Mahanyasam 24. Malapakarshana Snanam – 24) malāpakarṣaṇasnānam

śrīrudrāya namaḥ śuddhodakena snapayāmi |

(tai.saṃ.5-6-1)
hira̍ṇyavarṇā̱: śuca̍yaḥ pāva̱kā yāsu̍ jā̱taḥ ka̱śyapo̱ yāsvindra̍: |
a̱gniṃ yā garbha̍ṃ dadhi̱re virū̍pā̱stā na̱ āpa̱: śagg syo̱nā bha̍vantu || 1

// hiraṇya-varṇāḥ, śucayaḥ, pāvakāḥ, yasu, jātaḥ, kaśyapaḥ, yāsu, indraḥ, agniṃ, yāḥ, garbhaṃ, dadhire, vi-rūpāḥ, tāḥ, naḥ, āpaḥ, śaṃ, syonāḥ, bhavantu //

yāsā̱g̱ṃ rājā̱ varu̍ṇo̱ yāti̱ madhye̍ satyānṛ̱te a̍va̱paśya̱ñjanā̍nām |
ma̱dhu̱ścuta̱: śuca̍yo̱ yāḥ pā̍va̱kāstā na̱ āpa̱: śagg syo̱nā bha̍vantu || 2

// yāsāṃ, rājā, varuṇaḥ, yāti, madhye, satya-anṛte, ava-paśyan, janānāṃ, madhu-ścutaḥ, śucayaḥ, yāḥ, pāvakāḥ, tāḥ, naḥ, āpaḥ, śaṃ, syonā, bhavantu //

yāsā̎ṃ de̱vā di̱vi kṛ̱ṇvanti̍ bha̱kṣaṃ yā a̱ntari̍kṣe bahu̱dhā bhava̍nti |
yāḥ pṛ̍thi̱vīṃ paya̍so̱ndanti̍ śu̱krāstā na̱ āpa̱: śagg syo̱nā bha̍vantu || 3

// yāsāṃ, devāḥ, divi, kṛṇvanti, bhakṣaṃ, yāḥ, antarikṣe, bahu-dhā, bhavanti, yāḥ, pṛthivīṃ, payasā, undanti, śukrāḥ, tāḥ, naḥ, āpaḥ, śaṃ, syonā, bhavantu //

śi̱vena̍ mā̱ cakṣu̍ṣā paśyatāpaḥ śi̱vayā̍ ta̱nuvo’pa̍ spṛśata̱ tvaca̍ṃ me |
sarvāg̍ṃ a̱gnīgṃ ra̍phsu̱ṣado̍ huve vo̱ mayi̱ varco̱ bala̱mojo̱ nidha̍tta || 4

// śivena, mā, cakṣuṣā, paśyata, āpaḥ, śivayā, tanuvā, upa, spṛśata, tvacaṃ, me, sarvān, agnīn, aphsu-sadaḥ, huve, vaḥ, mayi, varcaḥ, balaṃ, ojo, ni, dhatta //

yada̱daḥ sa̍mpraya̱tīrahā̱vana̍datāha̱ te |
tasmā̱dā na̱dyo̍ nāma̍ stha̱ tā vo̱ nāmā̍ni sindhavaḥ || 5

// yat, adaḥ, saṃ-prayatīḥ, ahau, anadata, hate, tasmāt, ā, nadyaḥ, nāma, stha, tā, vaḥ, nāmāni, sindhavaḥ //

yatpreṣi̍tā̱ varu̍ṇe̱na tāḥ śībhag̍ṃ sa̱mava̍lgata |
tadā̎pno̱dindro̍ vo ya̱tīstasmā̱dāpo̱ anu̍sthana || 6

// yat, pra-iṣitāḥ, varuṇena, tāḥ, śībhaṃ, saṃ-avalgata, tat, āpnot, indraḥ, vaḥ, yātīḥ, tasmat, āpaḥ, anu, sthāna //

a̱pa̱kā̱mag syanda̍mānā̱ avī̍varata vo̱ hi ka̎m |
indro̍ va̱: śakti̍bhirdevī̱stasmā̱dvārṇāma̍ vo hi̱tam || 7

// apa-kāmaṃ, syandamānāḥ, avīvarata, vaḥ, hikaṃ, indraḥ, vaḥ, śakti-bhiḥ, devīḥ, tasmāt, vāḥ, nāma, vaḥ, hitaṃ //

eko̍ de̱vo apya̍tiṣṭha̱tsyanda̍mānā yathāva̱śam |
udā̍niṣurma̱hīriti̱ tasmā̍duda̱kamu̍cyate || 8

// ekaḥ, devaḥ, api, atiṣṭhat, syandamānāḥ, yathā-vaśaṃ, ut, ānuṣuḥ, mahīḥ, iti, tasmāt, udakaṃ, ucyate //

āpo̍ bha̱drā ghṛ̱tamidāpa̍ āsura̱gnīṣomau̍ bibhra̱tyā̱pa̱ ittāḥ |
tī̱vro raso̍ madhu̱pṛcā̍ṃ a̱ra̱ṅga̱ma ā mā̎ prā̱ṇena̍ sa̱ha varca̍sā gan || 9

// āpaḥ, bhadrāḥ, ghṛtaṃ, it, āpaḥ, āsuḥ, agnī-somau, bibhrati, āpaḥ, it, tāḥ, tīvraḥ, rasaḥ, madhu-pṛcāṃ, araṅgamaḥ, ā, mā, pra-anena, saha, varcasā, gan //

āditpa̍śyāmyu̱ta vā̍ śṛṇo̱myā mā̱ ghoṣo̍ gacchati̱ vāṅna̍ āsām |
manye̍ bhejā̱no a̱mṛta̍sya̱ tarhi̱ hira̍ṇyavarṇā̱ atṛ̍paṃ ya̱dā va̍: || 10

// āt, it, paśyāmi, uta, vā, śṛṇomi, ā, mā, ghoṣaḥ, gacchati, vāk, naḥ, āsāṃ, manye, bhejānaḥ, amṛtasya, tarhi, hiraṇya-varṇāḥ, atṛpaṃ, yadā, vaḥ //

āpo̱ hi ṣṭhā ma̍yo̱bhuva̱stā na̍ ū̱rje da̍dhātana |
ma̱he raṇā̍ya̱ cakṣa̍se || 11
yo va̍: śi̱vata̍mo̱ rasa̱stasya̍ bhājayate̱ha na̍: |
u̱śa̱tīri̍va mā̱ta̍raḥ || 12
tasmā̱ ara̍ṃ gamāma vo̱ yasya̱ kṣayā̍ya̱ jinva̍tha |
āpo̍ ja̱naya̍thā ca naḥ || 13

// āpaḥ, hi, stha, mayaḥ-bhuvaḥ, tāḥ, naḥ, ūrje, dadhātana, mahe, raṇāya, cakṣase, yaḥ, vaḥ, śiva-tamaḥ, rasaḥ, tasya, bhājayata, iha, naḥ, uśatīḥ, iva, mātaraḥ, tasmai, araṃ, gamāma, vaḥ, yasya, kṣayāya, jinvatha, āpaḥ, janayatha, ca, naḥ //

di̱vi śra̍yasvā̱ntari̍kṣe yatasva pṛthi̱vyā saṃ bha̍va brahmavarca̱sama̍si brahmavarca̱sāya̍ tvā || 14

// divi, śrayasva, antarikṣe, yatasva, pṛthivyā, saṃ, bhava, brahmavarcasaṃ, asi, brahmavarcasāya, tvā //

(tai.saṃ.5-6-2)
a̱pāṃ grahā̎ngṛhṇātye̱tadvāva rā̍ja̱sūya̱ṃ yade̱te grahā̎: sa̱vo̎’gnirva̍ruṇasa̱vo rā̍ja̱sūya̍magnisa̱vaścitya̱stābhyā̍me̱va sū̍ya̱te’tho̍ u̱bhāve̱va lo̱kāva̱bhi ja̍yati̱ yaśca̍ rāja̱sūye̍nejā̱nasya̱ yaścā̎gni̱cita̱ āpo̍ bhava̱ntyāpo̱ vā a̱gnerbhrātṛ̍vyā̱ yada̱po̎’gnera̱dhastā̍dupa̱dadhā̍ti̱ bhrātṛ̍vyābhibhūtyai̱ bhava̍tyā̱tmanā̱ parā̎’sya̱ bhrātṛ̍vyo bhavatya̱mṛta̍ṃ vā āpa̱stasmā̍da̱dbhirava̍tāntama̱bhiṣi̍ñcanti̱ nā”rti̱mārcha̍ti̱ sarva̱māyu̍reti̱ ||

// apāṃ, grahān, gṛhṇāti, etat, vāva, rāja-sūyaṃ, yat, ete, grahāḥ, savaḥ, agniḥ, varuṇa-savaḥ, rāja-sūyaṃ, agni-savaḥ, cityaḥ, tābhyāṃ, eva, sūyate, atho, ubhau, eva, lokau, abhīti, jayati, yaḥ, ca, rāja-sūyena, ījānasya, yaḥ, ca, agni-citaḥ, āpaḥ, bhavanti, āpaḥ, vai, agneḥ, bhrātṛvyāḥ, yat, āpaḥ, agneḥ, adhastāt, upa-dadhāti, bhrātṛvya-abhibhūtyai, bhavati, ātmanā, parā, asya, bhrātṛvyaḥ, bhavati, amṛtaṃ, vai, āpaḥ, tasmāt, at-bhiḥ, ava-tāntāṃ, abhi, siñcanti, na, ārtiṃ, a, ṛcchati, sarvaṃ, āyuḥ, eti //

(tai.brā.1-4-8-1)
pava̍māna̱: suva̱rjana̍: | pa̱vitre̍ṇa̱ vica̍rṣaṇiḥ |
yaḥ potā̱ sa pu̍nātu mā | pu̱nantu̍ mā devaja̱nāḥ |
pu̱nantu̱ mana̍vo dhi̱yā | pu̱nantu̱ viśva̍ ā̱yava̍: |
jāta̍vedaḥ pa̱vitra̍vat | pa̱vitre̍ṇa punāhi mā |
śu̱kreṇa̍ deva̱ dīdya̍t | agne̱ kratvā̱ kratū̱g̱ṃ ranu̍ || 1

yatte̍ pa̱vitra̍ma̱rciṣi̍ | agne̱ vita̍tamanta̱rā |
brahma̱ tena̍ punīmahe | u̱bhābhyā̎ṃ deva savitaḥ |
pa̱vitre̍ṇa sa̱vena̍ ca | i̱daṃ brahma̍ punīmahe |
vai̱śva̱de̱vī pu̍na̱tī de̱vyāgā̎t |
yasyai̍ ba̱hvīsta̱nuvo̍ vī̱tapṛ̍ṣṭhāḥ |
tayā̱ mada̍ntaḥ sadha̱ mādye̍ṣu |
va̱yagg syā̍ma̱ pata̍yo rayī̱ṇām || 2

vai̱śvā̱na̱ro ra̱śmibhi̍rmā punātu |
vāta̍: prā̱ṇene̍ṣi̱ro ma̍yo̱bhūḥ |
dyāvā̍pṛthi̱vī paya̍sā̱ payo̍bhiḥ |
ṛ̱tāva̍rī ya̱jñiye̍ mā punītām |
bṛ̱hadbhi̍: savita̱stṛbhi̍: |
varṣi̍ṣṭhairdeva̱ manma̍bhiḥ |
agne̱ dakṣai̎: punāhi mā |
yena̍ de̱vā apu̍nata |
yenāpo̍ di̱vyaṃ kaśa̍: |
tena̍ di̱vyena̱ brahma̍ṇā || 3

i̱daṃ brahma̍ punīmahe |
yaḥ pā̍vamā̱nīra̱ddhyeti̍ |
ṛṣi̍bhi̱: sambhṛ̍ta̱g̱ṃ rasa̎m |
sarva̱g̱ṃ sa pū̱tama̍śnāti |
sva̱di̱taṃ mā̍ta̱riśva̍nā |
pā̱va̱mā̱nīryo a̱dhyeti̍ |
ṛṣi̍bhi̱: sambhṛ̍ta̱g̱ṃ rasa̎m |
tasmai̱ sara̍svatī duhe |
kṣī̱ragṃ sa̱rpirmadhū̍da̱kam |
pā̱va̱mā̱nīḥ sva̱styaya̍nīḥ || 4

su̱dughā̱ hi paya̍svatīḥ |
ṛṣi̍bhi̱: sambhṛ̍to̱ rasa̍: |
brā̱hma̱ṇeṣva̱mṛtag̍ṃ hi̱tam |
pā̱va̱mā̱nīrdi̍śantu naḥ |
i̱maṃ lo̱kamatho̍ a̱mum |
kāmā̱nthsama̍rdhayantu naḥ |
de̱vīrde̱vaiḥ sa̱mābhṛ̍tāḥ |
pā̱va̱mā̱nīḥ sva̱styaya̍nīḥ |
su̱dughā̱ hi ghṛ̍ta̱ścuta̍: |
ṛṣi̍bhi̱: sambhṛ̍to̱ rasa̍: || 5

brā̱hma̱ṇeṣva̱mṛtag̍ṃ hi̱tam | yena̍ de̱vāḥ pa̱vitre̍ṇa |
ā̱tmāna̍ṃ pu̱nate̱ sadā̎ |
tena̍ sa̱hasra̍dhāreṇa | pā̱va̱mā̱nyaḥ pu̍nantu mā |
prā̱jā̱pa̱tyaṃ pa̱vitra̎m | śa̱todyā̍magṃ hira̱ṇmaya̎m |
tena̍ brahma̱vido̍ va̱yam | pū̱taṃ brahma̍ punīmahe |
indra̍: sunī̱tī sa̱ha mā̍ punātu | soma̍: sva̱styā varu̍ṇaḥ sa̱mīcyā̎ |
ya̱mo rājā̎ pramṛ̱ṇābhi̍: punātu mā | jā̱tave̍dā mo̱rjaya̍ntyā punātu || 6

(tai.ā.10-29-47)
āpo̱ vā i̱dagṃ sarva̱ṃ viśvā̍ bhū̱tānyāpa̍: prā̱ṇā vā āpa̍: pa̱śava̱ āpo’nna̱māpo’mṛ̍ta̱māpa̍: sa̱mrāḍāpo̍ vi̱rāḍāpa̍: sva̱rāḍāpa̱śchandā̱g̱syāpo̱ jyotī̱g̱ṣyāpo̱ yajū̱g̱ṣyāpa̍: sa̱tyamāpa̱: sarvā̍ de̱vatā̱ āpo̱ bhūrbhuva̱: suva̱rāpa̱ om ||

(tai.brā.3-2-4-1)
a̱paḥ praṇa̍yati |
śra̱ddhā vā āpa̍: |
śra̱ddhāme̱vārabhya̍ pra̱ṇīya̱ praca̍rati |
a̱paḥ praṇa̍yati |
ya̱jño vā āpa̍: |
ya̱jñame̱vārabhya̍ pra̱ṇīya̱ praca̍rati |
a̱paḥ praṇa̍yati |
vajro̱ vā āpa̍: |
vajra̍me̱va bhrātṛ̍vyebhyaḥ prahṛtya̍ pra̱ṇīya̱ praca̍rati |
a̱paḥ praṇa̍yati |
āpo̱ vai ra̍kṣo̱ghnīḥ |
rakṣa̍sā̱mapa̍hatyai |
a̱paḥ praṇa̍yati |
āpo̱ vai de̱vānā̎ṃ pri̱yaṃ dhāma̍ |
de̱vānā̍me̱va pri̱yaṃ dhāma̍ pra̱ṇīya̱ praca̍rati |
a̱paḥ praṇa̍yati |
āpo̱ vai sarvā̍ de̱vatā̎: | de̱vatā̍ e̱vārabhya̍ pra̱ṇīya̱ praca̍rati ||

śrī rudrāya namaḥ | malāpakarṣaṇasnānaṃ samarpayāmi |

Did you see any mistake/variation in the content above? Click here to report mistakes and corrections in Stotranidhi content.