |
తదా యక్షః పరం తేజస్తదగ్రే నిదధౌ తృణమ్ || ౨౮ ||
దహైనం యది తే శక్తిర్విశ్వస్య దహనేఽస్తి హి |
తదా సర్వబలేనైవాకరోద్యత్నం హుతాశనః || ౨౯ ||
న శశాక తృణం దగ్ధుం లజ్జితోఽగాత్సురాన్ ప్రతి |
పృష్టే దేవైస్తు వృత్తాంతే సర్వం ప్రోవాచ హవ్యభుక్ || ౩౦ ||
వృథాఽభిమానో హ్యస్మాకం సర్వేశత్వాదికే సురాః |
తతస్తు వృత్రహా వాయుం సమాహూయేదమబ్రవీత్ || ౩౧ ||
త్వయి ప్రోతం జగత్సర్వం త్వచ్చేష్టాభిస్తు చేష్టితమ్ |
త్వం ప్రాణరూపః సర్వేషాం సర్వశక్తివిధారకః || ౩౨ ||
త్వమేవ గత్వా జానీహి కిమిదం యక్షమిత్యపి |
నాన్యః కోఽపి సమర్థోఽస్తి జ్ఞాతుం యక్షం పరం మహః || ౩౩ ||
సహస్రాక్షవచః శ్రుత్వా గుణగౌరవగుంఫితమ్ |
సాభిమానో జగామాశు యత్ర యక్షం విరాజతే || ౩౪ ||
యక్షం దృష్ట్వా తతో వాయుం ప్రోవాచ మృదుభాషయా |
కోఽసి త్వం త్వయి కా శక్తిర్వద సర్వం మమాగ్రతః || ౩౫ ||
తతో యక్షవచః శ్రుత్వా గర్వేణ మరుదబ్రవీత్ |
మాతరిశ్వాఽహమస్మీతి వాయురస్మీతి చాబ్రవీత్ || ౩౬ ||
వీర్యం తు మయి సర్వస్య చాలనే గ్రహణేఽస్తి హి |
మచ్చేష్టయా జగత్సర్వం సర్వవ్యాపారవద్భవేత్ || ౩౭ ||
ఇతి శ్రుత్వా వాయువాణీం నిజగాద పరం మహః |
తృణమేతత్తవాగ్రే యత్తచ్చాలయ యథేప్సితమ్ || ౩౮ ||
నోచేద్గర్వం విహాయైనం లజ్జితో గచ్ఛ వాసవమ్ |
శ్రుత్వా యక్షవచో వాయుః సర్వశక్తిసమన్వితః || ౩౯ ||
ఉద్యోగమకరోత్తచ్చ స్వస్థానాన్న చచాల హ |
లజ్జితోఽగాద్దేవపార్శ్వే హిత్వా గర్వం స చానిలః || ౪౦ ||
వృత్తాంతమవదత్సర్వం గర్వనిర్వాపకారణమ్ |
నైతజ్జ్ఞాతుం సమర్థాః స్మ మిథ్యాగర్వాభిమానినః || ౪౧ ||
అలౌకికం భాతి యక్షం తేజః పరమదారుణమ్ |
తతః సర్వే సురగణాః సహస్రాక్షం సమూచిరే || ౪౨ ||
దేవరాడసి యస్మాత్త్వం యక్షం జానీహి తత్త్వతః |
తత ఇంద్రో మహాగర్వాత్తద్యక్షం సముపాద్రవత్ || ౪౩ ||
ప్రాద్రవచ్చ పరం తేజో యక్షరూపం పరాత్పరమ్ |
అంతర్ధానం తతః ప్రాప తద్యక్షం వాసవాగ్రతః || ౪౪ ||
అతీవ లజ్జితో జాతో వాసవో దేవరాడపి |
యక్షసంభాషణాభావాల్లఘుత్వం ప్రాప చేతసి || ౪౫ ||
అతః పరం న గంతవ్యం మయా తు సురసంసది |
కిం మయా తత్ర వక్తవ్యం స్వలఘుత్వం సురాన్ప్రతి || ౪౬ ||
దేహత్యాగో వరస్తస్మాన్మానో హి మహతాం ధనమ్ |
మానే నష్టే జీవితం తు మృతతుల్యం న సంశయః || ౪౭ ||
ఇతి నిశ్చిత్య తత్రైవ గర్వం హిత్వా సురేశ్వరః |
చరిత్రమీదృశం యస్య తమేవ శరణం గతః || ౪౮ ||
తస్మిన్నేవ క్షణే జాతా వ్యోమవాణీ నభస్తలే |
మాయాబీజం సహస్రాక్ష జప తేన సుఖీ భవ || ౪౯ ||
తతో జజాప పరమం మాయాబీజం పరాత్పరమ్ |
లక్షవర్షం నిరాహారో ధ్యానమీలితలోచనః || ౫౦ ||
అకస్మాచ్చైత్రమాసీయనవమ్యాం మధ్యగే రవౌ |
తదేవావిరభూత్తేజస్తస్మిన్నేవ స్థలే పునః || ౫౧ ||
తేజోమండలమధ్యే తు కుమారీం నవయౌవనామ్ |
భాస్వజ్జపాప్రసూనాభాం బాలకోటిరవిప్రభామ్ || ౫౨ ||
బాలశీతాంశముకుటాం వస్త్రాంతర్వ్యంజితస్తనీమ్ |
చతుర్భిర్వరహస్తైస్తు వరపాశాంకుశాభయాన్ || ౫౩ ||
దధానాం రమణీయాంగీం కోమలాంగలతాం శివామ్ |
భక్తకల్పద్రుమామంబాం నానాభూషణభూషితామ్ || ౫౪ ||
త్రినేత్రాం మల్లికామాలాకబరీజూటశోభితామ్ |
చతుర్దిక్షు చతుర్వేదైర్మూర్తిమద్భిరభిష్టుతామ్ || ౫౫ ||
దంతచ్ఛటాభిరభితః పద్మరాగీకృతక్షమామ్ |
ప్రసన్నస్మేరవదనాం కోటికందర్పసుందరామ్ || ౫౬ ||
రక్తాంబరపరీధానాం రక్తచందనచర్చితామ్ |
ఉమాభిధానాం పురతో దేవీం హైమవతీం శివామ్ || ౫౭ ||
నిర్వ్యాజకరుణామూర్తిం సర్వకారణకారణామ్ |
దదర్శ వాసవస్తత్ర ప్రేమగద్గదితాంతరః || ౫౮ ||
ప్రేమాశ్రుపూర్ణనయనో రోమాంచితతనుస్తతః |
దండవత్ ప్రణనామాథ పాదయోర్జగదీశితుః || ౫౯ ||
తుష్టావ వివిధైః స్తోత్రైర్భక్తిసన్నతకంధరః |
ఉవాచ పరమప్రీతః కిమిదం యక్షమిత్యపి || ౬౦ ||
ప్రాదుర్భూతం చ కస్మాత్తద్వద సర్వం సుశోభనే |
ఇతి తస్య వచః శ్రుత్వా ప్రోవాచ కరుణార్ణవా || ౬౧ ||
రూపం మదీయం బ్రహ్మైతత్సర్వకారణకారణమ్ |
మాయాధిష్ఠానభూతం తు సర్వసాక్షి నిరామయమ్ || ౬౨ ||
సర్వే వేదా యత్పదమామనంతి
తపాంసి సర్వాణి చ యద్వదంతి |
యదిచ్ఛంతో బ్రహ్మచర్యం చరంతి
తత్తే పదం సంగ్రహేణ బ్రవీమి || ౬౩ ||
ఓమిత్యేకాక్షరం బ్రహ్మ తదేవాహుశ్చ హ్రీంమయమ్ |
ద్వే బీజే మమ మంత్రౌ స్తో ముఖ్యత్వేన సురోత్తమ || ౬౪ ||
భాగద్వయవతీ యస్మాత్ సృజామి సకలం జగత్ |
తత్రైకభాగః సంప్రోక్తః సచ్చిదానందనామకః || ౬౫ ||
మాయాప్రకృతిసంజ్ఞస్తు ద్వితీయో భాగ ఈరితః |
సా చ మాయా పరా శక్తిః శక్తిమత్యహమీశ్వరీ || ౬౬ ||
చంద్రస్య చంద్రికేవేయం మమాభిన్నత్వమాగతా |
సామ్యావస్థాత్మికా చైషా మాయా మమ సురోత్తమ || ౬౭ ||
ప్రలయే సర్వజగతో మదభిన్నైవ తిష్ఠతి |
ప్రాణికర్మపరీపాకవశతః పునరేవ హి || ౬౮ ||
రూపం తదేవమవ్యక్తం వ్యక్తీభావముపైతి చ |
అంతర్ముఖా తు యాఽవస్థా సా మాయేత్యభిధీయతే || ౬౯ ||
బహిర్ముఖా తు యా మాయా తమఃశబ్దేన సోచ్యతే |
బహిర్ముఖాత్తమోరూపాజ్జాయతే సత్త్వసంభవః || ౭౦ ||
రజోగుణస్తదైవ స్యాత్ సర్గాదౌ సురసత్తమ |
గుణత్రయాత్మకాః ప్రోక్తా బ్రహ్మవిష్ణుమహేశ్వరాః || ౭౧ ||
రజోగుణాధికో బ్రహ్మా విష్ణుః సత్త్వాధికో భవేత్ |
తమోగుణాధికో రుద్రః సర్వకారణరూపధృక్ || ౭౨ ||
స్థూలదేహో భవేద్బ్రహ్మా లింగదేహో హరిః స్మృతః |
రుద్రస్తు కారణో దేహస్తురీయా త్వహమేవ హి || ౭౩ ||
సామ్యావస్థా తు యా ప్రోక్తా సర్వాంతర్యామిరూపిణీ |
అత ఊర్ధ్వం పరం బ్రహ్మ మద్రూపం రూపవర్జితమ్ || ౭౪ ||
నిర్గుణం సగుణం చేతి ద్విధా మద్రూపముచ్యతే |
నిర్గుణం మాయయా హీనం సగుణం మాయయా యుతమ్ || ౭౫ ||
సాఽహం సర్వం జగత్సృష్ట్వా తదంతః సంప్రవిశ్య చ |
ప్రేరయామ్యనిశం జీవం యథాకర్మ యథాశ్రుతమ్ || ౭౬ ||
సృష్టిస్థితితిరోధానే ప్రేరయామ్యహమేవ హి |
బ్రహ్మాణం చ తథా విష్ణుం రుద్రం వై కారణాత్మకమ్ || ౭౭ ||
మద్భయాద్వాతి పవనో భీత్యా సూర్యశ్చ గచ్ఛతి |
ఇంద్రాగ్నిమృత్యవస్తద్వత్సాఽహం సర్వోత్తమా స్మృతా || ౭౮ ||
మత్ప్రసాదాద్భవద్భిస్తు జయో లబ్ధోఽస్తి సర్వథా |
యుష్మానహం నర్తయామి కాష్ఠపుత్తలికోపమాన్ || ౭౯ ||
కదాచిద్దేవవిజయం దైత్యానాం విజయం క్వచిత్ |
స్వతంత్రా స్వేచ్ఛయా సర్వం కుర్వే కర్మానురోధతః || ౮౦ ||
తాం మాం సర్వాత్మికాం యూయం విస్మృత్య నిజగర్వతః |
అహంకారావృతాత్మానో మోహమాప్తా దురంతకమ్ || ౮౧ ||
అనుగ్రహం తతః కర్తుం యుష్మద్దేహాదనుత్తమమ్ |
నిఃసృతం సహసా తేజో మదీయం యక్షమిత్యపి || ౮౨ ||
అతః పరం సర్వభావైర్హిత్వా గర్వం తు దేహజమ్ |
మామేవ శరణం యాత సచ్చిదానందరూపిణీమ్ || ౮౩ ||
వ్యాస ఉవాచ |
ఇత్యుక్త్యా చ మహాదేవీ మూలప్రకృతిరీశ్వరీ |
అంతర్ధానం గతా సద్యో భక్త్యా దేవైరభిష్టుతా || ౮౪ ||
తతః సర్వే స్వగర్వం తు విహాయ పదపంకజమ్ |
సమ్యగారాధయామాసుర్భగవత్యాః పరాత్పరమ్ || ౮౫ ||
త్రిసంధ్యం సర్వదా సర్వే గాయత్రీజపతత్పరాః |
యజ్ఞభాగాదిభిః సర్వే దేవీం నిత్యం సిషేవిరే || ౮౬ ||
ఏవం సత్యయుగే సర్వే గాయత్రీజపతత్పరాః |
తారహృల్లేఖయోశ్చాపి జపే నిష్ణాతమానసాః || ౮౭ ||
న విష్ణూపాసనా నిత్యా వేదే నోక్తా తు కుత్రచిత్ |
న విష్ణుదీక్షా నిత్యాస్తి శివస్యాపి తథైవ చ || ౮౮ ||
గాయత్ర్యుపాసనా నిత్యా సర్వవేదైః సమీరితా |
యయా వినా త్వధఃపాతో బ్రాహ్మణస్యాస్తి సర్వథా || ౮౯ ||
తావతా కృతకృత్యత్వం నాన్యాపేక్షా ద్విజస్య హి |
గాయత్రీమాత్రనిష్ణాతో ద్విజో మోక్షమవాప్నుయాత్ || ౯౦ ||
కుర్యాదన్యన్న వా కుర్యాదితి ప్రాహ మనుః స్వయమ్ |
విహాయ తాం తు గాయత్రీం విష్ణూపాస్తిపరాయణాః || ౯౧ ||
శివోపాస్తిరతో విప్రో నరకం యాతి సర్వథా |
తస్మాదాద్యయుగే రాజన్ గాయత్రీజపతత్పరాః |
దేవీపదాంబుజరతా ఆసన్ సర్వే ద్విజోత్తమాః || ౯౨ ||
ఇతి శ్రీమద్దేవీభాగవతే మహాపురాణే ద్వాదశస్కంధే పరాశక్తేరావిర్భావవర్ణనం నామ అష్టమోఽధ్యాయః ||
మరిన్ని శ్రీ లలితా స్తోత్రాలు చూడండి. మరిన్ని దేవీ స్తోత్రాలు చూడండి.
గమనిక : రాబోయే మహాశివరాత్రి సందర్భంగా "శ్రీ శివ స్తోత్రనిధి" పుస్తకము కొనుగోలుకు అందుబాటులో ఉంది. Click here to buy.
Chant other stotras in తెలుగు, ಕನ್ನಡ, தமிழ், देवनागरी, english.
Did you see any mistake/variation in the content above? Click here to report mistakes and corrections in Stotranidhi content.
