Sri Tripura Bhairavi Kavacham – ஶ்ரீ த்ரிபுரபை⁴ரவீ கவசம்


ஶ்ரீபார்வத்யுவாச –
தே³வதே³வ மஹாதே³வ ஸர்வஶாஸ்த்ரவிஶாரத³ ।
க்ருபாம் குரு ஜக³ந்நாத² த⁴ர்மஜ்ஞோஸி மஹாமதே ॥ 1 ॥

பை⁴ரவீ யா புரா ப்ரோக்தா வித்³யா த்ரிபுரபூர்விகா ।
தஸ்யாஸ்து கவசம் தி³வ்யம் மஹ்யம் கத²ய தத்த்வத꞉ ॥ 2 ॥

தஸ்யாஸ்து வசநம் ஶ்ருத்வா ஜகா³த³ ஜக³தீ³ஶ்வர꞉ ।
அத்³பு⁴தம் கவசம் தே³வ்யா பை⁴ரவ்யா தி³வ்யரூபி வை ॥ 3 ॥

ஈஶ்வர உவாச –
கத²யாமி மஹாவித்³யாகவசம் ஸர்வது³ர்லப⁴ம் ।
ஶ்ருணுஷ்வ த்வம் ச விதி⁴நா ஶ்ருத்வா கோ³ப்யம் தவாபி தத் ॥ 4 ॥

யஸ்யா꞉ ப்ரஸாதா³த்ஸகலம் பி³ப⁴ர்மி பு⁴வநத்ரயம் ।
யஸ்யா꞉ ஸர்வம் ஸமுத்பந்நம் யஸ்யாமத்³யாபி திஷ்ட²தி ॥ 5 ॥

மாதா பிதா ஜக³த்³த⁴ந்யா ஜக³த்³ப்³ரஹ்மஸ்வரூபிணீ ।
ஸித்³தி⁴தா³த்ரீ ச ஸித்³தா⁴ஸ்ஸ்யாத³ஸித்³தா⁴ து³ஷ்டஜந்துஷு ॥ 6 ॥

ஸர்வபூ⁴தப்ரியங்கரீ ஸர்வபூ⁴தஸ்வரூபிணீ ।
ககாரீ பாது மாம் தே³வீ காமிநீ காமதா³யிநீ ॥ 7 ॥

ஏகாரீ பாது மாம் தே³வீ மூலாதா⁴ரஸ்வரூபிணீ ।
ஈகாரீ பாது மாம் தே³வீ பூ⁴ரிஸர்வஸுக²ப்ரதா³ ॥ 8 ॥

லகாரீ பாது மாம் தே³வீ இந்த்³ராணீவரவல்லபா⁴ ।
ஹ்ரீங்காரீ பாது மாம் தே³வீ ஸர்வதா³ ஶம்பு⁴ஸுந்த³ரீ ॥ 9 ॥

ஏதைர்வர்ணைர்மஹாமாயா ஶாம்ப⁴வீ பாது மஸ்தகம் ।
ககாரீ பாது மாம் தே³வீ ஶர்வாணீ ஹரகே³ஹிநீ ॥ 10 ॥

மகாரீ பாது மாம் தே³வீ ஸர்வபாபப்ரணாஶிநீ ।
ககாரீ பாது மாம் தே³வீ காமரூபத⁴ரா ஸதா³ ॥ 11 ॥

காகாரீ பாது மாம் தே³வீ ஶம்ப³ராரிப்ரியா ஸதா³ ।
பகாரீ பாது மாம் தே³வீ த⁴ராத⁴ரணிரூபத்⁴ருக் ॥ 12 ॥

ஹ்ரீங்காரீ பாது மாம் தே³வீ ஆகாரார்த⁴ஶரீரிணீ ।
ஏதைர்வர்ணைர்மஹாமாயா காமராஹுப்ரியா(அ)வது ॥ 13 ॥

மகார꞉ பாது மாம் தே³வீ ஸாவித்ரீ ஸர்வதா³யிநீ ।
ககார꞉ பாது ஸர்வத்ர கலாம்பா³ ஸர்வரூபிணீ ॥ 14 ॥

லகார꞉ பாது மாம் தே³வீ லக்ஷ்மீ꞉ ஸர்வஸுலக்ஷணா ।
ஓம் ஹ்ரீம் மாம் பாது ஸர்வத்ர தே³வீ த்ரிபு⁴வநேஶ்வரீ ॥ 15 ॥

ஏதைர்வர்ணைர்மஹாமாயா பாது ஶக்திஸ்வரூபிணீ ।
வாக்³ப⁴வா மஸ்தகம் பாது வத³நம் காமராஜிதா ॥ 16 ॥

ஶக்திஸ்வரூபிணீ பாது ஹ்ருத³யம் யந்த்ரஸித்³தி⁴தா³ ।
ஸுந்த³ரீ ஸர்வதா³ பாது ஸுந்த³ரீ பரிரக்ஷது ॥ 17 ॥

ரக்தவர்ணா ஸதா³ பாது ஸுந்த³ரீ ஸர்வதா³யிநீ ।
நாநாலங்காரஸம்யுக்தா ஸுந்த³ரீ பாது ஸர்வதா³ ॥ 18 ॥

ஸர்வாங்க³ஸுந்த³ரீ பாது ஸர்வத்ர ஶிவதா³யிநீ ।
ஜக³தா³ஹ்லாத³ஜநநீ ஶம்பு⁴ரூபா ச மாம் ஸதா³ ॥ 19 ॥

ஸர்வமந்த்ரமயீ பாது ஸர்வஸௌபா⁴க்³யதா³யிநீ ।
ஸர்வலக்ஷ்மீமயீ தே³வீ பரமாநந்த³தா³யிநீ ॥ 20 ॥

பாது மாம் ஸர்வதா³ தே³வீ நாநாஶங்க²நிதி⁴꞉ ஶிவா ।
பாது பத்³மநிதி⁴ர்தே³வீ ஸர்வதா³ ஶிவதா³யிநீ ॥ 21 ॥

பாது மாம் த³க்ஷிணாமூர்தி ருஷி꞉ ஸர்வத்ர மஸ்தகே ।
பங்க்திஶ்ச²ந்த³꞉ ஸ்வரூபா து முகே² பாது ஸுரேஶ்வரீ ॥ 22 ॥

க³ந்தா⁴ஷ்டகாத்மிகா பாது ஹ்ருத³யம் ஶங்கரீ ஸதா³ ।
ஸர்வஸம்மோஹிநீ பாது பாது ஸங்க்ஷோபி⁴ணீ ஸதா³ ॥ 23 ॥

ஸர்வஸித்³தி⁴ப்ரதா³ பாது ஸர்வாகர்ஷணகாரிணீ ।
க்ஷோபி⁴ணீ ஸர்வதா³ பாது வஶிநீ ஸர்வதா³வது ॥ 24 ॥

ஆகர்ஷிணீ ஸதா³ பாது ஸதா³ ஸம்மோஹிநீ ததா² ।
ரதிதே³வீ ஸதா³ பாது ப⁴கா³ங்கா³ ஸர்வதா³வது ॥ 25 ॥

மாஹேஶ்வரீ ஸதா³ பாது கௌமாரீ ஸர்வதா³வது ।
ஸர்வாஹ்லாத³நகாரீ மாம் பாது ஸர்வவஶங்கரீ ॥ 26 ॥

க்ஷேமங்கரீ ஸதா³ பாது ஸர்வாங்க³ம் ஸுந்த³ரீ ததா² ।
ஸர்வாங்க³ம் யுவதீ ஸர்வம் ஸர்வஸௌபா⁴க்³யதா³யிநீ ॥ 27 ॥

வாக்³தே³வீ ஸர்வதா³ பாது வாணீ மாம் ஸர்வதா³வது ।
வஶிநீ ஸர்வதா³ பாது மஹாஸித்³தி⁴ப்ரதா³வது ॥ 28 ॥

ஸர்வவித்³ராவிணீ பாது க³ணநாதா² ஸதா³வது ।
து³ர்கா³தே³வீ ஸதா³ பாது வடுக꞉ ஸர்வதா³வது ॥ 29 ॥

க்ஷேத்ரபால꞉ ஸதா³ பாது பாது சாஶாந்திதா³ ।
அநந்த꞉ ஸர்வதா³ பாது வராஹ꞉ ஸர்வதா³வது ॥ 30 ॥

ப்ருதி²வீ ஸர்வதா³ பாது ஸ்வர்ணஸிம்ஹாஸநஸ்ததா² ।
ரக்தாம்ருதஶ்ச ஸததம் பாது மாம் ஸர்வகாலத꞉ ॥ 31 ॥

ஸுதா⁴ர்ணவ꞉ ஸதா³ பாது கல்பவ்ருக்ஷ꞉ ஸதா³வது ।
ஶ்வேதச்ச²த்ரம் ஸதா³ பாது ரத்நதீ³ப꞉ ஸதா³வது ॥ 32 ॥

ஸததம் நந்த³நோத்³யாநம் பாது மாம் ஸர்வஸித்³த⁴யே ।
தி³க்பாலா꞉ ஸர்வதா³ பாந்து த்³வந்த்³வௌகா⁴꞉ ஸகலாஸ்ததா² ॥ 33 ॥

வாஹநாநி ஸதா³ பாந்து ஸர்வதா³(அ)ஸ்த்ராணி பாந்து மாம் ।
ஶஸ்த்ராணி ஸர்வதா³ பாந்து யோகி³ந்ய꞉ பாந்து ஸர்வதா³ ॥ 34 ॥

ஸித்³தா⁴꞉ பாந்து ஸதா³ தே³வீ ஸர்வஸித்³தி⁴ப்ரதா³வது ।
ஸர்வாங்க³ஸுந்த³ரீ தே³வீ ஸர்வதா³வது மாம் ததா² ॥ 35 ॥

ஆநந்த³ரூபிணீ தே³வீ சித்ஸ்வரூபா சிதா³த்மிகா ।
ஸர்வதா³ ஸுந்த³ரீ பாது ஸுந்த³ரீ ப⁴வஸுந்த³ரீ ॥ 36 ॥

ப்ருத²க்³தே³வாலயே கோ⁴ரே ஸங்கடே து³ர்க³மே கி³ரௌ ।
அரண்யே ப்ராந்தரே வா(அ)பி பாது மாம் ஸுந்த³ரீ ஸதா³ ॥ 37 ॥

இத³ம் கவசமித்யுக்தம் மந்த்ரோத்³தா⁴ரஶ்ச பார்வதி ।
ய꞉ படே²த்ப்ரயதோ பூ⁴த்வா த்ரிஸந்த்⁴யம் நியத꞉ ஶுசி꞉ ॥ 38 ॥

தஸ்ய ஸர்வார்த²ஸித்³தி⁴꞉ ஸ்யாத்³யத்³யந்மநஸி வர்ததே ।
கோ³ரோசநாகுங்குமேந ரக்தசந்த³நகேந வா ॥ 39 ॥

ஸ்வயம்பூ⁴குஸுமைஶ்ஶுக்லை꞉ பூ⁴மிபுத்ரே ஶநௌ ஸுரே ।
ஶ்மஶாநே ப்ராந்தரே வாபி ஶூந்யாகா³ரே ஶிவாலயே ॥ 40 ॥

ஸ்வஶக்த்யா கு³ருணா யந்த்ரம் பூஜயித்வா குமாரிகாம் ।
தந்மநும் பூஜயித்வா ச கு³ருபங்க்திம் ததை²வ ச ॥ 41 ॥

தே³வ்யை ப³லிம் நிவேத்³யாத² நரமார்ஜாரஸூகரை꞉ ।
நகுலைர்மஹிஷைர்மேஷை꞉ பூஜயித்வா விதா⁴நத꞉ ॥ 42 ॥

த்⁴ருத்வா ஸுவர்ணமத்⁴யஸ்த²ம் கண்டே² வா த³க்ஷிணே பு⁴ஜே ।
ஸுதிதௌ² ஶுப⁴நக்ஷத்ரே ஸூர்யஸ்யோத³யநே ததா² ॥ 43 ॥

தா⁴ரயித்வா ச கவசம் ஸர்வஸித்³தி⁴ம் லபே⁴ந்நர꞉ ।
கவசஸ்ய ச மாஹாத்ம்யம் நாஹம் வர்ஷஶதைரபி ॥ 44 ॥

ஶக்நோமி து மஹேஶாநி வக்தும் தஸ்ய ப²லம் து யத் ।
ந து³ர்பி⁴க்ஷப²லம் தத்ர ந ஶத்ரோ꞉ பீட³நம் ததா² ॥ 45 ॥

ஸர்வவிக்⁴நப்ரஶமநம் ஸர்வவ்யாதி⁴விநாஶநம் ।
ஸர்வரக்ஷாகரம் ஜந்தோஶ்சதுர்வர்க³ப²லப்ரத³ம் ॥ 46 ॥

யத்ர குத்ர ந வக்தவ்யம் ந தா³தவ்யம் கதா³சந ।
மந்த்ரப்ராப்ய விதா⁴நேந பூஜயேத்ஸததம் ஸுதீ⁴꞉ ॥ 47 ॥

தத்ராபி து³ர்லப⁴ம் மந்யே கவசம் தே³வரூபிணம் ।
கு³ரோ꞉ ப்ரஸாத³மாஸாத்³ய வித்³யாம் ப்ராப்ய ஸுகோ³பிதாம் ॥ 48 ॥

தத்ராபி கவசம் தி³வ்யம் து³ர்லப⁴ம் பு⁴வநத்ரயே ।
ஶ்லோகம் வா ஸ்தவமேகம் வா ய꞉ படே²த்ப்ரயத꞉ ஶுசி꞉ ॥ 49 ॥

தஸ்ய ஸர்வார்த²ஸித்³தி⁴꞉ ஸ்யாச்ச²ங்கரேண ப்ரபா⁴ஷிதம் ।
கு³ருர்தே³வோ ஹர꞉ ஸாக்ஷாத்பத்நீ தஸ்ய ச பார்வதீ ॥ 50 ॥

அபே⁴தே³ந யஜேத்³யஸ்து தஸ்ய ஸித்³தி⁴ரதூ³ரத꞉ ॥ 51 ॥

இதி ஶ்ரீருத்³ரயாமளே பை⁴ரவபை⁴ரவீஸம்வாதே³ ஶ்ரீ த்ரிபுரபை⁴ரவீ கவசம் ॥


గమనిక: "శ్రీ లక్ష్మీ స్తోత్రనిధి" పారాయణ గ్రంథము తెలుగులో ముద్రణ చేయుటకు ఆలోచన చేయుచున్నాము.

Report mistakes and corrections in Stotranidhi content.

Facebook Comments

மறுமொழி இடவும்

உங்கள் மின்னஞ்சல் வெளியிடப்பட மாட்டாது

error: Not allowed
%d bloggers like this: